Read Ȧŋlemrȧnɛ Ȧfu 1 AŋKɔrenth 8 Bible Online

1 AŋKɔrenth 8 - Ȧŋlemrȧnɛ Ȧfu bible

1 AŋKɔrenth 8

¹Ɔwa ta salata ɛyɛt ɛdi ɛyɛ a fȧkȧ ɛrɔŋ-e, sə tȧrȧ kəpa pə sɔk su bɛ ta ti. Ɔwa kətara tȧy kə tə ŋata ȧmerȧ, kɛrɛ mȧbɔthər mə tə sɔŋ kətemp.

²Bepi wuni o wuni ɔ nanɛ ɔ tȧrȧ thɔŋ tȧy o tay-e, halisa ɔ tha tɛ hɛ ras mɔ mɔ mar tȧrȧ.

³Kɛrɛ bepi wuni ɔ bɔthər Kurɔŋ, kɔnɔ Kuru ɔ tȧrȧ.

⁴Tiyȧŋ salata kȧdi ɛyɛt ɛfȧkȧ ɛrɔŋ-e, sə tȧrȧ kəpa ɛyɛt ɛpath ɛ yi hɛ koko ka ȧdȧru, ɔwa kuru ulɔm ɔ yi hɛ thambe ukin gbo.

⁵kotȧy-e hali ɛ yi ɛyɛ a bont turu-e, pə yi rokɔm-o, thalɔm nɔru, (ma pə yi turu təgbȧthi dɛ yi amarki agbȧthi aŋ yi),

⁶kɛrɛ saŋ sə ba gbo ɔKuru ukin, pə yi mɔ ɔKas ɔwe təpi ɛyɛt bɛ, ɔwa saŋ sə ba aŋesəm kətȧŋȧnɛ kɔŋ. Dɛ yi ɔMarki kin gbo ɔ yi, Yisɔs Krayst kɔnɔŋ; ka asabu ŋɔŋ ɛyɛt bɛ ɛ yi, ɔwa ka ɔwe saŋ sɔ sə yi.

⁷Kɛrɛ afəm bɛ tha ba kȧtȧrȧ ake; kɛrɛ alɔm-e, mɔ mə matanɛ maŋ mə yi-e, aŋ di haŋ ka-ake mɔ ɛdi ɛ yi sathka; ka ɛmerȧ ɛ yaŋ-e, ma ɛ yi ɛyay-e, ɛ yifasnɛ.

⁸Ɛyɛt ɛdi ɛ mar hɛ su ka Kuru. Bepi sə di-e, pə mar hɛ su, ɔwa bepi sə di hɛ, sə paŋ hɛ ti tȧy.

⁹Botər nu ȧmerȧ ta thani rə roŋ o roŋ aŋsako a nu aŋe aŋ səkɛ rəka rəpənthbəla ka aŋa ba kəlanɛ kərant.

¹⁰Ȧtesoma-e bepi wuni ɔ nənk munɔ ɔwe tȧrȧ tȧy ma mə yirȧ tə kədi ka ȧŋseth ŋa ɛrɔŋ-e, bepi ɔ yi urant-e, pə gbəli hɛ yi ɔ tə minthasnɛ tə kədi sɔ ɛyɛt ya ɛsathka-i?

¹¹kotȧy-e ɔwuni urant ɔwe-e, pə yi mɔ ɔwɔnt ta ɔwe Krayst ɔ fi-e, a ləsər kɔ salata kȧtȧrȧ tȧy ka mu.

¹²Tiyȧŋ ma mə nə yɔ ahakɛ awunɔŋ keŋamnɛ aŋwɔnt-e, nə ləsər ɛmerȧ yaŋ ɛrȧnt, ɔwa nə yɔ sɔ ɔləs kəŋamnɛ Kraystȧŋ.

¹³Tiyȧŋ bepi ra rədi ra mǝ yɔ ɔwɔnt mi ɔ pənthbəla-e, i selɔ hɛ sɔ di ɔsɛm thəbana kȧmȧ i te yɔ ɔwɔnt mi ɔ pənthbəla.