Read Ȧŋlemrȧnɛ Ȧfu AŋKȧletia 3 Bible Online

AŋKȧletia 3 - Ȧŋlemrȧnɛ Ȧfu bible

AŋKȧletia 3

¹O naŋ aKaletia aŋa te ba kətemp kəbeki-e, kanɛ serəs nu-e kȧmȧ nə te wop tȧteŋ, kədarəŋ ka a po tɔri nu gbafəth kəpa a po tȧŋ Krayst ka akənt kəpəŋkinɛ-e?

²Atȧy tin ȧte gbo tȧ i yema tȧrȧ kəwur do rɔnu, Naŋ nə po sɔthɔ ɔYina ka mȧyɔs ma anthɔ-i, thalɔm ka aŋkanɛ ŋa kəlanɛ-i?

³Nə yi ȧte ba kətemp haŋ-i? Ma nə təp ka ɔYina nə gbəli yi agbenthis kətaŋ ka mȧyɔs ma mȧdɛr-i?

⁴Nə po sɔmpanɛ mȧtȧy məgbȧthi kətiŋ gbo-i, bepi pə yi kətiŋ tə tɛntɛnɛ-i?

⁵Kɔn ɔwe sɔŋ nu ɔYina məsəm, dɛ yi ɔwe yɔ məyɔs məkabanɛ kətɔŋ ka nu-e, ɔ yɔ ti ba ka mȧyɔs ma anthɔ-i, thalɔm ka mathəksa ma kȧlanɛ-i?

⁶Hali mɔ Ebraham ɔ lanɛ Kuru, ka a lɔm ti ro rɔŋɔŋ mɔ məlompi.

⁷Tiyȧŋ tȧrȧ nu kəpa ŋaŋ aŋa ba kəlanɛ aŋ yi aŋwuth ŋa Ebraham.

⁸Te ba ti ka mȧgbal məsəm, ma mə mɔtha nənk kəpa Kuru ɔ tə sɔŋ məmari ka tȧbona təlɔm asabu ŋa kəlanɛ, ɔ kawandi ȧkɛra kəfinɔ ka Kuru thəpaŋ ka Ebraham, kɔ pa, Kətaŋ do rɔmu təbona bɛ tə tə sɔthɔ aruba.

⁹Tiyȧŋ ŋaŋ aŋa ba kəlanɛ-e, aŋ sɔthɔ aruba yi Ebraham ubɔthi lanɛ.

¹⁰Ɔwa aŋfəm aŋa pələnɛ ka mȧyɔs ma ȧŋthɔ aŋ yi ratha ka ȧranka; kotȧy-e a po gbal kəpa, Wuni o wuni ɔwe te kɔ rodi kəyɔ mȧtȧy bɛ ama a po gbal ka ȧkȧfȧ ka ȧŋthɔ tə kəyɔ ma-e, ɔ yi uraŋka.

¹¹Ka-ake sə nənk gbəraŋ kəpa wuni o wuni ɔ sɔthɔ hɛ məmari kəwur ka mȧyɔs ma ȧŋthɔ ka kakəli ka Kuru, kotȧy-e, Aŋlompi aŋ tə ŋesəm kətȧŋȧnɛ ka kȧlanɛ.

¹²Ȧŋthɔ aŋ ba hɛ ȧgbȧp rɛ kəlanɛ; kɛrɛ ɔwe mə yɔ mȧyɔs ɔ tə yi ukəli kətȧŋȧnɛ ka mȧyɔs mati.

¹³Krayst ɔ po bani su ka ȧŋranka ŋa ȧŋthɔ, ma ɔ po səkɛ uranka ta ȧtȧ su; kotȧy-e a po gbal kəpa, Wuni o wuni ɔwe a gbak ka ŋənt-e, uraŋka wɔŋ;

¹⁴kȧmȧ aŋruba ŋa Ebraham aŋ gbəli der ka tȧbona təlɔm kətȧŋȧnɛ ka Yisɔs Kraystȧŋ; kȧmȧ sə sɔthɔ aŋlahiri ŋa ɔYina məsəm asabu ŋa kȧlanɛ.

