Read Ȧŋlemrȧnɛ Ȧfu AŋFilipai 1 Bible Online

AŋFilipai 1 - Ȧŋlemrȧnɛ Ȧfu bible

AŋFilipai 1

¹Pɔl yi Timɔthi-əŋ, ɛbɔy ya Yisɔs Krayst, ka aŋsəm bɛ aŋa yi ka Krayst Yisɔs ro Filipay, yi aŋgbəka dɛ yi aŋkəlia.

²Ta aboŋa yi məthɔfəl mə yi do rɔnu kəwur ka Kuru ɔKas kȧsu, yi ka ɔMarki Yisɔs Krayst.

³I mɔmɔ ɔKuru kȧmi lɔkɔ o lɔkɔ ma i nanɛ nu,

⁴ɔwa ka taramnɛ ta mi bɛ i thola ta ȧtȧ nu bɛ yi məbɔnɛ,

⁵salata mamanɛ ma nu ka ȧkɛra kəfinɔ ka Kuru kȧbi ȧŋrey ȧtɔtɔkɔ haŋ mɔ yaŋ.

⁶Ka i lanɛ ti ɔbaksər kəpa, kɔnɔ ɔwe po təp məpanth məfinɔ rokor ka nu-e, ɔ tə pons ma haŋ ka ȧŋrey ŋa Yisɔs Krayst.

⁷I ba məmari tə kənanɛ ȧte ta ȧtȧ nu bɛ, kotȧy-e i ba nu ka ȧŋmerȧ a mi, ɔwa ma i yi ukɛndɛbira dɛ yi ma i təmȧ tə kəgbaki dɛ yi tə kəseri ta ȧkɛra kəfinɔ-e, naŋ bɛ nə yi ayeranɛ ka aboŋa ŋin ŋati yi minɛŋ.

⁸Kuru ɔ yi maseri ma mi ko kiro i ba ta ȧtȧ nu bɛ ka mabɔthər ma Yisɔs Kraystȧŋ.

⁹Ta ȧte sɔ-e i ramnɛ kȧmȧ mabɔthər ma nu mə gbəli bȧrnɛ haŋ ka kətara dɛ yi kətemp bɛ.

¹⁰Kama nə thith mȧtȧy məfinɔ; kȧmȧ nə yi təteŋ, kəte ba məthɛkɛ haŋ ka ȧŋrey ