Read Ȧŋlemrȧnɛ Ȧfu AŋƐfisɔs 4 Bible Online

AŋƐfisɔs 4 - Ȧŋlemrȧnɛ Ȧfu bible

AŋƐfisɔs 4

¹Tiyȧŋ minɛŋ, ɔkɛndɛbira ka ɔMarki, i nɛmthɛnɛ nu kȧmȧ nə kɔth mɔ mə nə yi tə kəkɔth ka katela ȧke a poŋ tela nu,

²rə ɛmerȧ ɛthoranɛ dɛ yi məthɔfəl bɛ, yi kəmuyu tȧy, ɔwa sɔ-e, muyusanɛ nu rə məbɔthər.

³Bȧsər nu kəba ȧmerȧ ŋin ka ɔYina rə məsekəranɛ ma məthɔfəl.

⁴Adɛr ŋin aŋ yi, dɛ yi ɔYina ukin, ya pə yi sɔ a tela nu ka kəgbak ȧmerȧ kin ka kamuti ka nu.

⁵ƆMariki ukin ɔ yi, yi kəlanɛ kin, dɛ yi kəbaftays kəsəm kin,

⁶ɔwa ɔKuru ukin sɔ, ɔKas ka bɛ ɔwe yi rokɔm ka koko bɛ, ɔwe lasər tȧy o tȧy, ɔwa ɔ kȧl yi rokor ka bɛ.

⁷Kɛrɛ a sɔŋ su kin o kin aboŋa kətȧŋȧnɛ ka anthuntha ŋa ȧŋboya ŋa Krayst.

⁸Te ba ti ɔ pa, Ma ɔ ŋat rokɔm ɔ kera atɛndɛbira agbȧthi, Ɔwa ɔ sɔŋ ɛboya ka aŋfəm.

⁹(Kɛrɛ kəpa, Ɔ ŋat rokɔm, ko kə yi thambe kəpa ɔ la thor sɔ ka ȧŋthɔf ratha-e?

¹⁰Kɔn ɔwe thor roratha-e, ɔkin kati ɔ kȧl ŋat ɔbɔli rəkɔm ka ȧkȧriyana bɛ, kȧmȧ ɔ gbəli lasər tȧy o tȧy).

¹¹Ɔwa ɔ thith alɔm tə kəyi asom; alɔm tə kəyi anȧbi; alɔm sɔ mɔ akawandi; ɔwa ɔ thith alɔm tə kəyi akəlȧnɛ ŋa aŋchɔch dɛ yi akarmɔkɔ,

¹²salata kagbenthis ka aŋsəm, ta mapanth ma kəbatho dɛ yi tə kəbaksər ȧŋdɛr ŋa Krayst.

¹³Haŋ saŋ bɛ sə sɔthɔsnɛ ȧŋmerȧ ŋin ŋa kȧlanɛ dɛ yi kȧtȧrȧ ka ɔWan ka Kuru, pə yi mɔ sə bek ka rawuni rəgbenthis, ka katɛŋa ka ɔlasər wa Krayst.

¹⁴Kama sə te sɔ yi afɛth aŋa aŋfef ŋa kəthəksa o thəksa mə aŋ falir-e, pə yi mɔ ayaŋfa ŋa afəm ka masɔth maŋ rə kȧyɔ kȧrȧfu kȧrȧfu.

¹⁵Kɛrɛ sə yi tə kəfɔf tȧteŋ ka məbɔthər, kȧmȧ sə tɛŋa do rɔŋɔŋ ka mȧtȧy bɛ, ɔwe yi rȧbomp ra su, Krayst kɔn kɔnɔnɛ.

¹⁶Ɔwa kəwur do rɔŋɔŋ ȧŋdɛr bɛ aŋ gbɛptanɛ ka matɔsanɛ ma akotir o kotir kati mɔlɔ ma mapanth məmari mati mə yi-e, kaŋ bȧk dɛ yi aŋ bȧrnɛ ka mȧbɔthər.

¹⁷Ȧtesoma-e i maŋ nu, ɔwa i nɛmthɛnɛ nu ka ȧŋes ŋa ɔMarki kȧmȧ nə te sɔ kɔth mɔ tȧbona təlɔm mə aŋ kɔth, ka ɛmerȧ yaŋ ɛfoth.

¹⁸Maŋ ba ɛmerȧ ɛbi, ɛbɔlȧnɛ kəwur ka aŋesəm ŋa Kuru asabu ŋa kate tȧrȧ ȧke yi rokor ka ŋaŋ, ka kagbolŋanɛ ka ɛmerȧ yaŋ.

¹⁹Aŋfəm aŋe maŋ ba ɛmerȧ ɛgbərfanɛ-e, aŋ sɔndnɛ tə kəyɔ tȧy o tȧy təyifas, rə ɛfɔr ɛmara.

²⁰Kɛrɛ yaŋ tha nə la thəkəs ka Kraystȧŋ,

²¹bepi pə yi ti yathi kəpa nə po təlȧ kɔ, ka a po thəksa nu mɔ tȧteŋ tə yi rokor ka Yisɔsȧŋ.

²²Kama nə bus aruma ra rawuni kur yi matanɛ ma nu thəpaŋ ara mə bȧr gbo ləsərnɛ ka ɛmilɛ ɛyaŋfa.

²³Ɔwa yɔ kȧmȧ a fus nu ka ɛyina ya ɛmerȧ ɛ nu.

²⁴Wɔŋ nu aruma ra rawuni fu, ɔwe a təpi rə mȧbȧlȧnɛ ma Kuru rə məlompi yi məsəm ma tȧteŋ.

²⁵Tiyȧŋ gbapɛ nu rəyem, ɔwa ta wuni o wuni ɔ fɔf tȧteŋ ka ɔfatanɛ kɔŋ; ȧtesoma-e sə yi məlaŋktha ukin ka ulɔm.

²⁶Bepi nə bansȧ-e, bumnɛ nu kȧmȧ nə te yɔ ahakɛ. Te nu selɔ aret rə wɔŋ ka rabaŋ da nu.

²⁷Ɔwa te nu sɔŋ Sethani dɛr.

²⁸Ɔwe la keya, ta ɔ te sɔ keya, kɛrɛ ka ɔpeskianɛ wati ɔ yi tə kəyɔ məpanth yi mȧta mɔŋ gbeŋ ȧtȧ yi təfinɔ, kȧmȧ ɔ ba rəka tə kəsɔŋ kɔn ɔwe te ba koko.

²⁹Te nu selɔ rim o rim rələs rə wur ka tasəŋ ta nu, kɛrɛ fɔf gbo sim təfinɔ ȧtȧ mə yi təbeki tə kəsɔŋ aboŋa ka ŋaŋ aŋa mə təl.

³⁰Ɔwa te nu bansəs ɔYina məsəm ka Kuru, ma pə yi a mathlɛ nu do rɔŋɔŋ haŋ ȧŋrey ŋa kabani.

³¹Gbapɛ nu ȧmerȧ aroŋkəth-e, rəbaŋ-e, məthɛkɛ-e, kəthoŋka thoŋka dɛ yi ȧmerȧ aləs tətəp bɛ,

³²ɔwa ba nu məthɔth dɛ yi ȧney ɔkin ka ulɔm; tera nu ukin dɛ yi ulɔm mɔlɔ min mɔ mə Kuru ɔ poŋ tera nu salata Krayst.