Read Ȧŋlemrȧnɛ Ȧfu AŋKȧletia 4 Bible Online

AŋKȧletia 4 - Ȧŋlemrȧnɛ Ȧfu bible

AŋKȧletia 4

¹Kɛrɛ i pa, fani kɔn ɔwe mə sɔthɔ akɛŋ ɔ yi ras wath-e, ɔ yi hɛ ɔgbaskɛ kəwur ka utar, hali ɔ yi ɔmarki ka kafus bɛ;

²kɛrɛ ɔ yi ratha ka akarmɔkɔ yi ɛbɔy haŋ ka ȧŋlɔkɔ aŋa ɔkas kɔŋ ɔ bot.

³Ya pə yi sɔ saŋ, ma sə yi afɛth sə yi atar ratha ka matanɛ ma ȧdȧru,

⁴kɛrɛ ma ɔlasər wa ȧŋlɔkɔ aŋ poŋ bek-e, Kuru ɔ som ɔWan kɔŋ ɔwe wuni bom ɔ kom-e, ɔwa a kȧl kom kɔ ka ȧŋthɔ ratha-e,

⁵kȧmȧ ɔ bani ŋaŋ aŋa yi ratha ka ȧŋthɔ kȧmȧ sə gbəli sɔthɔ matəma gbeŋ ma awuth.

⁶Ɔwa ma pə yi nə yi awuth-e, Kuru ɔ som ɔYina ka ɔWan kɔŋ ka ɛmerȧ ɛ nu, kɔ pa, Aba ɔKas.

⁷Tiyȧŋ mə yi hɛ sɔ utar, mə yi uwan; ɔwa bepi mə yi uwan-e, mə yi usɔthɔ kɛŋ ka Kuru asabu ŋa Krayst.

⁸Kɛrɛ ka ȧŋlɔkɔ ma nə te tha tȧrȧ Kuru-e, nə la yi atar ka ŋaŋ aŋa te yi turu gbeŋ-e,

⁹kɛrɛ ka-ake ma nə po der kətara Kuru-e, (thalɔm pə tha gbethi Kuru ɔ tȧrȧ nu-e), to pə som nə kȧl fəlɛ ka matanɛ mərant məyai mɔlɔ ma nə fela sɔ kəsəkɛ atar ŋa matanɛ mati-e?

¹⁰Nə wop mərey, ɛyof, ɛlɔkɔ, dɛ yi təren.

¹¹I ba asoli ta ȧtȧ nu, ta thani i poŋ yɔ məpanth ta ȧtȧ nu kətiŋ.

¹²Awɔnt, i nɛmthɛnɛ nu, yi nu mɔ minɛŋ ȧtesoma-e i yi mɔ naŋ nə yi; nə la hɛ yɔ mi ɔləs hali.

¹³Kɛrɛ nə tȧrȧ ka ɔtɔtɔkɔ i kawandi nu mapa məfinɔ ma Kuru rə asɔmpanɛ ka ȧŋdɛr a mi.

¹⁴Kɛrɛ hali ma ȧŋsɔmpanɛŋ aŋe ka ȧŋdɛr a mi aŋ sɔŋ nu akɔnthɔfəli-e, nə say say hɛ ŋi, ɔwa nə pɛnsa hɛ mi; kɛrɛ nə malanɛ mi mɔ wurɔ ka Kuru, hali mɔ Krayst Yisɔs gbeŋ.

¹⁵Ko po yɔnɛ ka ɛmerȧ ya ɛruba ɛ nu-a? kotȧy-e i seri ta ȧtȧ nu kəpa, bepi pə gbəli naŋ yi ti ɔfɔy tay-e, nə tə kothi naŋ ɛfɔr ɛ nu gbeŋ tə kəsɔŋ mi.

¹⁶Ɔwa i po səkɛ utheranɛ ka nu pəkasifɛ i tɔri nu tateŋ-i?

¹⁷Afəm aŋe aŋ thɛns nu, kɛrɛ ta ɔfinɔ thahɔ; aŋ fela tə kəwura nu kȧmȧ nə kȧl tȧŋ ŋa son.

¹⁸Pə yi ɔfinɔ bepi afəm aŋ thɛns nu yasyas salata tȧy təfinɔ lɔkɔ o lɔkɔ, pə yi hɛ gbo ma minɛŋ i yi do rɔnu.

¹⁹Aŋfɛth a mi, pə yi mɔ i yi rə akənt tə kəkom ta ȧtȧ nu haŋ Krayst ɔ yi rokor ka nu.

²⁰Yao i fela tə kəyi do rɔnu ka-ake, dɛ yi tə kəsiŋkar ȧrim ra mi; kotȧy-e pə kɛtha mi ta ȧtȧ nu.

²¹Kanɛ mi naŋ aŋa fela tə kəyi ratha ka ȧŋthɔ sɔ-e, nə təl hɛ anthɔ-i?

²²kotȧy-e a po gbal kəpa, Ebraham ɔ ba awuth aruni ŋarəŋ. Ɔkin ɔ yi ka ɔtar ubɛra, ɔwa ɔkin ɔ yi ka ɔwaŋkom ubɛra.

²³Ɔwe ɔ kom ka ɔtar ubɛra a kom kɔ ka matanɛ ma madɛr ma rawuni kəpet, kɛrɛ kɔn ɔwe ɔwaŋkom ubɛra ɔ kom-e, a kom kɔ kətȧŋȧnɛ ka aŋlahiri.

²⁴Mȧtȧy ame bɛ mə yi məbalanɛ, kotȧy-e afəm abom aŋe aŋ təmȧ mɔ ɛlemranɛ yɛrəŋ; ŋin a təp ka kateŋ ka Saynay, ɔwa a kom awuth ta rətar, kɔnɔ yi Hɛkar.

²⁵Ɔwa Hɛkar ɔwe ɔ yi mɔ kateŋ ka Saynay ro Arebiya, kɔ bȧlȧnɛ Yerusalɛm ȧke yi ka-ake ȧke yi ka ratar yi aŋwuth ŋɔŋ.

²⁶Kɛrɛ Yerusalɛm ɔwe yi rokɔm ɔ yi kəyankaŋ, ɔwa kɔnɔ yi ɔkara kȧsu bɛ.

²⁷kotȧy-e a gbal kəpa, Sel məbɔnɛ munɔ ukoŋfereŋ ma mə te kom, Sel məbɔnɛ munɔ ɔwe te təlnɛ ɔbaŋ wa kəkom, Pəkasifɛ ɔkoŋfereŋ ɔ ba awuth pəthasi kɔn ɔwe ba uwos.

²⁸Ɔwa awɔnt, saŋ sə yi aŋwuth ŋa aŋlahiri mɔ Aysak ɔ yi.

²⁹Mɔ mə pə yi ka ȧŋlɔkɔ ŋati kəpa, kɔn ɔwe a kom kətȧŋȧnɛ ka madɛr ma rawuni kəpet ɔ sɔmpa kɔn ɔwe a kom kətȧŋȧnɛ ka ɔYina, ya pə yi sɔ ka-ake.

³⁰Kɛrɛ to mȧgbal məsəm mə pa-i? Wurɔ ɔtar ubɛra yi ɔwan kɔŋ; kotȧy-e ɔwath runi ka ɔtar ubɛra ɔ ba hɛ kəsɔthɔ kɛŋ yi ɔwath runi ka ɔwaŋkom ubɛra.

³¹Tiyȧŋ awɔnt, saŋ sə yi hɛ awuth ŋa ɔtar ubɛra-e, kɛrɛ ka ɔwaŋkom ubɛra.