Read Ȧŋlemrȧnɛ Ȧfu 2 AŋKɔrenth 11 Bible Online

2 AŋKɔrenth 11 - Ȧŋlemrȧnɛ Ȧfu bible

2 AŋKɔrenth 11

¹I yema nə muyu mi ɔthan ma mə i re yɔ mɔ rəpəŋk; kɛrɛ mari nu, muyu.

²Kəbi i ba kətut ta ȧtȧ nu, pə yi mɔ-e katut ka Kuru, kotȧy-e i po fath nu ka Krayst mɔ a fathȧ ufanɛ ulompi ka uwos ukin.

³Kɛrɛ i soli ta thani mɔ mə ȧŋbok ɔ tɔns Ma Hawa ka masɔth mɔŋ-e, yaŋ sɔ ɛmerȧ ɛ nu ɛ tə yɛthȧ kəwur ka ɔfɔy tȧy dɛ yi ɔfethər ɔwe yi ka Kraystȧŋ.

⁴Bepi wuni ɔ der ɔ taməs uYisɔs ulɔm-e ɔwe saŋ sə te taməs-e, thalɔm bepi nə malanɛ uyina ulɔm-e ɔgbaskɛ ka ɔkin ɔwe nə po mȧlanɛ-e, ta a pa ras ȧkɛra kəgbaskɛ ȧke nə la hɛ təl-e, nə malanɛ kɔ lɛmp.

⁵Ko-e, i nanɛ hɛ kəpa i yi roratha ka aŋsom abana bana aŋe.

⁶Hali ma i yi uyay ka kəfɔf-e, i yi hɛ uyay ka kətara tȧy; sə poŋ ti tɔri gbafəth kətɔŋ ka nu bɛ rə roŋ o roŋ.

⁷Pə yi i po yɔ tȧy tələs ma i thoranɛ kȧmȧ a ŋata nu-i, ma i po taməs mapa məfinɔ ma Kuru kəte gbasi amɔlɔ-i?

⁸Pə yi mɔ-e i keyr ɛgbanɛ ya Yisɔs ɛlɔm, ka i gbasir ŋa ȧrȧm kȧmȧ i yɔna nu.

⁹Ma i yi do rɔnu dɛ yi kəpȧŋ kə wop mi-e, i yi hɛ kothe ka wuni o wuni, kotȧy-e aŋwɔnt aŋa wur ro Masidonia-e, ŋa sɔŋ mi bɛ ɛyɛ i paŋ. Ɔwa rə tȧy o tȧy i kasisnɛ.

¹⁰Mɔ mə tȧteŋ ta Krayst tə yi mi-e, wuni kəpet ɔ gbəli hɛ bɛnt mi kəgbək ɛyonka aŋe ka ȧŋgbȧp ŋa Akaya.

¹¹Kɔyɛŋ-a? Pəkasifɛ i bɔthər hɛ nu-i? Kuru ɔ tȧrȧ ti hɔ, i yɔ yi.

¹²Kɛrɛ i ti bȧsər ka mayɔ ame kȧmȧ i bɛs roratha ka ŋaŋ aŋa yema aŋfɛrɛ tə kəkolonɛ, kəpa aŋ kiyanɛ kayɔna ka ŋaŋ mɔlɔ min mɔ saŋ.

¹³Ȧtesoma-e afəm awunɔŋ ŋa yi asom ayem, ayɔ məpanth mətɔns tȧy, kaŋ yɔr mɔ mə aŋ yi aŋsom ŋa Kraystȧŋ.

¹⁴Ɔwa tȧy təkabanɛ thahɔ, kotȧy-e Sethani gbeŋ ɔ gbəli səkɛnɛ mɔ wurɔ ka kawalɛ.

¹⁵Tiyȧŋ tȧy təkabanɛ tha bepi aŋsom ŋɔŋ sɔ aŋ səkɛ mɔ mə aŋ yi aŋsom ŋa məlompi; ɔwa kaləpsɔ ka ŋaŋ kə tə yi mɔ mȧyɔs maŋ mə yi.

¹⁶I pa sɔ, Ta wuni o wuni ɔ te nanɛ mi upəŋk; kɛrɛ bepi nə yɔ yi-e, sua nu ɔwuni pəŋk ɔwe ɛləns ma mɔ kolonɛ sɔ ɔthan.

