Read Ȧŋlemrȧnɛ Ȧfu AŋRomans 8 Bible Online

AŋRomans 8 - Ȧŋlemrȧnɛ Ȧfu bible

AŋRomans 8

¹Tiyȧŋ mətheri mə gbəli hɛ sɔ yi ta ȧtȧ ŋaŋ aŋa yi rokor ka Yisɔs Kraystȧŋ, aŋa mə te kɔth ka mafela ma madɛr, kɛrɛ ka ɔYina məsəm.

²Ȧtesoma-e ȧŋthɔ ŋa ɔYina məsəm ka aŋesəm rokor ka Yisɔs Krayst aŋ po səli mi kəwur ka ȧŋthɔ ŋa ahakɛ yi rȧfi.

³kotȧy-e ȧtȧ ȧŋthɔ aŋ te gbəli yɔ, maŋ yi ayay asabu ŋa madɛr-e, Kuru ɔ yɔ ti ma ɔ somra ɔWan kɔŋ ka mȧbȧlȧnɛ ma ȧŋdɛr ŋa wuni ka ahakɛ-e, tə kəyi sathka ta salata ahakɛ, kɔ ŋapas ahakɛ ka madɛr;

⁴kȧmȧ mȧlompi ma ȧŋthɔ mə gbəli gbenthis ro rɔsu, aŋa te kɔth ka mafela ma madɛr, kɛrɛ ka ɔYina məsəm.

⁵kotȧy-e ŋaŋ aŋa taŋanɛ mafela ma madɛr-e, aŋ botər ti rə ȧmerȧ ta salata mȧtȧy ma madɛr, kɛrɛ aŋa taŋanɛ ka ɔYina məsəm-e, aŋ botər ti rə ȧmerȧ salata mȧtȧy ma ɔYina.

⁶kotȧy-e mayi ma madɛr ma ahakɛ mə kȧrȧ rəfi; kɛrɛ mayi ma ɔYina məsəm mə yi aŋesəm yi məthɔfəl.

⁷Pəkasifɛ mayi ma madɛr mə yi məgbɛŋa kəŋamnɛ Kurɔŋ, ȧtesoma-e mə sanɛ hɛ ka ȧŋthɔ ŋa Kuru, ɔwa mə gbəli hɛ yɔ yi hali.

⁸Tiyȧŋ ŋaŋ aŋa ba mayi ma madɛr aŋ gbəli hɛ thesanɛ Kuru Məsaba.

⁹Kɛrɛ naŋ, nə yi hɛ ka madɛr-e, nə yi ka ɔYina məsəm, bepi pə yi ɔYina məsəm ka Kuru a yi nu rokor. Ɔwa bepi wuni o wuni ɔ ba hɛ ɔYina ka Kraystȧŋ ɔ yi hɛ ukɔŋ.

¹⁰Ɔwa bepi Krayst ɔ yi nu rokor-e, hali madɛr ma nu mə yi məfi salata ahakɛ, kɛrɛ ɛyina ɛ nu ɛ ba aŋesəm salata mȧlompi.

¹¹Bepi ɔYina ka kɔn ɔwe yokas Yisɔs kətɔŋ ka aŋfi ɔ yi rokor ka nu-e, kɔn ɔwe yɔ Yisɔsȧŋ ɔ kȧl yokanɛ ka rəfi ɔ tə sɔŋ aŋesəm ka madɛr ma nu salata ɔYina kɔŋ ɔwe yi rokor ka nu.

¹²Tiyȧŋ aŋwɔnt a mi, saŋ sə ba hɛ sɔ rəbei salata mafela ma madɛr ma su, tə kətaŋ ma,

¹³pəkasifɛ bepi nə yi kətȧŋȧnɛ ka aŋfɔsɔ ŋa mafela ma madɛr-e, nə tə fi. Kɛrɛ bepi nə difəth mȧyɔs ma madɛr rə aŋfɔsɔ ŋa ɔYina-e, nə tə ba aŋesəm.

¹⁴Ȧtesoma-e ŋaŋ aŋa ɔYina ka Kuru ɔ kɔtha-e, ŋa yi aŋwuth ŋa Kuru,

¹⁵kotȧy-e nə sɔthɔ hɛ sɔ ɛmerȧ ya rətar tə kəkal nesa; kɛrɛ nə sɔthɔ ɛmerȧ ya rəwaŋkom, ɔwa di kati sə pa, Aba, Pa.

¹⁶ƆYina kɔn kɔnɔnɛ ɔ sɔŋ məseri dɛ yi ɛmerȧ ɛ su, kəpa sə yi aŋwuth ŋa Kuru.

¹⁷Ɔwa bepi sə yi awuth-e, sə yi thɔŋ abȧki ŋa akɛŋ, abȧki ŋa Kuru, yi aŋyeranɛ dɛ yi Krayst salata rabȧki, bepi pə yi sə nakasi yi kɔn, kȧmȧ sə sɔthɔ aŋyiki yi kɔn.

¹⁸kotȧy-e, i botər ti rə ȧmerȧ kəpa kanakasi ka ȧŋlɔkɔ aŋe kə bek hɛ tə kəthunthanɛ dɛ yi aŋyiki aŋa yi tə kətɔrinɛ do rɔsu.

¹⁹kotȧy-e ɛyɛt ɛbɛmpa bɛ ɛ tə kar rə kəbosinɛ kəbaŋ ta kaŋȧybɛ ka aŋwuth ŋa Kuru.

²⁰kotȧy-e ɛyɛt ɛbɛmpa ɛ yi hɛ ras ɛgbenthis, pə yi hɛ ka mȧselɔ mati, kɛrɛ ka mȧselɔ ma kɔn ɔwe səki ti yaŋ.

