Read Ȧŋlemrȧnɛ Ȧfu 1 AŋKɔrenth 10 Bible Online

1 AŋKɔrenth 10 - Ȧŋlemrȧnɛ Ȧfu bible

1 AŋKɔrenth 10

¹Awɔnt, i yema kȧmȧ nə kala ȧmerȧ kəpa aŋfəm a su abȧki bɛ aŋ po yi thəpaŋ roratha ka kagbəpər ka ȧŋbunth ŋa akima, ɔwa ŋa bɛ aŋ po fəsi kȧbȧŋ kəyim.

²A baftays ŋa bɛ sɔ ka ȧŋbunth akima yi kȧbȧŋ tə kətaŋ Mosisȧŋ.

³Ɔwa ŋa bɛ aŋ di kadi kəsəm kin ka ɔYina;

⁴ŋa bɛ sɔ aŋ mun ramun din ra ro Yina; kotȧy-e aŋ mun ka aŋgbalaŋ ŋa ro Yina ŋati aŋa bɔ tȧŋ ŋa. Ɔwa aŋgbalaŋ ŋati ŋȧ yi Kraystȧŋ.

⁵Kɛrɛ pə bun yi ŋa bɛ aŋ bɔnɛs hɛ Kuru; te ba ti aŋ fi ro wula.

⁶Ɔwa mȧtȧy ame mə yi ɛmɔl ta ȧtȧ su kȧmȧ sə te milɛ mȧtȧy mələs, mɔ mə ŋaŋ aŋ milɛ.

⁷Ta a pa ras nə yi abȧtho ɛrɔŋ mɔ mə alɔm kətɔŋ ka ŋaŋ aŋ po yɔ; mɔ mə a po gbal kəpa, Aŋfəm aŋ yirȧ tə kədi yi kəmun, kaŋ yokanɛ tə kəwol.

⁸Ta a pa ras sə yɔ kərəp, mɔ alɔm kətɔŋ ka ŋaŋ aŋ po yɔ, kaŋ fi ka ȧrey ŋin ɛwul kəgba ɛsas.

⁹Ta a pa ras sə mɛmər ɔMarki, mɔ mə alɔm kətɔŋ ka ŋaŋ aŋ po yɔ, ɔwa ɛbok aŋ dim ŋa.

¹⁰Ta a pa ras nə fɔfəthanɛ, mɔ mə alɔm kətɔŋ ka ŋaŋ aŋ po yɔ, ɔwa ɔDim ɔ dim ŋa.

¹¹Ɔwa mȧtȧy ame bɛ mə yɔnɛ ŋaŋ tə kəyi ȧmȧŋ, ka a gbal ma mɔ amɔl ta ȧtȧ su, ma pə yi sə bəpər ka ɔlasər wa ɛyamana.

¹²Tiyȧŋ ɔwe nanɛ kəpa ɔ təmȧ, ta ɔ bumnɛ ta thani ɔ fumpɔ.

¹³Agbɔns o gbɔns aŋ gbəli hɛ derər nu thambe ara mə der ka wuni o wuni kəpet; kɛrɛ Kuru ɔ yi ubɔthi lanɛ, ɔwa ɔ ba hɛ kəselɔ a gbɔns nu pəthas ȧtȧ nə gbəli, kɛrɛ ma aŋgbɔns aŋ bek-e, ɔ tə kanthi roŋ dəgbukɛ kȧmȧ nə gbəli muyu.

¹⁴Tiyȧŋ ȧŋbɔthər a mi, gbukɛ nu kəwur rə kəbatho ɛrɔŋ.

¹⁵I fɔfȧnɛ nu mɔ afəm atempi; gbək ti nu ȧtȧ i pa.

¹⁶Ampɔthi ŋa aruba aŋa sə ruba-e, aŋ yi hɛ kayeranɛ ka mȧtir ma Kraist-i? Kabo ȧke sə siməth-e, kə yi hɛ kayeranɛ ka ȧŋdɛr ŋa Kraist-i?

¹⁷Ɔwa mɔ mȧ kabo kə yi kin-e, saŋ sɔ hali ma sə yi sa agbȧthi-e, sə yi adɛr ŋin. Kotȧy-e saŋ bɛ sə po yeranɛ ka kabo kin kati.

