Read Ȧŋlemrȧnɛ Ȧfu 2 AŋKɔrenth 5 Bible Online

2 AŋKɔrenth 5 - Ȧŋlemrȧnɛ Ȧfu bible

2 AŋKɔrenth 5

¹kotȧy-e sə tȧrȧ kəpa bepi ȧŋseth ŋa madɛr ma su aŋ yɛksɛ-e, sə ba alɔm kəwur ka Kuru Məsaba-e, aseth aŋa mə a te bɛmpa yi məta thȧnkȧŋ thəbana ro riyana.

²Ȧtesoma-e ka-ake sə laŋ tə tɛntɛnɛ, sə bosinɛ tə kəlopra yi madɛr ma su ama mə wur ro riyana;

³kȧmȧ pə yi ma mə a lonsər su-e, a ba hɛ kəbəp su atiŋ.

⁴kotȧy-e, tɛntɛnɛ saŋ ka ȧŋdɛr aŋe sə laŋ mɔ mə sə ba kothe rə ȧmerȧ. Pə yi hɛ kəpa sə yema kȧmȧ a te su lonsər, kɛrɛ kȧmȧ a bȧr lonsər su kȧmȧ aŋesəm thəbana aŋ dim aŋesəm ŋa ȧdȧru are.

⁵Ɔwa ɔwe bɛmpa su ta ȧtȧy ȧte gbeŋ, Kuru kɔnɔŋ, ɔwe po sɔŋ su sɔ masɛkɛ ma ɔYina.

⁶Tiyȧŋ sə ba kəbak kəbuth kəfinɔ lɔkɔ o lɔkɔ, ɔwa sə tȧrȧ kəpa ma sə yi ras ka ȧŋdɛr aŋe sə tha yi hɛ rɛ ɔMarki;

⁷ȧtesoma-e sə kɔth rə kəlanɛ, pə yi hɛ rə kəkəli.

⁸I kȧl pa, sə ba kəbak kəbuth, ɔwa sə tha yema wur ka ȧŋdɛr aŋe kȧmȧ sə gbəli yi ka kȧbəprȧnɛ ka ɔMarki.

⁹Tiyȧŋ sə timnɛ kȧmȧ pə yi hali sə bəpər thalɔm sə te bəpər, sə gbəli bɔnɛs kɔ.

¹⁰kotȧy-e saŋ nu bɛ sə ba tə kətəma rodi ka kawaŋ ka kərɔk ɛpa ka Kraystȧŋ, kȧmȧ wuni o wuni ɔ sɔthɔ ȧŋrȧm ŋa mȧyɔs ama ɔ po yɔ ka madɛr, bepi mə yi məfinɔ thalɔm mələs.

¹¹Tiyȧŋ ma sə tȧrȧ ɔninis wa ɔMariki-e, sə thɔnthɔ afəm. Ɔwa Kuru ɔ tȧrȧ ɛnanɛ ɛ su, ka i lanɛ kəpa naŋ nə tȧrȧ yi sɔ.

¹²Sə kolonɛ hɛ sɔ do rɔnu, sə sɔŋ nu gbo asabu ŋa kəkolo salata su, kȧmȧ nə ba ȧtȧ mə nə gbəli gbakia ŋaŋ aŋa kolo ka madɛr, beta ka ȧŋmerȧ.

¹³kotȧy-e bepi pə yi sə yɔ apənk, pə yi ta Kurɔŋ; thalɔm bepi sə yi atempi rə amera-e, pə yi ta kamar ka nu.

¹⁴Ȧtesoma-e, mabɔthər ma Krayst mə korakora su, pəkasifɛ sə thonkas yaŋ, kəpa bepi wuni kin ɔ fi ta afəm bɛ, pə bȧlȧnɛ mɔ ŋa bɛ aŋ po fi.

¹⁵Ɔwa ɔ po thɔŋ fi salata ŋa bɛ kȧmȧ aŋkəli aŋ te sɔ yi ta ɛyɛthɛ yaŋ, kɛrɛ ta kɔn ɔwe po fi ta ȧtȧ ŋaŋ, ɔwe yokanɛ sɔ.

¹⁶Tiyȧŋ kətəp ka-ake sə tɛ hɛ sɔ wuni o wuni mɔ wuni kəpet gbo; ɔwa hali ma sə la tȧrȧ Kraystȧŋ mɔ wuni kəpet-e, ka-ake sə tȧrȧ hɛ kɔ sɔ yaŋ.

¹⁷Ȧtesoma-e bepi wuni o wuni ɔ yi rokor ka Kraist-e, ɔ yi wuni fu. Mȧtȧy məkur mə po thas; kəla mȧtȧy bɛ mə po səkɛ məfu.

¹⁸Ɔwa mȧtȧy ame bɛ mə wur ka Kuru ɔwe yɔ su sə kȧl manɛ yi kɔn asabu ŋa Krayst, kɔ po sɔŋ su kəyɔna ka kakal manɛ kati;

¹⁹tə kəyi Kuru ɔ yi ka Kraystȧŋ tə kəyɔ kȧmȧ adaru rə kȧl manɛ yi kɔn kɔnɔnɛ. Ɔwa ɔ lɔm hɛ do rɔŋaŋ maləs maŋ; kɔ po maŋkər su ȧrim ra kȧkal manɛ.

²⁰Tiyȧŋ sə yi aŋsom ŋa Kraystȧŋ, pə yi mɔ Kuru ɔ nɛmthɛnɛ nu kətaŋ do rɔsu. Saŋ sə nɛmthɛnɛ nu salata Kraystȧŋ tə kəkal manɛ yi Kuru.

²¹kotȧy-e ta ȧtȧ su a səki kɔ ahakɛ, pə yi mɔ kɔn ɔwe te la tȧrȧ ahakɛ bɛ; kȧmȧ saŋ sə gbəli səkɛ mȧlompi ma Kuru rokor kɔŋ.