Read Ȧŋlemrȧnɛ Ȧfu AŋKȧletia 5 Bible Online

AŋKȧletia 5 - Ȧŋlemrȧnɛ Ȧfu bible

AŋKȧletia 5

¹Təmȧ nu kəŋkəŋ ka rȧwankom rəfinɔ ara Krayst ɔ sɔŋ su; te sɔ sɔndnɛ ka kȧronke ka rȧtar.

²Ɔwa minɛ Pɔl, i pa do rɔnu, bepi nə wop kəbirons-e, Krayst ɔ ba hɛ kəmunaŋfas nu koko.

³kotȧy-e i kȧl seri ti ka wuni o wuni ɔwe mə wop kəbirons kəpa ɔ ba tə kəwop ȧŋthɔ bɛ.

⁴Krayst ɔ yi hɛ koko do rɔnu bepi nə sɔthɔ məmari ka ȧŋthɔ; nə po fumpɔ kəwur ka aboŋa.

⁵kotȧy-e saŋ, kətȧŋȧnɛ ka ɔYina-e, sə kar kagbak ȧmerȧ ka mȧlompi ama mə der ka kəlanɛ.

⁶kotȧy-e rokor ka Yisɔs Krayst kȧbirons thalɔm kəte birons kə ba hɛ tȧy o tȧy, thambe kəlanɛ ȧke mə yɔ məpanth kətȧŋȧnɛ ka məbɔthər.

⁷Nə la gbukɛ asɔbɛ-e, kanɛ bɛnt nu kȧmȧ nə te wop tateŋ-e?

⁸Kəthəksa kəwunɔŋ kə wur hɛ ka ɔwe muti nu.

⁹Ɛgbith ɛthan ɛ fukəs kaboth bɛ.

¹⁰I lanɛ ka ɔMarki kəpa nə tə yi rim din yi minɛŋ. Kɛrɛ ɔwe mə sɔmpa nu ɔ tə sara kathoŋkas kɔŋ, pə yi wuni o wuni.

¹¹Minɛŋ awɔnt, bepi i kawandi ras kȧbirons-e, to pə som a kȧl sɔmpa mi-e? Bepi pə yi yaŋ-e, ȧtȧy təpənthbəla ta akənt kəpəŋkinɛ tə poŋ.

¹²I fela kaŋka ŋaŋ aŋa yɛthəs nu aŋ gbəkanɛ kətɔŋ ka nu.

¹³Ȧtesoma-e, awɔnt, a po tela nu rə rəwaŋkom, kɛrɛ te gbo kianɛ rȧwankom ra nu mɔ afɛrɛ tə kəlasər mafela ma madɛr, kɛrɛ kətȧŋȧnɛ ka məbɔthər-e, yɔnanɛ ukin dɛ yi ulɔm.

¹⁴kotȧy-e ɔlasər wa ȧŋthɔ bɛ ɔ yi ka ȧŋpa ŋin aŋe; Bɔthər ɔfatanɛ ka mu mɔ mȧ mə bɔthərnɛ.

¹⁵Bepi nə ŋansanɛ dɛ yi nə sɔməthanɛ-e, bumnɛ nu ȧmerȧ kȧmȧ nə te dimsanɛ.

¹⁶Ɔwa i pa hɔ, Kɔth nu ka ɔYina kȧmȧ nə te lasər ɛfela ɛləs ya madɛr.

¹⁷Ȧtesoma-e madɛr mə tim ɔYina, dɛ yi ɔYina ɔ tim madɛr; pəkasifɛ aŋ manɛ hɛ hali; tiyȧŋ nə gbəli hɛ yɔ ȧtȧ nə yema yɔ.

¹⁸Kɛrɛ bepi ɔYina ɔ kɔtha nu-e, nə yi hɛ sɔ ka ȧŋthɔ ratha.

¹⁹Ɔwa mȧyɔs ma madɛr mə tɔrinɛ gbafəth, mə yi; kȧrəp, kȧtayanɛ, kȧyifȧsnɛ, ɛfela ɛləs,

²⁰kȧramnɛ ɛyɛt ɛbumərnɛ, rȧmɛn, mȧgbɛŋanɛ, ɛputhanɛ, kȧtut, mȧbaŋ, kȧgbal, ɛpeskɛnɛ, mȧthəksa mȧ rȧyem,

²¹ɛmilɛ, kȧdif, kȧtis, kȧbɔthər ɛmet dɛ yi mȧtȧy məwunɔŋ; ta ȧte i kȧl maŋ nu, mɔ mə i la maŋ nu thɔŋ, kəpa afəm aŋa mə yɔ mȧtȧy mati ame aŋ gbəli hɛ sɔthɔ rȧbȧy ra Kuru.

²²Kɛrɛ mȧkomi ma ɔYina mə yi, məbɔthər, məbɔnɛ, məthɔfəl, kəmuyu, ȧney, məthɔth, kəbɔthi lanɛ,

²³ȧmerȧ athoranɛ, kəyɔ gbo gbɛt; athɔ ɔ thɔ aŋ yi hɛ aŋa mə ŋamnɛ mȧtȧy ame.

²⁴Ɔwa afəm aŋa yi ka Krayst aŋ po tȧŋ madɛr yi ɛnanɛ ya ɛfela ɛləs yati ka akənt kəpəŋkinɛ.

²⁵Bepi sə yi akəli kətȧŋȧnɛ ka ɔYina-e, maŋ kɔth nu ka aŋfɔsɔ ŋa ɔYina.

²⁶Maŋ te nu fela ayiki afu fa fu, tə kəyɔ mȧtȧy ama mə kȧrȧ kələsəranɛ ɛmerȧ yi kətut.