Read Ȧŋlemrȧnɛ Ȧfu AŋKȧletia 1 Bible Online

AŋKȧletia 1 - Ȧŋlemrȧnɛ Ȧfu bible

AŋKȧletia 1

¹Pɔl usom, (pə yi hɛ ka mȧselɔ ma afəm, thalɔm kətȧŋȧnɛ ka wuni kəpet, kɛrɛ kətȧŋȧnɛ ka Yisɔs Krayst, yi Kuru ɔKas, ɔwe yokas kɔ ka rafi)

²dɛ yi aŋwɔnt bɛ aŋa yi yi minɛŋ, ka ɛchɔch ro Kaletia.

³Ta aboŋa aŋ yi nu dɛ yi məthɔfəl kəwur ka Kuru ɔKas yi ka ɔMarki kȧsu Yisɔs Kraystȧŋ,

⁴ɔwe sɔndnɛ ta ɛhakɛ ɛ su, kȧmȧ ɔ tafi su ka ȧdȧru rələs are, mɔ mə mȧselɔ ma Kuru yi ɔKas kȧsu mə yi;

⁵ɔwe ba ayiki thȧnkȧŋ thəbana. Amina.

⁶I kabanɛ ma nə yeŋk gbapɛ ɔwe muti nu ka ȧŋboŋa ŋa Krayst tə kəlafthɛ ka kɛra kəlɔm.

⁷kotȧy-e, kɛra kəfinɔ kəlɔm kə yi hɛ, kɛrɛ afəm alɔm aŋa sɔmpa nu aŋ yema siŋkar ȧkɛra kəfinɔ ka Krayst.

⁸Kɛrɛ hali saŋ, thalɔm wurɔ kəwur ro riana-e, ɔ tɔri nu kɛra ȧke yi kəgbaskɛ kəwur ka ȧke sə po tɔri nu-e, ta ɔ yi uraŋka.

⁹Mɔ mə sə la pa-e, ya i pa sɔ ka-ake, Bepi wuni o wuni ɔ tɔri nu kɛra o kɛra pəthas ȧke nə po malanɛ, ta ɔ yi uraŋka.

¹⁰kotȧy-e minɛ i thɛns mamari ma afəm thalɔm Kuru-i? Thalɔm i mɛm tə kəbɔnɛs afəm-i? Bepi minɛ i thesanɛ gbo afəm-e, i yi hɛ ȧŋbɔy ŋa Krayst.

¹¹Kɛrɛ i ba kəkanɛ nu, awɔnt, kəpa ȧkɛra kəfinɔ ka Kuru ȧke i la tɔri nu kə yi hɛ ȧke wuni kəpet.

¹²Ȧtesoma-e i sɔthɔ hɛ ki kəwur ka wuni, thalɔm wuni thahɔ thəksa mi ki-e, kɛrɛ Yisɔs Krayst kɔnɔ ŋaibi ki do rɔmi.

¹³kotȧy-e nə po təl ta mayi ma mi thəpaŋ ka andina ŋa aŋYuda, kəpa pəthas alɔm bɛ i sɔmpar aŋfəm ŋa Kuru tə kələsər ŋa;

¹⁴ɔwa i bȧr sɔthɔ kətara ka andina ŋa aŋYuda pəthas aŋkos mi ka ȧŋbona a mi, ma i yi uyasyas ɔthasər salata tapa təkur ta aŋkas a mi.

¹⁵Kɛrɛ ma pə thesanɛ Kuru ɔwe thith mi yeŋka a kom mi, dɛ yi ɔ muti mi ka ȧŋboŋa ŋɔŋ-e,

¹⁶tə kəŋaibi ɔWan kɔŋ do rɔmi kȧmȧ i kawandi kɔ kətɔŋ ka təbona təlɔm-e, ka ɔlɛmp wati i kɔ hɛ tə kəfɔf ka wuni kəpet,

¹⁷ta a pa ras i kɔ ro Yerusalɛm ka ŋaŋ aŋa mɔtha mi yi asom; kɛrɛ i kɔnɛ poŋ ro Arebiya, ka i kȧlanɛ sɔ ro Damaskɔs.

¹⁸Kədarəŋ ka təren təsas-e, i kɔ ro Yerusalɛm tə kətɔri Pita, ka i yi ri rɔŋɔŋ mərey tɔfɔt tamath.

¹⁹Kɛrɛ i nənk hɛ aŋsom alɔm, thambe Yeməs ɔwɔnt ka ɔMarki.

²⁰Ma i tɔri nu mȧtȧy ame-e, i gbalər nu tȧteŋ rodi ka Kuru, i fɔf hɛ rəyem.

²¹Kədarəŋ kati i kɔ ro Siria yi ro Sailisia.

²²Kɛrɛ ɛgbanɛ ya Krayst ro Yudia aŋ tɛ hɛ mi rə der.

²³kaŋ təl gbo kəpa, Kɔn ɔwe la sɔmpar su ka-ake ɔ kawandi kȧlanɛ kin ȧke ɔ la ləsər.

²⁴kaŋ thɔkəs Kuru salata mi.