Read Ȧŋlemrȧnɛ Ȧfu AŋƐfisɔs 5 Bible Online

AŋƐfisɔs 5 - Ȧŋlemrȧnɛ Ȧfu bible

AŋƐfisɔs 5

¹Te ba ti, tansanɛ Kuru mɔ afɛth abɔthər.

²Kɔth nu ka məbɔthər mɔ Krayst sɔ ɔ po bɔthər su, kɔ sɔndnɛ ta ȧtȧ su sathka dɛ yi aboya ŋa abɔnt afɔlfɔl ka Kuru.

³Kɛrɛ kȧrəp-o, kȧtayanɛ bɛ-o, ta a pa ras ɛmilɛ-o, ta a te sɔ bont yi kətɔŋ ka nu, mɔ mȧ aŋsəm aŋ yi tə kəyɔ.

⁴Sobinɛ nu kəfɔf kȧyifas thalɔm kȧfɔf kəpənk, ta a pa ras mȧgbati məyay. Mȧtȧy ame bɛ mə mar hɛ koko, kɛrɛ yi nu tɛmp tɛmp tə kəsɔŋ mɔmɔ.

⁵kotȧy-e nə tȧrȧ ti tə tɛntɛnɛ kəpa wuni rəpi, thalɔm wuni nɔkɔ-e, thalɔm wuni ba ɛfɔr ɛyamari-e, ɔwe yi mɔ ubȧtho arɔŋ-e, ɔkati ɔ ba hɛ ani ka rȧbȧy ra Krayst yi Kurɔŋ.

⁶Te nu selɔ wuni o wuni ɔ tɔns nu rə sim təfoth; kotȧy-e salata mȧtȧy ame rabaŋ da Kuru rə derər aŋwuth ȧthȧnthonɛ.

⁷Tiyȧŋ te nu kulunɛ yi ŋaŋ,

⁸kotȧy-e nə yi thəpaŋ ka asum, kɛrɛ ka-ake nə yi ɔwaŋ ka ɔMarki. Kɔth nu mɔ awuth ŋa ɔwaŋ;

⁹ȧtesoma-e mȧkomi ma ɔYina mə yi ka məthɔth bɛ yi məlompi yi təteŋ.

¹⁰Thəkəs nu-e kȧmȧ nə tȧrȧ ko mə bɔnɛs ɔMarki.

¹¹Ɔwa te ba məmanɛ yi mȧyɔs ma ȧŋsum məkoŋfereŋ, kɛrɛ beta ti, ŋal ma nu.

¹²Pəkasitɛ pə yi məlap hali tə kəbont mȧtȧy ama mə aŋ yɔ rə ȧmȧnknɛ.

¹³Kɛrɛ a gbəli mɛmər tȧy o tȧy ka ɔwaŋ kȧmȧ nə tȧrȧ bepi tə yi təteŋ; kotȧy-e tȧy o tȧy ȧtȧ mə wur gbafəth tə yi ɔwaŋ.

¹⁴Tiyȧŋ ɔ pa, Thəmɛ munɔ ɔwe dirȧ-e, yokanɛ ka rafi, ɔwa Kraystȧŋ ɔ tə sɔŋ mu ȧŋmothȧ.

¹⁵Tiyȧŋ gbɛŋgbɛnɛ nu kəthɛgbɛ to mȧ nə kɔth-e, kȧmȧ pə te yi mɔ afəm apənk, kɛrɛ ta pə yi mɔ atempi.

¹⁶Lasər nu alɔkɔ o lɔkɔ rə kəyɔ ɔfinɔ, pəkasifɛ marey ame mə yi mələs.

¹⁷Ɔwa te nu yi mɔ afəm aŋa te tȧrȧ, kɛrɛ sɔthnɛ ko mȧselɔ ma ɔMarki mə yi.

¹⁸Te nu tis ka mȧber, rə kəthasərnɛ; kɛrɛ yi nu anȧmrȧ yi ɔYina məsəm.

¹⁹Fɔfȧnɛ nu ka ȧŋSams dɛ yi məleŋ məsəm tətəp tətəp, ɔwa leŋ nu tə kəthɔkəs ɔMarki ka ɛmerȧ ɛ nu.

²⁰Sɔŋ Kuru ɔKas mɔmɔ alɔkɔ bɛ ta tȧy o tȧy ka ȧŋes ŋa ɔMarki kȧsu Yisɔs Kraystȧŋ.

²¹Sanɛ nu ɔkin ka ulɔm rə kənesa Kuru.

²²Naŋ arani, sanɛ nu ka awos a nu, mɔ ka ɔMarki,

²³ȧtesoma-e ɔwos ɔ yi rȧbomp ra ɔrani, hali mɔ Krayst ɔ yi rȧbomp ra aŋchɔch, pə yi mɔ-e, ȧŋdɛr ŋɔŋ. Ɔwa kɔnɔ gbeŋ ɔ yi ɔKisis kati.

²⁴Ɔwa mɔ mȧ aŋchɔch aŋ sanɛ ka Kraystȧŋ, yaŋ arani aŋ yi tə kəyɔ ka aŋwos ŋaŋ rə tȧy o tȧy.

²⁵Naŋ awos, bɔthər nu arani a nu, mɔ mə Krayst ɔ bɔthər aŋchɔch, kɔ kȧl sɔndnɛ ta atɔŋ,

²⁶kȧmȧ ɔ gbəli səməs kɔ mɔ ɔ po fethər kɔ ka mȧnt kətȧŋȧnɛ ka ȧrim rɔŋ,

²⁷kȧmȧ ɔ gbəli sɔŋ aŋchɔch do rɔŋɔŋ mɔ agbanɛ ŋa aŋlanɛ agbenthis, aŋa te ba apora, thalɔm akompthanɛ, thalɔm tȧy o tȧy təwunɔŋ; kȧmȧ aŋchɔch aŋ gbəli yi asəm kəte ba məthɛkɛ bɛ.

²⁸Yaŋ awos aŋ yi tə kəbɔthər aŋrani ŋaŋ mɔ mə aŋ bɔthər madɛr maŋ gbeŋ. Ɔwe bɔthər ɔrani kɔŋ-e, ɔ bɔthərnɛ.

²⁹kotȧy-e wuni o wuni ɔ yi hɛ ɔwe gbɛŋa ȧŋdɛr ŋɔŋ; kɛrɛ ɔ sɔŋ ŋi da rədi, ɔwa ɔ kəlianɛ ŋi mɔlɔ min mɔ Kraystȧŋ mɔ raŋko aŋchɔch.

³⁰Pəkasifɛ sə yi malaŋktha ma ȧŋdɛr ŋɔŋ.

³¹Te ba ti ɔruni ɔ tə tey ɔkas dɛ yi ɔkara kɔŋ, ɔwa ɔ tə sekəranɛ yi ɔrani kɔŋ-e. Ɔwa ŋa ŋarəŋ aŋ tə səkɛ adɛr ŋin.

³²Aŋgbundu aŋe aŋ yi abana; ɔwa i fɔf ta Krayst dɛ yi aŋchɔch.

³³Kɛrɛ ta ɔruni o runi ɔ bɔthər ɔrani kɔŋ mɔ mɔ bɔthərnɛ; ɔwa ɔrani ɔ yi sɔ tə kəyikis ɔwos kɔŋ.