¹⁷Ȧtȧ i fɔf-e, i fɔf hɛ ti mɔ aŋyamari ŋa ɔMarki, i fɔf gbo mɔlɔ ma məgbati rə kəgbək ɛyonka aŋe.

¹⁸Ma afəm agbȧthi aŋ kolonɛ ka madɛr ma rawuni kəpet-e, minɛ sɔ i ti kolonɛ.

¹⁹Ȧtesoma-e ka ɔbɔli rəkɔm wa kȧtemp ka nu, nə gbəli muyu ȧŋpənk rə məbɔnɛ!

²⁰kotȧy-e nə muyu wuni bepi ɔ kera nu rə kɛndɛbira, bepi ɔ yɔ nu aharamu, bepi ɔ nɔy nu ɛyɛt ɛ nu, bepi ɔ ŋatanɛ, bepi ɔ gbantha nu ro der.

²¹I fɔf rə məlap kəpa, ka rayay ra mi i la hɛ yɔ mȧtȧy məwunɔŋ. Halisa ta tȧy o tȧy ȧtȧ wuni mɔ minthasnɛ, (i fɔf gbo mɔ upəŋk) minɛ sɔ i ti minthasnɛ.

²²Ŋa yi aHibru-i? Minɛ sɔ. Ŋa yi aIsrɛl-i? Minɛ sɔ. Ŋa yi awuth ŋa Ebraham-i? Ɔwa minɛ sɔ gbo.

²³Ŋa yi ɛbɔy ya Kraist-i? (I kȧl fɔf mɔ upəŋk) Min thasi ŋa; rə məpanth-e, ɔgbȧthi ɔlay; rə kəsȧp-e, pə fɔyɛ lɔm; ka ɛseth ya tərəŋka, katkat; ka mȧsibo ma təfi-e, ɔgbȧthi gbo.

²⁴Kətəma tamath aŋYuda aŋ sapa mi təsɛthɛ pə tiyȧ gbo win tə kəbek təgba tərəŋ.

²⁵Kətəma məsas-e a sapa mi tənt, a ləmər mi məsar win, məsas i loŋa ro baŋ, gbɛs pali i yi ka ɔbɔlɔŋ wa kȧbȧŋ;

²⁶i yi ka ɛbiyas alɔkɔ bɛ, ka mȧsibo ma mȧnt, ka mȧsibo ma amurthɛ, ka mȧsibo kəwur ka ȧŋbona a mi, ka mȧsibo kəwur ka aŋkafri, ka mȧsibo ka kȧpet, ka mȧsibo ro wula, ka mȧsibo ro baŋ, ka mȧsibo kətɔŋ ka awɔnt ayem;

²⁷ka kəthɔrɔnɛ, ka ɔbȧki ka ɛsɔnkɔ sɔnkɔ, ka ȧdor, ka rȧmun, ka kȧwop ɛsum ɔgbȧthi, ka ɔtȧnk yi ka rȧtiŋ.

²⁸Ɔwa pə thas mȧtȧy ame ama yi rokaŋ-e, mȧtȧy ri ama thiŋkər mi ȧrey o rey, pə yi mɔ-e kȧrȧnko ta ɛgbanɛ ya Yisɔs bɛ.

²⁹Kanɛ gbɔgbəthȧ-a, i te gbɔgbəthȧ-e? Wuni reke mə a yɔ ɔ pənthbəla-e, minɛ i te ba ti məbaŋ-e?

³⁰Kɛrɛ bepi i ba tə kəgbək ɛyonka-e, i ti kolonɛ ta mȧtȧy ama mə tɔri mȧyay mȧ mi.

³¹ƆKuru yi ɔKas ka ɔMarki kȧsu Yisɔs Krayst ɔwe yi uruba ta thȧnkȧŋ thəbana-e, ɔ tȧrȧ kəpa i fɔf hɛ rəyem.

³²Ro Damaskɔs, ɔgbəkȧ ratha ka Aretas ɔbȧy, ɔ bumər kȧpet kȧmȧ ɔ gbip mi;

³³ka a sɔnthɔsa mi ka afenk rə kəbəlay, ka a thora mi ka anthatha, ka i pamp mȧta mɔŋ.