¹⁵Awɔnt, i sɔŋ məbalanɛ kəwur ka rawuni kəpet. Wuni o wuni ɔ gbəli hɛ bȧr thalɔm ɔ gbəŋki hali ka alemranɛ ŋa wuni kəpet bepi a poŋ gbo bȧksər ŋi.

¹⁶Ɔwa a sɔŋ ɛlahiri ka Ebraham yi ȧŋter ŋɔŋ. Ɔ pa hɛ, Ka mater, mɔ mə yi məgbathi; kɛrɛ, Ka ȧŋter a mu, ɔwe yi Kraystȧŋ.

¹⁷Ka i pa ȧte, aŋlemranɛ aŋa Kuru ɔ bȧksər thəpaŋ-e, ȧŋthɔ aŋa wɔŋ kədarəŋ ka təren tɛmɛ tanlɛ kəgba tɔfɔt aŋ ləsər hɛ ŋi tə kəyɔ aŋlahiri aŋ tiyȧ fu.

¹⁸kotȧy-e bepi kasɔthɔ akɛŋ kə yi asabu ŋa anthɔ-e, kə ba hɛ sɔ kəyi asabu ŋa aŋlahiri. Kɛrɛ Kuru ɔ po sɔŋ ŋi ka Ebraham rə alahiri,

¹⁹ȧtesoma-e, ta kɔ-e a sɔŋ anthɔ-a? A wɔŋȧ ŋi ta salata ɛhakɛ, haŋ ȧŋter aŋ der ta ɔwɔŋ a sɔŋ aŋlahiri; ɔwa aŋmȧleka ŋa təmsər ŋi ka kȧta ka ukasa.

²⁰Ɔwa, ukasa ɔ gbəli hɛ yi ukasa ka wuni kin gbo, kɛrɛ Kuru ɔ yi kin.

²¹Di kati-e, ȧŋthɔ aŋ tim ɛlahiri ya Kuru-i? Saki ti; kotȧy-e bepi a poŋ sɔŋ athɔ aŋa gbəli kəlis-e, tə tɛntɛnɛ məlompi mə tə yi ka ȧŋthɔ.

²²Kɛrɛ mȧgbal məsəm mə tɔri kəpa afəm bɛ aŋ yi ka aŋfɔsɔ ŋa ahakɛ, kȧmȧ ŋaŋ aŋa lanɛ aŋ gbəli sɔthɔ aŋlahiri kətȧŋȧnɛ ka kȧlanɛ ka Yisɔs Krayst.

²³Kɛrɛ yeŋka kəlanɛ kə bek-e, a wop su gbaŋ roratha ka ȧŋthɔ, a bɛnɛ su salata kȧlanɛ ȧke ba tə kəder kədarəŋ kati.

²⁴Tiyȧŋ ȧŋthɔ aŋ yi ɔkarmɔkɔ kȧsu tə kəkara su ka Kraystȧŋ, kȧmȧ sə sɔthɔ məmari asabu ŋa kəlanɛ.

²⁵Kɛrɛ ka-ake kȧbi kəlanɛ kə poŋ thɔŋ bek-e, sə yi hɛ sɔ roratha ka ukarmɔkɔ.

²⁶Ȧtesoma-e naŋ bɛ nə yi awuth ŋa Kuru, asabu ŋa kȧlanɛ ka Yisɔs Kraystȧŋ.

²⁷kotȧy-e naŋ aŋa a po baftays ka Krayst nə po wɔŋ Kraystȧŋ.

²⁸UYuda ɔ yi hɛ, uKrik ɔ yi hɛ, utar thalɔm uwaŋkom ɔ yi hɛ, ta a pa ras wan duni yi wuni bom aŋ yi hɛ; kotȧy-e naŋ bɛ nə yi ukin rokor ka Krayst Yisɔsȧŋ.

²⁹Ɔwa bepi Krayst ɔ ba nu-e, nə yi aŋwuth ŋa Ebraham, yi asɔthɔ kɛŋ kətȧŋȧnɛ ka aŋlahiri.