Read Ȧŋlemrȧnɛ Ȧfu 1 AŋKɔrenth 1 Bible Online

1 AŋKɔrenth 1 - Ȧŋlemrȧnɛ Ȧfu bible

1 AŋKɔrenth 1

¹Pɔl, ɔwe a muti tə kəyi usom ka Yisɔs Kraystȧŋ, ka mȧselɔ ma Kuru, yi Sɔsthinis, ɔwɔnt su,

²ka aŋfəm ŋa Kuru aŋa yi ro Kɔrinth, aŋa a səməs rokor ka Yisɔs Krayst, aŋa a muti tə kəyi asəm dɛ yi ŋaŋ bɛ dɛr o dɛr aŋa mə tela ka ȧŋes ŋa ɔMarki kȧsu Yisɔs Krayst, ɔwe yi ɔMarki ka ŋaŋ, dɛ yi ɔka su sɔ.

³Ta aboŋa yi məthɔfəl ɛ yi ro rɔnu kəwur ka Kuru ɔKas kȧsu, yi ɔMarki Yisɔs Krayst.

⁴I muti ɔKuru kȧmi mɔmɔ lɔkɔ o lɔkɔ ta ȧtȧ nu, asabu ŋa ȧŋboŋa ŋa Kuru aŋa a sɔŋ nu rokor ka Yisɔs Krayst;

⁵tə kəyi nə po sɔthɔ rəyola kəwur do rɔŋɔŋ rə sim yi kətara tȧy bɛ.

⁶Tiyȧŋ maseri salata Krayst mə po bȧksər kətɔŋ ka nu,

⁷kȧmȧ nə te paŋ aboya o boya ma mə nə kar kȧder ka ɔMarki kȧsu Yisɔs Krayst,

⁸ɔwe yi tə kəbaksər nu sɔ haŋ ka ɔthalnɛ. Kama nə te ba məthɛkɛ ka ȧŋrey ŋa ɔMarki kȧsu Yisɔs Krayst.

⁹Kuru ɔ yi ubɔthi lanɛ ɔwe po muti nu ka mamanɛ ma ɔWan kɔŋ Yisɔs Krayst ɔMarki kȧsu.

¹⁰Ɔmari nu, awɔnt, ka ȧŋes ŋa ɔMarki kȧsu Yisɔs Kraystȧŋ, i nɛmthɛnɛ nu kȧmȧ nə ba rim din, dɛ yi kȧmȧ ɔgbaskɛ gbaskɛ ɔ te yi kətɔŋ ka nu, kɛrɛ ba nu ȧmerȧ ŋin yi məgbək min.

¹¹kotȧy-e, aŋwɔnt mi, aŋfəm ŋa Tiloyis aŋ po tɔri mi kəpa ɛgbȧl ɛ yi kətɔŋ ka nu.

¹²Pə yi kəpa, wuni o wuni kətɔŋ ka nu ɔ pa, Minɛ i wopnɛ Pɔlȧŋ; thalɔm, Minɛ i wopnɛ Apɔlɔsȧŋ; thalɔm, Minɛ i wopnɛ Kayafasȧŋ; ta a pa ras, Minɛ i wopnɛ Kraystȧŋ.

¹³A gbəli yerəsanɛ ɔKraist-i? Pɔlȧŋ, a tȧŋ kɔ ka akənt kəpəŋkinɛ-i? Thalɔm a po baftays nu ka ȧŋes ŋa Pɔlȧŋ-i?

¹⁴I muti Kuru mɔmɔ ma i te baftays wuni o wuni kətɔŋ ka nu thambe Krispɔs yi Kayɔsȧŋ,

¹⁵kȧmȧ afəm aŋ gbəli hɛ pa kəpa, i po baftays nu ka ȧŋes a mi gbeŋ.

¹⁶Ɔwa i po baftays sɔ kabɔr ka Stifanɔs, kɛrɛ i tɛ hɛ bepi i po baftays wuni lɔm sɔ.

