Read Ȧŋlemrȧnɛ Ȧfu 1 AŋKɔrenth 12 Bible Online

1 AŋKɔrenth 12 - Ȧŋlemrȧnɛ Ȧfu bible

1 AŋKɔrenth 12

¹Ɔwa, aŋwɔnt a mi, i yema kȧmȧ nə tȧrȧ ta ɛboya ya ɔYina məsəm.

²Fɔtha nə tȧrȧ kəpa nə la yi akafri, ɔwa a la yɛthəs nu yi ɛyɛt ɛpath ɛbobo, rə roŋ o roŋ a kera nu.

³Tiyȧŋ i yema kȧmȧ nə tȧrȧ kəpa wuni o wuni ɔwe fɔf ka aŋfɔsɔ ŋa ɔYina məsəm ɔ gbəli hɛ pa, Yisɔs, uraŋka wɔŋ; ɔwa wuni o wuni ɔ gbəli hɛ pa, Yisɔs ɔ yi ɔMarki, thambe ka ɔYina məsəm.

⁴Ɔwa ɛboya ɛgbanthɛ tətəp ɛ yi, kɛrɛ ɔYina məsəm ukin gbo,

⁵yi təbȧtho təgbanthɛ tətəp tə yi; kɛrɛ ɔMarki ukin gbo.

⁶Ɔwa kəyɔ məpanth kəgbanthɛ tətəp kə yi, kɛrɛ pə yi ɔKuru ukin ɔwe mə yɔna mȧtȧy bɛ ka afəm bɛ.

⁷Ɔwa a sɔŋ wuni o wuni ȧŋboya ŋa ɔYina məsəm ta salata ɔfinɔ wa afəm bɛ.

⁸Ka ukin ɔYina məsəm mɔ sɔŋ ȧrim ra kȧtemp; ka ulɔm ȧrim ra kȧtara tȧy kəwur ka ɔYina ɔkin kati;

⁹ka ulɔm a sɔŋ kəlanɛ kəwur ka ɔYina ɔkin, ɔwa ka ulɔm sɔ, afɔsɔ tə kəyeŋkəs aŋtuy asabu ŋa ɔYina ɔkin.

¹⁰Ka ulɔm a sɔŋ kəyɔ məyɔs məkabanɛ; ka ulɔm kənabi; ka ulɔm, kətara ɔgbaskɛ wa mȧtȧy ma ro Yina; ka ulɔm, tənt təgbanthɛ tətəp; ɔwa ka ulɔm-e a sɔŋ aŋfɔsɔ tə kətepa tənt.

¹¹Kɛrɛ ɔYina ɔkin kati ɔ yɔ mȧtȧy mati ame bɛ, kɔ yerəs wuni o wuni mɔ mɔ selɔ.

¹²Mɔ ȧŋdɛr ŋa wuni aŋ yi ŋin-e, kɛrɛ aŋ ba məlaŋktha məgbȧthi-e, ɔwa məlaŋktha mə mati məgbȧthi yi ȧŋdɛr ŋin; ya pə yi sɔ yi Kraystȧŋ.

¹³kotȧy-e pə yi sə yi aYuda-o, thalɔm aKrik-o, ta a pa ras pə yi sə yi atar-o, thalɔm awuth akom-o, a po baftays su bɛ ka ȧŋdɛr ŋin kətȧŋȧnɛ ka ɔYina ɔkin. Ɔwa ka ɔYina ɔkin sɔ-e a rusəm su.

¹⁴Ȧtesoma-e, ȧŋdɛr ŋa wuni aŋ yi hɛ gbo alaŋktha ŋin, aŋ yi məlaŋktha məgbȧthi.

¹⁵Bepi kȧtək kə tə pa, Ma i te yi kȧta-e, i yi hɛ ka ȧŋdɛr; di kati kə yi hɛ sɔ ka andɛr-i?

¹⁶Bepi aŋləns aŋ pa, Ma i te yi rafɔr-e, i yi hɛ ka ȧŋdɛr; di kati aŋ yi hɛ sɔ ka andɛr-i?

¹⁷Bepi ȧŋdɛr bɛ aŋ yi gbo rafɔr-e, reke katəl kə gbəli yi-a? Bepi ȧŋdɛr bɛ aŋ yi aŋləns-e, reke katəl abont kə gbəli yi-a?

¹⁸Kɛrɛ Kuru ɔ po bot malaŋktha reke o reke ka ȧŋdɛr, mɔ mɔ nəŋka ti ɔfinɔ.

¹⁹Bepi aŋ yi alaŋktha ŋin gbo-e, reke ȧŋdɛr maŋ yi-a?

²⁰Ɔwa tə tɛntɛnɛ malaŋktha mə yi thɔŋ məgbȧthi, kɛrɛ adɛr ŋin gbo.

²¹Tiyȧŋ rafɔr rə gbəli hɛ pa ka kȧta, I yema hɛ mu; thalɔm rȧbomp ka ȧtȧtək sɔ, I yema hɛ nu.

²²Sako, pə tha gbethi malaŋktha ma ȧŋdɛr ama sə nənk mɔ məyai-e, sə yema ma.

²³Ɔwa malaŋktha ma ȧŋdɛr ama sə nanɛ kəpa mə ba gbo ayiki athȧn-e, mȧ mə sə lonsər yi ayiki abana, kȧmȧ malaŋktha ma su məte thesa mə gbəli ba kəthesa.

²⁴Kɛrɛ malaŋktha ma su məfinɔ mə paŋ hɛ ti; Kuru ɔ po tɔsanɛ ȧŋdɛr rɔkin, ɔ sɔŋ ayiki abana ka ȧŋgbȧp aŋa paŋ ayiki,

²⁵kȧmȧ kəpɛnsanɛ kə te yi ka ȧŋdɛr, dɛ yi kȧmȧ ɔkin ɔ ba ananɛ ta ulɔm.

²⁶Ɔwa bepi alaŋktha ŋin aŋ nakasi-e, malaŋktha bɛ mə nakasi sɔ; thalɔm bepi a yikis alaŋktha ŋin-e, malaŋktha bɛ mə ba ti məbɔnɛ.

²⁷Naŋ nə po thɔŋ yi ȧŋdɛr ŋa Kraystȧŋ, ɔwa wuni o wuni ɔ yi alaŋktha ŋati.

²⁸Kuru ɔ po bot ti ka aŋgbanɛ ŋa aŋfəm ŋɔŋ kȧmȧ alɔm aŋ tə yi asom, kəbeka ŋarəŋ anȧbi, kəbeka asas akarmɔkɔ, kədarəŋ kati məyɔ məkabanɛ, ɛboya ya kəyeŋkəs, kəmar, agbəka, yi tənt tətəp.

²⁹Ŋaŋ bɛ ŋa yi asom-i? Ŋaŋ bɛ ŋa yi anabi-i? Ŋaŋ bɛ ŋa yi akarmɔkɔ-i? Ŋaŋ bɛ aŋ yɔ məyɔs məkabanɛ-i?

³⁰Ŋaŋ bɛ aŋ po ba ɛboya ya kəyeŋkəs-i? Ŋa bɛ aŋ fɔf tənt-i? Ŋa bɛ aŋ tepa-i?

³¹Kɛrɛ fela nu ɛboya ɛyɛ tha yi ɛfinɔ ɛlɔkɔ bɛ. Ɔwa i ti tɔri nu aroŋ ara tha thesa bɛ.