Read Ȧŋlemrȧnɛ Ȧfu AŋƐfisɔs 1 Bible Online

AŋƐfisɔs 1 - Ȧŋlemrȧnɛ Ȧfu bible

AŋƐfisɔs 1

¹Pɔl, usom ka Yisɔs Krayst kətaŋ ka mȧselɔ ma Kuru, ka aŋsəm aŋa yi ro Ɛfisɔs, yi ka aŋlanɛ rokor ka Krayst Yisɔs.

²Ta aboŋa dɛ yi məthɔfəl aŋ yi do rɔnu, kəwur ka Kuru ɔKas kȧsu yi ɔMarki Yisɔs Krayst.

³Sə ruba Kuru Məsaba ɔKas ka ɔMarki kȧsu Yisɔs Krayst ɔwe po ruba su rɛ yi ɛruba ɛyɛ ro Yina bɛ ka ɔyira wa riyana rokor ka Krayst.

⁴Mɔlɔ ma Kuru-e, ɔ po thith su rokor ka Krayst yeŋka ɔ təmər ȧdȧru, kȧmȧ sə gbəli yi asəm dɛ yi apaŋi tȧy rodi kɔŋ ka məbɔthər.

⁵kotȧy-e ɔ bot su thəpaŋ tə kəsɔthɔ matəma gbeŋ ma awuth asabu ŋa Yisɔs Krayst, mɔ mə mȧthesȧ ma mȧselɔ mɔŋ mə yi

⁶ka kȧthɔkəs ka aŋyiki ŋa ȧŋboŋa ŋɔŋ aŋa ɔ po sɔŋ su kəyaŋkaŋ kətȧŋȧnɛ ka ɔwe ɔ bɔthər.

⁷Ɔwa, do rɔŋɔŋ, a bani su kətaŋ ka mȧtir mɔŋ, pə yi mɔ-e, kȧterɔ ka ɛhakɛ kətȧŋȧnɛ ka rayola ra ȧŋboŋa ŋɔŋ,

⁸aŋa ɔ yer su ɔgbȧthi ɔlay rə kətemp dɛ yi kətara tȧy bɛ,

⁹ma ɔ poŋ tɔri su aŋgbundu ŋa mȧselɔ mɔŋ, mɔ mə mȧselɔ mɔŋ məfinɔ mə yi ama ɔ ba ka aŋyɛthɛ ŋɔŋ.

¹⁰Kȧmȧ pəyi, mȧ ȧŋlɔkɔ aŋ lasər-e, ɔ gbəli thonkla mȧtȧy bɛ rɔkin rokor ka Krayst, pə yi mȧtȧy ama yi ro riana-e, dɛ yi ama yi ka raru-e.

¹¹Rokor kɔŋ sɔ-e sə po sɔthɔ akɛŋ, ma a thith su thəpaŋ kətȧŋȧnɛ ka kathithəs ka ɔwe mə yɔ mȧtȧy bɛ mɔ mə ȧŋnanɛ ŋa mȧselɔ mɔŋ aŋ yi.

¹²Kama saŋ aŋa mɔtha bot ɛmerȧ ɛ su ka Kraystȧŋ, sə tə yi ka kathɔkəs ka aŋyiki ŋɔŋ.

¹³Do rɔŋɔŋ nə bot ɛmerȧ ma nə poŋ təl ȧrim ra tȧteŋ, mapa məfinɔ ma Kuru ka kakisis ka nu. Ɔwa ma nə po lanɛ kɔ-e, a mathlɛ nu yi ɔYina məsəm ɔka aŋlahiri,

¹⁴ɔwe yi masɛkɛ ma akɛŋ kȧsu, haŋ kabani kati kə gbenthis, kəkɔ ka kathɔkəs ka aŋyiki ŋɔŋ.

¹⁵Tiyȧŋ minɛ sɔ, ma i po təl ta kȧlanɛ ȧke yi kətɔŋ ka nu ka ɔMarki Yisɔsȧŋ, dɛ yi mabɔthər ama nə ba ka aŋsəm bɛ-e,

¹⁶i tey hɛ tə kəsɔŋ mɔmɔ ta ȧtȧ nu, ma i bontəs nu ka taramnɛ ta mi,

¹⁷kȧmȧ ɔKuru ka ɔMarki kȧsu Yisɔs Krayst ɔKas ka ayiki ɔ sɔŋ nu ȧŋmerȧ ŋa kətemp yi kəŋaybi tȧy tə kətara kɔ.

¹⁸Tə kəyi a sɔkəth ɛfɔr ya ɛmerȧ ɛ nu kȧmȧ nə tȧrȧ ko kəgbak ȧmerȧ nə ba ka kamuti kɔŋ, dɛ yi ko yi rayola ra aŋyiki ŋa akɛŋ kɔŋ ka aŋsəm,

¹⁹dɛ yi ko aŋfɔsɔ ŋɔŋ ŋə yi abana ɔthasər-e do rɔsu aŋa lanɛ, mɔ mə kagbəli kɔŋ kəninis kə yi,

²⁰ȧke ɔ yɔ ka ȧŋgbȧp ŋa Krayst, ma ɔ yokas kɔ ka rafi, kɔ yɔ kɔ ɔ yirȧ ka kȧdiyɔ kɔŋ ka ɔyira wa riyana,

²¹ɔbɔli rəkɔm ka rəgbəka bɛ, afɔsɔ bɛ, amarki bɛ, yi tȧbȧy bɛ dɛ yi ka ŋes o ŋes aŋa a bont, pə yi hɛ ka ȧdȧru are gbo gbɛt, kɛrɛ ka ȧdȧru ara ba kəder sɔ.

²²kɔ po bot tȧy o tȧy ka ȧtȧtək tɔŋ ratha, kɔ yɔ kɔ ɔ yi rȧbomp ra tȧy o tȧy ka aŋchɔch,

²³aŋa yi ȧŋdɛr ŋɔŋ, ɔlasər wa kɔn ɔwe mə lasər dɛr o dɛr yi tȧy o tȧy.