¹⁷kotȧy-e Krayst ɔ som hɛ mi tə kəbaptais, kɛrɛ ɔ som mi tə kəkawandi mapa məfinɔ ma Kuru; pə yi hɛ rə kətemp dɛ yi sim təfinɔ, ta thani a yɔ akənt kəpəŋkinɛ ka Krayst kə səkɛ yay.

¹⁸kotȧy-e, ȧŋpa ŋa akənt kəpəŋkiyɛ aŋ yi gbo apənk ka aŋa mə dinɛ; kɛrɛ ka saŋ aŋkisi, aŋ yi aŋfɔsɔ ŋa Kuru Məsaba.

¹⁹Ȧtesoma-e a po gbal ti kəpa, I ti dim kȧtemp ka antempi, Ɔwa i ti ləsər kȧtȧrȧ ka antara tȧy.

²⁰Reke ɔtempi ɔ yi-a? Reke ɔgbal ɔ yi-a? Ɔthonka ka ȧdȧru are kɔna? Kuru ɔ səki hɛ kȧtemp ka ȧdȧru are apəŋk-i?

²¹Ma pə yi kətȧŋȧnɛ ka kȧtemp ka ȧdȧru-e adaru rə tɛ hɛ Kuru-e, rodarəŋ kati Kurɔŋ ka kȧtemp kɔŋ, ɔ thith tə kəkisis aŋa lanɛ ka ȧŋpənk ŋa kakawandi.

²²Ȧtesoma-e, aŋYuda aŋ thɛns ɛmisali, yi aŋKrik aŋ thɛns kətemp;

²³Kɛrɛ saŋ sə kawandi gbo Kraystȧŋ, ɔwe a tȧŋ ka akənt kəpəŋkinɛ; tə yi ka aŋYuda tȧy təpənthbəlȧ, ɔwa ka aŋKrik-e, tȧy təpənk.

²⁴Kɛrɛ ka ŋaŋ aŋa po malanɛ kamuti kɔŋ-e, pə yi aYuda-o, thalɔm aKrik-o, ɔKrayst ɔ yi aŋfɔsɔ ŋa Kuru yi kȧtemp ka Kuru.

²⁵Pəkasifɛ rapənk ra Kuru rə thasi kȧtemp ka afəm, ɔwa mȧrȧnt ma Kuru mə ba afɔsɔ athasi aŋfɔsɔ ŋa afəm.

²⁶Tiyȧŋ tȧmtȧmnɛ nu katela ka nu, awɔnt; ma pə yi-e, a tela hɛ afəm agbȧthi kətɔŋ ka ŋaŋ aŋa yi atempi rə kȧtemp ka rəwuni kəpet, thalɔm ŋaŋ aŋa ba afɔsɔ, thalɔm ŋaŋ aŋa a kom ka ayiki;

²⁷kɛrɛ Kuru ɔ po thith mȧtȧy məpənk ma ȧdȧru kȧmȧ ɔ lapəs antempi; ɔ thith mȧtȧy mərant ma ȧdȧru kȧmȧ ɔ lapəs mȧtȧy ma afɔsɔ;

²⁸kɔ thith mȧtȧy məyai ma ȧdȧru yi mȧtȧy məfarkɛ, yao, hali mȧtȧy ama te yi, Kuru ɔ po thith ma tə kədim mȧtȧy ama yi.

²⁹Kama wuni o wuni ɔ te gbəli kolonɛ ka kȧbəprȧnɛ ka Kuru.

³⁰Kɛrɛ salata mabotəs ma Kuru-e, naŋ nə yi rokor ka Krayst Yisɔs. Kɔnɔ yi kȧtemp, yi mȧlompi, yi kasəməsnɛ dɛ yi kabani kȧsu,

³¹kȧmȧ pə gbəli yi mɔ mə a gbal kəpa, Ɔwe mə kolonɛ, ta ɔ kolonɛ ka ɔMarki.