Read Ȧŋlemrȧnɛ Ȧfu 1 AŋKɔrenth 15 Bible Online

1 AŋKɔrenth 15 - Ȧŋlemrȧnɛ Ȧfu bible

1 AŋKɔrenth 15

¹Be pə thas ri awɔnt-e, i kala ɛmerȧ ɛ nu ka mapa məfinɔ ma Kuru ama i tɔri nu, ama naŋ sɔ nə po malanɛ, ro nə təmȧ sɔ.

²Ɔwa kətȧŋȧnɛ kati sɔ nə sɔthɔ kəkisi, bepi nə wop ma ɔbaksər, thambe nə po lanɛ kətiŋ.

³kotȧy-e i po laŋklia nu ka ɔtɔtɔkɔ ȧtȧ minɛ sɔ i po sɔthɔ, kəpa Krayst ɔ po fi ta ɛhakɛ ɛ su mɔ mə mȧgbal ma Kuru mə pa;

⁴ka a maŋk kɔ, ɔwa ka ȧŋrey aŋa bekȧ məsas ɔ kȧl yokanɛ ka rəfi mɔ mə mȧgbal ma Kuru mə pa.

⁵Ka Kifas ɔ nənk kɔ, ɔwa kədarəŋ kati antɔfɔt ŋarəŋ sɔ.

⁶Kədarəŋ kati ɔ tɔrinɛ ka awɔnt athasi tɛmɛ tamath ka kətəma win, ɔwa agbȧthi pay aŋ tiyȧ haŋ ka-ake, kɛrɛ alɔm aŋ po fi.

⁷Kədarəŋ kati ɔ tɔrinɛ ka Yeməs dɛ yi kədarəŋ kati ka aŋsom bɛ.

⁸Ɔwa ka kaləpsɔ thɔŋ bɛ ɔ tɔrinɛ sɔ do rɔmi, mɔ wuni ɔwe a kom ɔ gbathɔ.

⁹Minɛ-aŋ i tha yi ulɔl bɛ ka aŋsom, ɔwa i bek hɛ a tela mi usom pəkasifɛ i la sɔmpa aŋchɔch.

¹⁰Kɛrɛ asabu ŋa ȧŋboŋa ŋa Kuru i yi ȧtȧ i yi; yi ȧŋboŋa ŋɔŋ aŋa ɔ sɔŋ mi aŋ yi hɛ kətiŋ, ka ɔpeskianɛ wati i bora kəyɔ məpanth məgbathi pəthasi ŋa bɛ; kɛrɛ min thahɔ, ȧŋboŋa ŋa Kuru aŋa yi yi minɛ, ŋiəŋ.

¹¹Tiyȧŋ, bepi pə yi minɛŋ-o, thalɔm ŋaŋ-o, ya sə kawandi, ɔwa ya naŋ sɔ nə lanɛ.

¹²Ɔwa bepi a kawandi kəpa Krayst ɔ po yokanɛ kətɔŋ ka aŋfi-e, to alɔm kətɔŋ ka nu aŋ gbəli pa, kȧyokanɛ ka aŋfi kə yi hɛ-e?

¹³Bepi kȧyokanɛ ka aŋfi kə yi hɛ-e, Krayst gbeŋ ɔ tha yokanɛ hɛ ras.

¹⁴Ɔwa bepi Krayst ɔ tha yokanɛ hɛ ras-e, kakawandi kȧsu kə yi kətiŋ, dɛ yi kȧlanɛ ka nu kə yi kətiŋ sɔ.

¹⁵Yao, saŋ sə yi aseri ayem ŋa Kuru, pəkasifɛ sə po seri kəpa Kuru ɔ po yokas Krayst; ɔwe ɔ te yokas-e, bepi pə yi tɛntɛnɛ aŋfi aŋ yokanɛ hɛ.

¹⁶kotȧy-e bepi aŋfi aŋ yokanɛ hɛ-e, Krayst sɔ ɔ tha yokanɛ hɛ.

¹⁷Ɔwa bepi Krayst ɔ tha yokanɛ hɛ ka rafi-e, kȧlanɛ ka nu kə yi kətiŋ. Nə yi ras ka ɛhakɛ ɛ nu.

¹⁸Di kati ŋaŋ aŋa po fi ka Krayst aŋ poŋ thɔŋ dinɛ.

¹⁹Bepi ka ȧdȧru are gbo gbɛt sə ba kəgbak ȧmerȧ ka Kraystȧŋ, sə yi afəm anɔsinɛ pəthas afəm alɔm bɛ.

²⁰Kɛrɛ ka-ake Kraystȧŋ ɔ po kȧl yokanɛ ka rafi, kɔ yi mȧkomi mətɔtɔkɔ ka ŋaŋ aŋa dirȧ.

