Read Ȧŋlemrȧnɛ Ȧfu AŋƐfisɔs 3 Bible Online

AŋƐfisɔs 3 - Ȧŋlemrȧnɛ Ȧfu bible

AŋƐfisɔs 3

¹Te ba ti-e, minɛ Pɔl, ɔkɛndɛbira ka Yisɔs Krayst salata naŋ təbona təlɔm-e,

²bepi nə po təl ta mapanth ma kəkɔtha ȧŋboŋa ŋa Kuru ama a maŋkər mi ta ȧtȧ nu-e;

³tə kəyi a ŋaybi ti do rɔmi kȧmȧ i sɔthnɛ aŋgbundu, mɔ mə i po thɔŋ gbal rə sim təthan,

⁴kȧmȧ pə yi ma nə karaŋ nə tə tȧrȧ kȧsɔthnɛ kȧmi ka aŋgbundu ŋa Kraystȧŋ.

⁵A la hɛ tɔri ŋi ka aŋwuth ŋa afəm thəpaŋ, mɔ mȧ a poŋ thɔŋ ŋaybi ŋi ka-ake ka aŋsom ŋɔŋ asəm dɛ yi Aŋnȧbi kətȧŋȧnɛ ka ɔYina məsəm;

⁶tə kəyi tȧbona təlɔm aŋ sɔthɔ kɛŋ yi saŋ ka aŋ yi adɛr ŋin dɛ yi saŋ, ɔwa aŋ yi ayeranɛ ŋa aŋlahiri rokor ka Yisɔs Kraystȧŋ asabu ŋa mapa məfinɔ ma Kuru.

⁷A səki mi ȧbɔy ŋa ȧkɛra kati kətȧŋȧnɛ ka ȧŋboya ŋa ȧŋboŋa ŋa Kuru-e, aŋa a sɔŋ mi kətaŋ ka kagbəli ka aŋfɔsɔ ŋɔŋ.

⁸Do rɔmi-e, ɔwe yi uyay thɔŋ bɛ ka aŋsəm-e, a maŋkər ȧŋboŋa aŋe kȧmȧ i kawandi ka tȧbona təlɔm rayola rəninis ra Krayst,

⁹dɛ yi kȧmȧ i yɔ afəm bɛ aŋ nənk ko yi mabotəs ma aŋgbundu aŋa a po maŋk ka ȧŋmerȧ ŋa Kuru kȧbi ka ɔtəpɛr wa ȧdȧru, ɔwe po bɛmpa ɛyɛt bɛ ka Yisɔs Kraystȧŋ.

¹⁰Kama aŋchɔch ka-ake aŋ gbəli yɔ aŋkərbomp dɛ yi ɛfɔsɔ ya ȧkȧriyana aŋ tȧrȧ kȧtemp kəgbaskɛ gbaskɛ ka Kuru.

¹¹Mȧtȧy ame mə yi kətȧŋȧnɛ ka mabotəs mɔŋ ma thəbana ama po yi rokor ka Yisɔs Krayst ɔMarki kȧsu.

¹²Ɔwa sə ba kəmintha dɛ yi aroŋ ra kȧwɔŋ-e rə kəpələnɛ ŋa kȧlanɛ kȧsu do rɔŋɔŋ.

¹³Tiyȧŋ i nɛmthɛnɛ nu kȧmȧ ɛmerȧ ɛ nu ɛ te ranta salata ɛsɔmpanɛ ɛ mi ta ȧtȧ nu, ɛyɛ yi ayiki a nu.

¹⁴Ta ȧŋsabu aŋe i sɔ tawu ta mi ka ɔKas ka ɔMarki kȧsu Yisɔs Kraystȧŋ,

¹⁵ɔwa kəwur do rɔŋɔŋ ŋa sɛŋk ro riyana yi ka ȧdȧru aŋ sɔthɔ ŋes,

¹⁶kȧmȧ ɔ yɔ nu kətȧŋȧnɛ ka ɔlasər wa aŋyiki ŋɔŋ, kȧmȧ nə bȧksər rə aŋfɔsɔ ŋa ɔYina ŋɔŋ ka rafəm ra nu;

¹⁷kȧmȧ Krayst ɔ gbəli yirȧ ka ɛmerȧ ɛ nu ka kəlanɛ; kȧmȧ pə yi ma nə ba ɛthəŋk yi ɔtəmər ka məbɔthər-e,

¹⁸nə gbəli yi abȧki mədɛr tə kətara dɛ yi aŋsəm bɛ-e, ko yi ɔwarɛ-o, ɔbɔli-o, ɔbɔli rəkɔm-o, dɛ yi ɔbɔlɔŋ; dɛ yi hali tə

¹⁹kətara mabɔthər ma Krayst ama mə thasi kətara tȧy bɛ, kȧmȧ a namsir nu yi ɔlasər wa Kuru bɛ.

²⁰Ɔwa do rɔŋɔŋ ɔwe mə gbəli yɔ kalɔ kalɔ pəthas ȧtȧ sə thola thalɔm ȧtȧ sə nanɛ-e, kətȧŋȧnɛ ka aŋfɔsɔ aŋa mə yɔna rokor kȧsu,

²¹ɔwa ta ayiki aŋ yi do rɔŋɔŋ rokor ka aŋchɔch dɛ yi ka Yisɔs Krayst haŋ thɔŋ təkomra bɛ, thȧnkȧŋ o thȧnkȧŋ. Amina.