Read Ȧŋlemrȧnɛ Ȧfu AŋKȧletia 6 Bible Online

AŋKȧletia 6 - Ȧŋlemrȧnɛ Ȧfu bible

AŋKȧletia 6

¹Awɔnt, bepi nə pɔntnɛ wuni ka kayɔ ahakɛ-e, naŋ aŋa yi rə ɔYina nə yi tə kəkal təmsər ɔwuni kati rə ȧmerȧ athoranɛ; ɔwa bumnɛ, kȧmȧ naŋ sɔ nə te wɔŋ ka agbɔnsanɛ.

²Marsanɛ nu kəsara ɛtothe kȧmȧ nə lasər ȧŋthɔ ŋa Krayst.

³Bepi wuni ɔ nanɛ ɔ yi wuni bana bana-e ma ɔ te yi koko-e, ɔ tɔnsnɛ.

⁴Kɛrɛ ta wuni o wuni ɔ thekthek mapanth mɔŋ, ɔwa di kati ɔ tə tȧrȧ bepi ɔ ba tȧy təkolonɛ ka aŋyɛthɛ ŋɔŋ son, pə yi hɛ ka wuni lɔm.

⁵Ȧtesoma-e wuni o wuni ɔ ba tə kəsara akothe kɔŋ gbeŋ.

⁶Ɔwe ma thəksa ka ȧsim ta Kuru-e, ta ɔ yeranɛ ɛyɛt ɛfinɔ bɛ ka ɔwe mə thəksa kɔ.

⁷Te nu selɔ a tɔns nu; pə fɔyɛ sel Kurɔŋ, kotȧy-e koko ara wuni mɔ sak-e, raŋ mɔ rɔk sɔ.

⁸kotȧy-e, kɔn ɔwe mə sak kətȧŋȧnɛ ka madɛr mɔŋ-e, ɔ tə rɔk kəthey kəwur ka madɛr; kɛrɛ kɔn ɔwe mə sak kətȧŋȧnɛ ka ɔYina-e, ɔ tə rɔk aŋesəm thəbana kəwur ka ɔYina.

⁹Maŋ te nu gbɔgbətha rə kəyɔ ɔfinɔ, kotȧy-e ka alɔkɔ agbut sə tə rɔk bepi sə thamrɔ hɛ.

¹⁰Tiyȧŋ mɔ mȧ sə ba afɛrɛ-e, maŋ yɔ nu ɔfinɔ ta afəm bɛ, ɔwa pə tha gbethi salata ŋaŋ aŋa yi akos a su ka kȧlanɛ.

¹¹Kəli ko ɛsikra ɛbana i gbalər nu ka kȧta kȧmi gbeŋ!

¹²Afəm aŋa yema tɔrinɛ ka madɛr ma rawuni kəpet-e, ŋa korakora nu kȧmȧ a birons nu; kɛrɛ a yɔ ti gbo kȧmȧ a te ŋa sɔmpar salata akənt kəpəŋkinɛ ka Krayst.

¹³kotȧy-e hali aŋfəm aŋe gbeŋ aŋ wop hɛ ȧŋthɔ, aŋ yema gbo a birons nu kȧmȧ aŋ gbəli kori korinɛ ka madɛr ma nu.

¹⁴Kɛrɛ ta pə bɔlȧnɛ mi tə kəyikisnɛ thambe ka akənt kəpəŋkinɛ ka ɔMarki kȧsu Yisɔs Krayst ro pə yi a tȧŋ tȧŋ ȧdȧru ka apənki ta ȧtȧ mi, dɛ yi minɛŋ ta ȧdȧru.

¹⁵kotȧy-e kȧbirons thalɔm kəte birons kə yi hɛ koko rokor ka Krayst Yisɔs, thambe məbɛmpa məfu gbo.

¹⁶Ɔwa afəm aŋa kɔth ka ȧŋthɔ aŋe, ta məthɔfəl dɛ yi ȧney aŋ yi do rɔŋaŋ, dɛ yi sɔ rokɔm ka aŋIsrɛl ŋa Kuru.

¹⁷Kətəp ka-ake ta wuni o wuni ɔ te mi sɔmpar, ȧtesoma-e i ba tȧbur ka ȧŋdɛr a mi ta ɔMarki Yisɔs.

¹⁸Awɔnt, ȧŋboŋa ŋa ɔMarki kȧsu Yisɔs Krayst ta aŋ yi ka ɛmerȧ ɛ nu. Amina.