Read Ȧŋlemrȧnɛ Ȧfu 1 AŋKɔrenth 2 Bible Online

1 AŋKɔrenth 2 - Ȧŋlemrȧnɛ Ȧfu bible

1 AŋKɔrenth 2

¹Ɔwa minɛ awɔnt, ma i der ro rɔnu-e, i der hɛ rə kəfɔf kəfinɔ thalɔm rə kȧtemp ka rəwuni kəpet, tə kətɔri nu aŋgbundu ŋa Kuru.

²kotȧy-e i ba ti ka ȧŋmerȧ a mi tə kəte tȧrȧ tȧy o tȧy kətɔŋ ka nu thambe Krayst yi rafi rɔŋ ka ȧŋpənki.

³Ka i yi kətɔŋ ka nu rə mərant, yi rənes, yi rə kəyɛr kəlay.

⁴Kafɔf kȧmi ras dɛ yi kakawandi kȧmi kə yi hɛ rə sim təthɔnthɔ rə kətemp ka rəwuni kəpet-e, kɛrɛ rə katɔrinɛ ka ɔYina məsəm yi rə afɔsɔ,

⁵kȧmȧ kȧlanɛ ka nu kə te təmȧ ka kȧtemp ka rəwuni kəpet, kɛrɛ ka aŋfɔsɔ ŋa Kuru Məsaba.

⁶Kɛrɛ halisa, bepi sə yi kətɔŋ ka ŋaŋ aŋa yi abȧki mədɛr ka kəlanɛ-e, sə tə fɔf kətemp; kɛrɛ kȧtemp ka ȧdȧru are thahɔ, thalɔm kȧtemp ka aŋgbəka ŋa ȧdȧru are, aŋa mə ba kəthas.

⁷Kɛrɛ sə fɔf gbo kȧtemp ka aŋgbundu ŋa Kuru, pə yi mɔ kȧtemp kəmȧnknɛ ȧke Kuru ɔ botəs thəpaŋ yeŋka ȧdȧru rə təpɛ, ta salata aŋyiki a su.

⁸Ugbəka o gbəka ka ȧdȧru are ɔ tɛ hɛ ki, pəkasifɛ bepi aŋ po tȧrȧ ki aŋ gbəli hɛ naŋ tȧŋ ɔMarki ka ayiki ka akənt kəpəŋkinɛ.

⁹Kɛrɛ mɔ mȧgbal mə pa hɔ, Rafɔr rə te tha nənk, aŋləns aŋ te tha təl, Thalɔm ȧŋmerȧ ŋa wuni aŋ te tha nanɛ Mȧtȧy ama Kuru ɔ po bɛnɛnɛ ta ȧtȧ ŋaŋ aŋa bɔthər kɔ.

¹⁰Kɛrɛ Kuru ɔ po ŋaibi ma ro rɔsu ka ɔYina məsəm, kotȧy-e ɔYina məsəm ɔ thekthek mȧtȧy bɛ, yao, hali mȧtȧy məbɔlɔŋ ma Kuru.

¹¹kotȧy-e wuni reke ɔ tȧrȧ ɛnanɛ ya wuni, thambe aŋyina aŋa yi rokor ka ɔwuni kati-e? Ya pə yi sɔ wuni o wuni ɔ gbəli hɛ tȧrȧ ɛnanɛ ya Kuru thambe ɔYina məsəm ka Kuru.

¹²Ɔwa saŋ sə sɔthɔ hɛ aŋyina ŋa ȧdȧru kɛrɛ sə po sɔthɔ ɔYina ɔwe wur ka Kuru; kȧmȧ sə tȧrȧ mȧtȧy mǝgbathi ama Kuru ɔ boya su kəyaŋkaŋ.

¹³Ta mȧtȧy ame gbeŋ tə mə sə fɔf, pə yi hɛ rə ȧsim ȧte kȧtemp ka rəwuni kəpet mə tə thəksa-e, kɛrɛ rə ȧsim ȧte ɔYina məsəm ɔ thəksa, kȧmȧ sə yɛksi mȧtȧy ma ɔYina ka aŋa mə ba ɔYina məsəm.

¹⁴Kɛrɛ ɔwuni ɔwe te ba ɔYina ɔ gbəli hɛ sɔthɔ mȧtȧy ma ɔYina məsəm ka Kuru, ȧtesoma-e mə yi məpəŋk do rɔŋɔŋ; ɔwa ɔ gbəli hɛ tȧrȧ ma pəkasifɛ ɔYina məsəm kɔnɔ wɛski ma.

¹⁵Ɔwuni ka ɔYina məsəm kɔnɔ mə gbɛŋgbɛŋ mȧtȧy bɛ, kɛrɛ wuni o wuni ɔ gbəli hɛ gbɛŋgbɛŋ kɔ.

¹⁶Ɔwa a hɔ, Kanɛ tȧrȧ ȧŋmerȧ ŋa ɔMarki kȧmȧ ɔ thəksa kɔ-e? Kɛrɛ saŋ sə ba ȧŋmerȧ gbeŋ ŋa Krayst.