Read Ȧŋlemrȧnɛ Ȧfu 2 AŋKɔrenth 7 Bible Online

2 AŋKɔrenth 7 - Ȧŋlemrȧnɛ Ȧfu bible

2 AŋKɔrenth 7

¹Tiyȧŋ abɔthər, ma sə po ba ɛlahiri ɛye-e, maŋ gbəransnɛ nu kəwur ka məpulkɛ bɛ ma madɛr dɛ yi aŋyina, ɔwa sə gbenthis rəsəm ka ranes ra Kuru.

²Malanɛ su ka ɛmerȧ ɛ nu; sə tha yɔ hɛ wuni o wuni ɔləs, sə tha ləsər hɛ wuni o wuni, sə tha yɔ hɛ wuni o wuni kansoŋ.

³I fɔf hɛ ȧte tə kəŋap nu, kotȧy-e i po thɔŋ pa ti kəpa, nə yi ka ɛmerȧ ɛ su kȧmȧ sə fi naŋ dɛ yi sə kəli yi naŋ.

⁴I fɔfȧnɛ nu rə kəmintha kəbana, i kolonɛ ɔgbȧthi salata nu; i la rə kəbɛfəth kətɔŋ ka ɛsɔmpanɛ ɛ su bɛ, ɔwa i yasanɛ rɛ yi məbɔnɛ.

⁵Ȧtesoma-e, hali ma sə bek ro Masidonia-e, sə ba hɛ kəfothanɛ ka madɛr ma su, kɛrɛ sə bəp ɛsɔmpanɛ dɛr o dɛr. Ɛgbal ɛ yi rokaŋ, ɔwa rənes rə yi rokor.

⁶Kɛrɛ Kurɔŋ ɔwe mə bɛfəth ŋaŋ aŋa ba ɛmerȧ ɛlel-e, ɔ bɛfəth su ka kȧder ka Taytɔs.

⁷Pə yi hɛ ka kȧder kɔŋ son-e, pə yi sɔ ka kȧbɛfəth ȧke nə sɔŋ kɔ, ma ɔ tɔri su kabosinɛ ka nu, kȧbok ka nu, yi ɛmerȧ ɛ nu ɛyasyas ta ȧtȧ mi. Tiyȧŋ i bȧr sɔthɔ məbɔnɛ.

⁸kotȧy-e hali ȧŋreka a mi aŋ yɔ nu nə saŋ amɔl, i nimsa hɛ ti, (hali ma i la nimsa ti ka ɔtɔtɔkɔ), ȧtesoma-e i nənk kəpa ȧŋreka ŋati aŋ sɔŋ nu ɔnɔsinɛ kɛrɛ ta alɔkɔ agbut gbo.

⁹Ka-ake i ba məbɔnɛ, pə yi hɛ ma nə saŋ amɔl gbo-e, kɛrɛ pəkasifɛ nə saŋ amɔl kəkɔ ka kəthupi; ȧtesoma-e nə sɔŋ amɔl rə ɔnɔsinɛ wa antaŋ Kuru kəte ba ɔbaŋ dəbuth gbo kəwur do rɔsu rə tȧy o tȧy.

¹⁰kotȧy-e ɔnɔsinɛ ɔwe thesanɛ Kuru kɔnɔ mə kom kəthupi kəkɔ ka kəkisi kəte kȧrȧ kənimsa; kɛrɛ ɔnɔsinɛ wa ȧdȧru kɔnɔ mə kom rəfi.

¹¹Kotȧy-e kəli atȧy gbeŋ ȧtesom a yɔ nu nə saŋ ȧmɔl mɔ pə thesanɛ Kuru, ko ȧsoli abana ŋaŋ aŋ yi rokor ka nu-e, əŋko, ko agbȧkȧnɛ ŋaŋ-e, əŋko, ko məbaŋ maŋ-e, əŋko, ko kənesa kaŋ-e, əŋko, ko kəbosinɛ kaŋ-e, əŋko, ko kəyenkəs kaŋ-e, əŋko, ko akalɔ ŋaŋ-e.

¹²Tiyȧŋ hali ma i gbalər nu-e, pə yi hɛ salata ɔwe po yɔ ɔləs, ta a pa ras ɔwe po sɔmpanɛ asabu ŋa maləs mati, kɛrɛ pə yi kȧmȧ asoli aŋa saŋ sə ba ta ȧtȧ nu rodi ka Kuru-e, aŋ tɔrinɛ ro rɔnu.

¹³Tiyȧŋ sə sɔthɔ kəbɛfəth. Yao ka kȧbɛfəth kati sə yasanɛ sɔ rə məbɔnɛ məbana salata Taytɔs, ȧtesoma-e naŋ nə po thɔfsəl ȧŋmerȧ ŋɔŋ.

¹⁴kotȧy-e bepi i gbək ɛyonka ta salata nu do rɔŋɔŋ-e, i ba hɛ ti məlap; kȧbi ma mə sə po fɔf tȧy o tȧy ro rɔnu ka tȧteŋ, yaŋ sɔ a fir kagbək kȧsu ɛyonka rodi ka Taytɔs kə yi tȧteŋ.

¹⁵Ɔwa mabɔthər mɔŋ ta ȧtȧ nu mə bȧrnɛ gbo ma ɔ kȧl nanɛ ka kawop rim ka nu bɛ rə tȧy o tȧy, ma pə yi nə malanɛ kɔ rə kənesa yi kəyɛr.

¹⁶Tiyȧŋ pə bɔnɛ mi kotȧy-e i ba kəpələnɛ ȧŋgbȧp a nu rə tȧy o tȧy.