²¹kotȧy-e ma pə yi rəfi rə der kətȧŋȧnɛ ka wuni kəpet-e, ya pə yi sɔ, kətȧŋȧnɛ ka wuni kakal yokanɛ ka rafi kə der.

²²Mɔ-e, rokor ka Adȧm afəm bɛ aŋ fi, yaŋ sɔ rokor ka Krayst afəm bɛ aŋ tə sɔthɔ aŋesəm.

²³Kɛrɛ wuni o wuni ka kagbanth kɔŋ; Kraystȧŋ mȧkomi mətɔtɔkɔ; kədarəŋ kati ŋaŋ aŋa yi ka Krayst ka kȧder kɔŋ.

²⁴Kədarəŋ kati ɔthalnɛ ɔ bek, ɔwa ka ȧŋlɔkɔ ŋati ɔ tə lȧnki rȧbȧy ka Kuru ɔKas gbeŋ, ma ɔ po ləsər aŋbȧy bɛ, yi aŋgbəka bɛ, dɛ yi aŋfɔsɔ bɛ.

²⁵Pəkasifɛ ɔ ba tə kəgbəka haŋ ɔ po bot atheranɛ bɛ ka ȧtȧtək tɔŋ ratha.

²⁶Ɔtheranɛ uləpsɔ ɔwe ɔ ba kədim kɔnɔ yi rafi.

²⁷Ȧtesoma-e Kuru kɔnɔ bot mȧtȧy bɛ ka ȧtȧtək tɔŋ ratha. Kɛrɛ ma ɔ pa, Mȧtȧy bɛ mə yi kɔ roratha-e, pə yi gbəraŋ kəpa a lɔm hɛ kɔn ɔwe bot mȧtȧy bɛ roratha kɔŋ.

²⁸Ɔwa ma mȧtȧy bɛ mə po sanɛ do rɔŋɔŋ ka ȧŋlɔkɔ ŋati-e, ɔWan kɔn kɔnɔnɛ ɔ tə sanɛ ka kɔn ɔwe po bot mȧtȧy bɛ ratha kɔŋ, kȧmȧ pə gbəli yi Kuru ɔ yi tə tɛntɛnɛ ka ɔlasər wɔŋ bɛ.

²⁹Bepi pə yi hɛ ti-e, to ŋa mə aŋ yɔ aŋa a po baftays salata aŋfi-e?

³⁰kɔyɛŋ gbeŋ saŋ sɔ mə sə təmȧ ka agbɛkanɛ alɔkɔ o lɔkɔ-e?

³¹Tə tɛntɛnɛ awɔnt, i tɔri nu asɔbɛ kətȧŋȧnɛ ka kakolonɛ ȧke i ba do rɔnu rokor ka Krayst Yisɔs ɔMarki ka su-e, minɛ i fi ȧrey o rey.

³²Bepi-e, (ɔwa i fɔf mɔ mə matanɛ ma afəm a kəpet mə yi) i po tim ɛsɛm ɛbaŋ ro Ɛfisɔs, ko pə mar mi bepi aŋfi aŋ yokanɛ hɛ sɔ-e? Ɔwa bepi aŋfi aŋ yokanɛ hɛ sɔ-e, maŋ di nu, sə mun, kotȧy-e sə fi ninaŋ.

³³Te tɔnsnɛ; ayathki aləs ŋa mə ləsər asɔŋ afinɔ.

³⁴Thəmɛ nu ka mȧlompi, ɔwa te yɔ ahakɛ. Kotȧy-e alɔm aŋ tɛ hɛ Kurɔŋ bɛ. I fɔf ȧte tə kəlapəs nu.

³⁵Kɛrɛ wuni lɔm ɔ tə pa, To pə təp afəm mə aŋ kȧl yokanɛ ka rafi-e, ko adɛr ŋaŋ mə aŋ kara-e?

³⁶Mun pəŋk, mater ama mə sak mə lɔkɔ hɛ thambe mə mɔtha fi.

³⁷Ama mȧ mə sak-e, ȧŋdɛr aŋa ba kəyi thahɔ, kɛrɛ mə sak pəla pəwoma gbo thalɔm məter məlɔm.

³⁸Kɛrɛ Kuru ɔ sɔŋ pi adɛr mɔ mə pə thesanɛ kɔ, ɔwa ka məter ɔ məter ɔ sɔŋ ȧŋdɛr ŋati.

³⁹Mədɛr bɛ mə yi hɛ mɔlɔ min; madɛr ma afəm thɔkɔ, madɛr ma təsɛm thɔkɔ, madɛr ma ɛbȧmp thɔkɔ, rɛ yi madɛr ma ɛlop thɔkɔ.