¹⁸Kəli nu aŋIsrɛl thəpaŋ. Ŋaŋ aŋa di ɛsathka-e, ŋa tha yeranɛ ka ȧŋbɛsɛ-i?

¹⁹To mə i pa thɔŋ-a? Da rəbumərnɛ rə yi rəka-i, thalɔm ara a sɔŋ sathka ka ɛyɛt ɛbumərnɛ rə yi rəka-i?

²⁰Gbere, kɛrɛ i pa, ɛyɛt ɛyɛ tȧbona təlɔm aŋ sɔŋ sathka-e, aŋ sɔŋ yi ka akərəfi aləs, pə yi hɛ ka Kuru; ɔwa i yema hɛ nə ba məmanɛ yi akərəfi aləs.

²¹Nə gbəli hɛ mun ka ampɔthi ŋa ɔMarki yi ka ampɔthi ŋa akərəfi aləs; nə gbəli hɛ di ka ȧŋthebul ŋa ɔMarki, dɛ yi ka ȧŋthebul ŋa akərəfi yawin-əŋ.

²²Sə yema yɔ kȧmȧ ɔMarki ɔ ba kətut-i? Saŋ sə ba afɔsɔ pəthasi kɔ-i?

²³Mȧtȧy bɛ mə yi məlompi ta ȧtȧ mi, kɛrɛ mȧtȧy bɛ mə yi hɛ məmari. Mȧtȧy bɛ mə yi məlompi ta ȧtȧ mi, kɛrɛ mȧtȧy bɛ mə mar hɛ ȧmerȧ.

²⁴Ta wuni o wuni ɔ te thɛn ȧtȧ yi təfinɔ ta atɔŋ gbo son-e, kɛrɛ wuni o wuni ta ɔ thɛn ȧtȧ yi təfinɔ ta aŋkos ŋɔŋ.

²⁵Rəka o rəka ara a thila ka ɔdɛr ɔthila-e, di ri nu kəte yifəth tȧy o tȧy salata ȧmerȧ.

²⁶kotȧy-e Kuru Məsaba kɔnɔ ba ȧdȧru yi ɔlasǝr wati.

²⁷Bepi ukin ka ante lanɛ ɔ muti nu ka amet-e, ɔwa nə nanɛ tə kəkɔ-e, di koko bɛ ara a bot rodi ka nu, ɔwa te yifəth tȧy o tȧy salata ȧmerȧ.

²⁸Kɛrɛ bepi wuni o wuni ɔ pa ro rɔnu, Are, a sɔŋ ri sathka. Te di salata kɔn ɔwe tɔri mu ti rɛ yi sɔ salata ȧmerȧ ȧferȧ.

²⁹(Ȧŋmerȧ ŋa ɔwuni kati ŋȧ mɛ i ley; aŋa mu thahɔ). Kɔyɛŋ gbeŋ ȧŋmerȧ ŋa wuni lɔm aŋ gbəli thonkas kayi kəyaŋkaŋ ka mi-e?

³⁰Bepi minɛ kətaŋ ka aboŋa-e, i di rɛ kəmuti mɔmɔ-e, kɔyɛŋ mə a fofiya mi salata arəka ta ara i muti mɔmɔ-e?

³¹Ȧŋsabu aŋ yi kəpa, bepi nə di-e, thalɔm nə mun-e, thalɔm nə yɔ tȧy o tai-e, yɔ ti nu bɛ salata aŋyiki ŋa Kuru.

³²Te nu sɔŋ kəthɛn o kəthɛn, pə yi ka aŋYuda-o, thalɔm aŋKrik-o, thalɔm ka aŋchɔch.

³³Mɔ mȧ minɛ i yɔ kȧmȧ pə bɔnɛ afəm bɛ ka tȧy o tȧy, ɔwa i thɛns hɛ ȧtȧ yi təbȧrnɛ ta ȧtȧ mi gboŋ-e, kɛrɛ ȧtȧ yi təbarnɛ ta agbȧthi, kȧmȧ aŋ kisi.