Read Ȧŋlemrȧnɛ Ȧfu 2 AŋKɔrenth 10 Bible Online

2 AŋKɔrenth 10 - Ȧŋlemrȧnɛ Ȧfu bible

2 AŋKɔrenth 10

¹Ɔwa minɛ Pɔl, i nɛmthɛnɛ nu ka kathoranɛ yi mathɔfəl ma Krayst, minɛ ɔwe yi uthoranɛ ka kȧbəprȧnɛ ka nu, kɛrɛ ma i te bəpər i fɔfȧnɛ nu rə kəmintha.

²Kɛrɛ i nɛmthɛnɛ kȧmȧ nə te yɔ i tɔri ka kȧbəprȧnɛ ka nu kamintha kəbaki kati ȧke i nanɛ tə kətɔri afəm alɔm, aŋa nanɛ sə kɔth kətaŋ ka mayi ma rawuni kəpet.

³kotȧy-e, hali ma sə kɔth ka mayi ma rawuni kəpet-e, sə tim hɛ kətaŋ ka mayi ma madɛr;

⁴ȧtesoma-e ɛyɛt ɛtima ya katim kȧsu ɛ yi hɛ ɛya mȧdɛr, kɛrɛ ɛ ba afɔsɔ aninis kətȧŋȧnɛ ka Kuru tə kəyɛksi ɛbənkȧ.

⁵Sə yɛksi ɛbȧrki ɛləs yi tȧy o tȧy bɛ təŋȧtȧnɛ kəŋamnɛ kȧtȧrȧ ta Kuru, ɔwa sə kȧrȧ rə kɛndɛbira ananɛ o nanɛ tə kəsanɛ ɔKraystȧŋ,

⁶ma sə yi abɛnɛnɛ tə kəthalər kəgbəkanɛ bɛ, bepi kasanɛ tȧy ka nu kə po lasər.

⁷Pə yi nə kəli gbo mȧtȧy mə nə nəŋka rəfɔr-i? Bepi wuni o wuni ɔ pələnɛ kəpa ɔ yi wuni ka Kraist-e, ta ɔ kȧl nanɛ ȧte kəpa mɔ mə kɔn ɔ yi wuni ka Kraystȧŋ-e, yaŋ sɔ saŋ sə yi.

⁸kotȧy-e, hali i ti bȧr gbək ɛyonka salata aŋfɔsɔ aŋa ɔMarki ɔ po sɔŋ su-e, (tə kətəmsər nu, pə yi hɛ tə kəfak nu), i ba hɛ kəlapəs ti mən.

⁹Ta pə te yi mɔ i yema ninisnɛ nu dɛ yi ɛreka.

¹⁰Wuni lɔm ɔ tə pa, Ɛreka ya Pɔl ɛ yi ɛlel dɛ yi ɛbȧki mədɛr, kɛrɛ kȧbəpər kɔŋ kə yi kərant, dɛ yi kafɔf kɔŋ kə yi gbo kəyai.

¹¹Ta wuni wunɔŋ ɔ nanɛ ȧte, hɔ, mɔ mə sə yi ka ȧsim ka ɛreka ma sə te bəpər-e, yaŋ sə yi sɔ ka kayɔ ma sə bəpər.

¹²Ȧtesoma-e sə mintha hɛ lɔmnɛ thalɔm thunthnɛ alɔm aŋa mə kolonɛ, kotȧy-e aŋ ba hɛ kətemp maŋ thunthnɛ ukin ka ulɔm, dɛ yi aŋ lɔmnɛ ukin ka ulɔm.

¹³Kɛrɛ saŋ sə yema hɛ gbək ɛyonka pəthas anthuntha, pə yi mɔ-e, anthuntha ŋa magbas ama Kuru ɔ gbasa su tə kəbek do rɔnu.

¹⁴kotȧy-e sə thasəsnɛ hɛ pəthas anthuntha a su, pə yi mɔ sə tha la hɛ bek ro rɔnu, ȧtesoma-e saŋ sə yi antɔtɔkɔ tə kəbek do rɔnu yi mapa məfinɔ ma Kraystȧŋ.

¹⁵Sə kolonɛ hɛ pəthas magbas ma su, ka mapanth ma afəm alɔm; kɛrɛ kagbak ȧmerȧ kȧsu kə yi hɔ, ma kȧlanɛ ka nu kə bȧrnɛ-e, a tə bȧr səka kədi magbas ma su do rɔnu,

¹⁶kȧmȧ sə gbəli taməs ȧsim təfinɔ ta Kuru haŋ ka ɛgbap ɛyɛ yi rodarəŋ ka nu, kəte kolonɛ ka magbas ma wuni lɔm dɛ yi mȧtȧy ama ɔ poŋ thɔŋ bɛnɛnɛ.

¹⁷Kɛrɛ ɔwe mə kolonɛ ta ɔ kolonɛ ka ɔMarki.

¹⁸Ȧtesoma-e ɔwuni kolonɛ tha mə a malanɛ, kɛrɛ ɔwe ɔMarki ɔ kolo.