²¹Kɛrɛ kəgbak ȧmerȧ kə yi kəpa yi ka ɔləpsɔ ɛyɛt ɛbɛmpa bɛ a tə səli yi kəwur ka ratar ra mayi məthei tə kəsɔthɔ rȧwankom rəgbenthis ra aŋwuth ŋa Kuru.

²²Ȧtesoma-e sə tȧrȧ kəpa ɛyɛt ɛbɛmpa bɛ ɛ laŋ rə ɔnakasi ɔbaŋ haŋ ka-ake.

²³Ka pə yi hɛ gbo yaŋ-e, kɛrɛ saŋ sɔ gbeŋ aŋa ba mȧkomi mətɔtɔkɔ ma ɔYina-e, hali saŋ sə laŋ rə ȧmerȧ, ma sə kar ȧŋlɔkɔ ma a ba kəsəki su mɔ awuth, pə yi mɔ-e kabani ka mȧdɛr ma su.

²⁴kotȧy-e rə kəgbak ȧmerȧ sə po sɔthɔ kəkisi; kɛrɛ ȧtȧy ȧtȧ mə sə nəŋka rəfɔr tə yi hɛ tȧy təgbak ȧmerȧ, kotȧy-e kanɛ mə gbak ȧmerȧ ta ȧtȧ ɔ nəŋka rəfɔr-e?

²⁵Kɛrɛ bepi sə gbak ȧmerȧ ta ȧtȧ sə te tha nəŋka rəfɔr-e, sə tə kar ti rə kəmuyu.

²⁶Yaŋ ɔYina məsəm sɔ ɔ mar su ka mȧrȧnt ma su; ȧtesoma-e sə tɛ hɛ tə kəramnɛ mɔ mə sə yi naŋ tə kəramnɛ, kɛrɛ ɔYina məsəm-e, kɔn kɔnɔnɛ ɔ nɛmthɛnɛ ta ȧtȧ su yi təlaŋ ȧtȧ a te gbəli pa.

²⁷Ɔwa kɔn ɔwe mə gbɛlɛŋ ɛmerȧ ɔ tȧrȧ ko ȧŋmerȧ ŋa ɔYina məsəm aŋ yi, pəkasifɛ ɔ nɛmthɛnɛ ta salata aŋfəm ŋa Kuru kətȧŋȧnɛ ka mȧselɔ ma Kuru.

²⁸Ka sə tȧrȧ kəpa mȧtȧy bɛ mə tə yɔnɛ finɔ ta salata ŋaŋ aŋa bɔthər Kuru, pə yi mɔ ta ŋaŋ aŋa a muti kətȧŋȧnɛ ka mȧselɔ mɔŋ.

²⁹kotȧy-e ŋaŋ aŋa Kuru ɔ po thith thəpaŋ, ɔ ba mabotəs mati kȧmȧ aŋ taŋanɛ ka mȧbȧlȧnɛ ma ɔWan kɔŋ, kȧmȧ ɔWan kɔŋ ɔ yi ɔbaki kətɔŋ ka awɔnt agbȧthi.

³⁰Ɔwa ŋaŋ aŋa ɔ po thith thəpaŋ, ŋaŋ sɔ ɔ muti; ɔwa ŋaŋ aŋa ɔ muti-e, ɔ sɔŋ ŋa məmari; ɔwa ŋaŋ aŋa ɔ sɔŋ məmari-e, ɔ kȧl yikis ŋa.

³¹To mə sə gbəli pa thɔŋ ta salata mȧtȧy ame-a? Bepi Kuru ɔ təmȧ ta ȧtȧ su-e, kanɛ mə gbəli təmȧ kəŋamnɛ su-e?

³²Bepi Kuru ɔ pɛnsa hɛ tə kəsɔnd ɔWan kɔŋ ta ȧtȧ su-e, ɔ gbəli hɛ sɔ selɔ tə kəsɔŋ su mȧtȧy bɛ yi kɔn-i?

³³Kanɛ mə gbanthir aŋfəm ŋa Kuru ta tȧy o tay-e? Pə yi Kuru ɔwe mə sɔŋ məmari.

³⁴Kanɛ yi tə kəsɔŋ ŋa mətheri-e? Pə yi Krayst Yisɔs ɔwe fi, aŋko, ɔwe kȧl yokanɛ ka rəfi, ɔwe yi thɔŋ ka kȧdiyɔ ka Kuru, ro mɔ nɛmthɛnɛ ta ȧtȧ su.

³⁵Kanɛ sɔ mə gbaski su kəwur ka mabɔthər ma Kraist-e? Pə yi kəsɔmpanɛ-o, amɔnɛ-o, məkɛthanɛ-o, dor-o, rətiŋ-o, məsibo-o, thalɔm agbathɔ-i?

³⁶Mɔ mə a gbal kəpa, Salata mu a difəth su pali A nənk su mɔ təlɔmɛ aŋa mə a fai.

³⁷Ɔwa ka mȧtȧy ame bɛ sə ba kətham kəthasər asabu ŋa kɔn ɔwe bɔthər su.

³⁸kotȧy-e i lanɛ kəpa rəfi-o, aŋesəm-o, amaleka-o, agbəka-o, ɛfɔsɔ-o, mȧtȧy ma ka-ake-o, mȧtȧy ma ninaŋ-o,

³⁹kəsaŋa-o, ɔbɔlɔŋ-o, thalɔm rəka o rəka ɛbɛmpa ɛ gbəli hɛ gbaski su ka mabɔthər ma Kuru ama yi ka Yisɔs Krayst ɔMarki kȧsu.