Read Ȧŋlemrȧnɛ Ȧfu 2 AŋKɔrenth 13 Bible Online

2 AŋKɔrenth 13 - Ȧŋlemrȧnɛ Ȧfu bible

2 AŋKɔrenth 13

¹Kȧbeka məsas ki ake ma i der ro rɔnu. Rə maseri ma təsəŋ tərəŋ ama təsas-e, rə dim o dim mə rə bȧksər.

²I la maŋ ŋaŋ aŋa po yɔ ɛhakɛ yi aŋlɔm bɛ sɔ ka i kȧl maŋ ŋa ka-ake ka kate kȧmi bəpər mɔ mə i la yɔ ka kabəpər kȧmi ȧke bekȧ mȧrəŋ; kəpa ye, bepi i der sɔ i ba hɛ kətera ŋa;

³ma pə yi ti nə yema alomar kəpa Krayst ɔ fɔf kətaŋ do rɔmi, kɔn ɔwe te yi urant do rɔnu, kɛrɛ ɔ yi afɔsɔ aninis rokor ka nu.

⁴Hali ma a tȧŋ kɔ ka akənt kəpəŋkinɛ ka rəyai-e, ka-ake ɔ yi ukəli ka aŋfɔsɔ ŋa Kuru. Kotȧy-e saŋ sɔ sə yi ayay yi kɔn, kɛrɛ sə tə la rɛ yi aŋesəm yi kɔn do rɔnu ka aŋfɔsɔ ŋa Kuru.

⁵Gbɛŋgbɛnɛ nu kȧmȧ nə tȧrȧ bepi nə yi ka kȧlanɛ tə tɛntɛnɛ; thektheknɛ nu. Niaŋ nə tɛ hɛ kəpa Yisɔs Kraystȧŋ ɔ yi nu rokor-i? Thambe pə yi hɔ nə yi afəm athȧyoŋ.

⁶Kɛrɛ i gbak ȧmerȧ kəpa nə tȧrȧ hɔ saŋ sə yi hɛ athȧyoŋ.

⁷Ka sə ramnɛ Kuru kȧmȧ nə te yɔ tȧy o tȧy tələs; pə yi hɛ tə kətɔri hɔ sə yi afəm aŋa yi təteŋ, kɛrɛ kȧmȧ naŋ nə yɔ ȧtȧ yi təlompi, hali pə re bȧlȧnɛ mɔ saŋ sə yi hɛ təteŋ.

⁸kotȧy-e sə gbəli hɛ yɔ koko kəŋamnɛ tȧteŋ, kɛrɛ ta salata tȧteŋ.

⁹Ȧtesoma-e sə ba məbɔnɛ ma sə yi arȧnt, dɛ yi naŋ nə abȧki mədɛr; ta ȧte tə mə sə ramnɛ sɔ, pə yi mɔ ta kagbenthis ka kȧlanɛ ka nu.

¹⁰Ta ȧŋsabu aŋe i gbalər nu mȧtȧy ame ma i te tha bəpər-e, kȧmȧ pə yi ma i bəpər-e, i ba hɛ kəyi ɔbaki mədɛr ka aŋfɔsɔ aŋa ɔMarki ɔ sɔŋ mi tə kətəmər, pə yi hɛ tə kəfak.

¹¹Ka kaləpsɔ, awɔnt, maŋ dirȧ nu yɔ. Yi nu apons, yi nu abɛfəth, ba nu ȧmerȧ ŋin, yirȧ ka məthɔfəl; ɔwa ɔKuru ka məbɔthər dɛ yi məthɔfəl ɔ tə yi yi naŋ.

¹²Korianɛ yi kəmuməl kəsəm.

¹³Aŋsəm bɛ aŋ kori nu.

¹⁴Ta ȧŋboŋa ŋa ɔMarki Yisɔs Krayst, yi mabɔthər ma Kuru yi mamanɛ ma ɔYina məsəm mə yi yi naŋ bɛ. Amina.