Read Ȧŋlemrȧnɛ Ȧfu 2 AŋKɔrenth 9 Bible Online

2 AŋKɔrenth 9 - Ȧŋlemrȧnɛ Ȧfu bible

2 AŋKɔrenth 9

¹Kɛrɛ ta ȧŋpa ŋa kəyɔna aŋsəm, i ba hɛ kəgbalər nu,

²ȧtesoma-e i tȧrȧ kabɛnɛnɛ ka nu, ɔwa di kati i kolonɛ ta ȧtȧ nu ka aŋfəm ŋa ro Masidonia, kəpa ŋa ro Akaya aŋ yi thɔŋ abɛnɛnɛ kȧbi ka dendis. Ɔwa mayasyas ma nu mə poŋ gboŋkthis afəm agbȧthi.

³Kɛrɛ i som awɔnt kȧmȧ kagbək kȧsu ɛyonka ta ȧtȧ nu kə te yi kətiŋ, kɛrɛ kȧmȧ pə gbəli yi mɔ mə i pa-e, nə yi thɔŋ abɛnɛnɛ;

⁴ta thani bepi aŋMasidoniya alɔm aŋ der yi minɛŋ, ɔwa aŋ bəp nu nə yi hɛ abɛnɛnɛ-e, saŋ (hali sə te pa niaŋ) sə tə ba məlap asabu ŋa kakolonɛ ake.

⁵Tiyȧŋ i nənk ti ɔfinɔ tə kəyɔ kȧmȧ aŋwɔnt aŋ təmȧ kədi kəkɔ ro rɔnu, kȧmȧ aŋ gbɛlɛŋ nu ta ȧŋboya ŋa məbɔthər tə tɛntɛnɛ, pə yi hɛ mɔ rəka ara a yamari.

⁶Ȧŋpa ŋi aŋe. Ɔwe mə sak pɛripɛri, kɔnɔ mə rɔk pɛri pɛri; ɔwe mə sak ɔgbȧthi, kɔnɔ mə rɔk ɔgbȧthi.

⁷Ta wuni o wuni ɔ sɔŋ mɔ mɔ nanɛ ka ȧŋmerȧ ŋɔŋ. Ta pə te yi rə kəsuma thalɔm rə kəfɔsar, kotȧy-e Kuru ɔ bɔthər wuni ɔwe mə sɔŋ rə məbɔnɛ.

⁸Ɔwa Kurɔŋ ɔ gbəli yɔ kȧmȧ aboŋa bɛ aŋ fui do rɔnu, kȧmȧ naŋ nə ba ɔbeki lɔkɔ o lɔkɔ ka tȧy o tȧy, kȧmȧ nə bȧrnɛ rə məyɔs məfinɔ bɛ.

⁹Mɔ mə a po gbal ti kəpa, Ɔ sak ɔbana, ɔ yer ka ȧŋmɔnɛ, Mȧlompi mɔŋ mə tə bȧkər thȧnkȧŋ thəbana.

¹⁰Ɔwa ɔwe mə sɔŋ məter ka ɔsak yi kəbo ta ɛwɔnth-e, kɔnɔ mə sɔŋ nu mater yi mȧbȧrnɛ mati tə kəsak. Ɔwa ɔ tə kȧl sɔŋ mȧkomi məbarnɛ ma mȧlompi ma nu.

¹¹Kaŋka a naŋfas nu rə tȧy o tȧy kəkɔ ka kəfosiri kəbana ȧke mə yɔ a muti Kuru mɔmɔ kətaŋ do rɔsu.

¹²kotȧy-e kəyerəs ȧŋboya aŋe kə lasər hɛ gbo kapaŋ ka aŋsəm kɛrɛ kə kȧl futhis kəsɔŋ Kuru mɔmɔ məlai.

¹³Ɔwa ma a gbɛlɛŋ nu asabu ŋa kayerəs ake, aŋ yikis Kuru ta kawop aŋgbithanɛ ka nu ka ȧsim təfinɔ ta Kraystȧŋ, rɛ yi ta kȧfosiri ka nu ta ȧtȧ ŋaŋ, dɛ yi ta afəm bɛ.

¹⁴Ɔwa ŋaŋ gbeŋ sɔ maŋ ramnɛ ta ȧtȧ nu, aŋ bosinɛ sɔ ta ȧtȧ nu salata ȧŋboŋa abana ŋa Kuru aŋa yi nu.

¹⁵Ta Kurɔŋ ɔ sɔthɔ mɔmɔ ta ȧŋboya ŋɔŋ atuy lɔməs.