⁴⁰Madɛr ma ȧkȧriyana mə yi, ɔwa madɛr ma ȧdȧru mə yi, ka anyiki ŋa ama ka ȧkȧriyana ŋə yi thɔkɔ, ɔwa aŋyiki ŋa ama ka ȧdȧru ŋə yi thɔkɔ.

⁴¹Ayiki ŋin aŋ yi ka aret, yi alɔm ka aŋof, dɛ yi alɔm ka atɔs; kotȧy-e kɔs kin kə gbaskɛ kɔs kəlɔm rə ayiki.

⁴²Ya pə yi sɔ ka kakal yokanɛ ka aŋfi. A sak ŋa rə kəthey, a kȧl yokas ŋa rə kəte thei.

⁴³A sak ŋa rə kəte ba ayiki, a kȧl yokas ŋa rə afɔsɔ.

⁴⁴A sak ŋa rə ȧŋdɛr ŋa wuni, a kȧl yokas ŋa ka rafi dɛ yi ȧŋdɛr ŋa ro Yina. Bepi ȧŋdɛr ŋa rawuni kəpet aŋ yi-e, ɔwa ȧŋdɛr ŋa ro Yina aŋ yi sɔ.

⁴⁵Tiyȧŋ a gbal ti kəpa, Ɔwuni utɔtɔkɔ Adȧmȧŋ a səki kɔ wuni ba ŋesəm; kɛrɛ ɔAdȧm uləpsɔ kɔnɔ yi ɔYina ɔwe sɔŋ aŋesəm.

⁴⁶Kɛrɛ ara yi rətɔtɔkɔ rə yi hɛ madɛr ma ro Yina-e, rə yi madɛr ma rawuni kəpet. Kədarəŋ kati madɛr ma ro Yina mə der.

⁴⁷Ɔwuni utɔtɔkɔ ɔ wur ka ȧŋthɔf, wuni ka kəbof wɔŋ; kɛrɛ ɔwe bekȧ ŋarəŋ ɔ yi ɔMarki ɔwe wur ro riyana.

⁴⁸Mɔ mə ɔwuni ka kəbof ɔ yi, yaŋ hɔ sɔ ŋaŋ aŋa yi ka kəbof aŋ yi. Ɔwa mɔ mə ɔwe ka riyana ɔ yi, yaŋ hɔ sɔ ŋaŋ aŋa yi ka riyana aŋ yi.

⁴⁹Mɔ mə saŋ sə po ba mȧbȧlȧnɛ ma ɔwuni ka kȧbof-e, mɔlɔ min sɔ sə tə ba mȧbȧlȧnɛ ma ɔwuni ka riyana.

⁵⁰Ɔwa awɔnt, i kanɛ nu ȧte kəpa mədɛr yi mətir ɛ gbəli hɛ sɔthɔ rȧbȧy ra Kuru; ta a pa ras ara ba kəthey rə te gbəli sɔthɔ ara mə te thei thȧnkȧŋ.

⁵¹Kəla, i tɔri nu agbundu. Saŋ bɛ tha aŋa ba kəfi, kɛrɛ a tə siŋkar su bɛ.

⁵²Lɛmp, ka kəgbȧləp win ma kathɛma kələpsɔ kə fɛŋ. Kotȧy-e a tə fɛŋ kȧthɛma, ka aŋfi aŋ tə kȧl yokanɛ ka rȧfi kəte they, ɔwa saŋ, a tə sinkar su.

⁵³Ȧtesoma-e ȧŋdɛr ȧthey aŋe aŋ ba kəwɔŋ kəte thei, ɔwa ȧŋdɛr afi aŋe aŋ ba kəwɔŋ kəte fi.

⁵⁴Ma ȧŋdɛr ȧthey aŋe aŋ po wɔŋ kəte they-e, dɛ yi ȧŋdɛr afi aŋe aŋ po wɔŋ kəte fi-e, ȧŋlɔkɔ ŋati mə tə yɔnɛ ȧtȧ a gbal kəpa, Kətham kə po sɔm rəfi.

⁵⁵O rȧfi, kia kȧtham kȧmu-a? O pa kəboma, aŋsos a mu ŋi-a?

⁵⁶Aŋsos ŋa rȧfi ŋȧ yi aŋhakɛ; ɔwa ȧŋfɔsɔ ŋa ahakɛ aŋ yi ȧŋthɔ.

⁵⁷Ta sə mɔmɔ Kuru ɔwe mə sɔŋ su kətham ka ɔMarki kȧsu Yisɔs Krayst.

⁵⁸Tiyȧŋ, aŋwɔnt a mi abɔthər, təmȧ nu ɔbaksər, te kala kəmuth, bȧsər ka mapanth ma ɔMarki lɔkɔ bɛ, pəkasifɛ sə tȧrȧ kəpa mapanth ma nu mə yi hɛ kətiŋ ka ɔMarki.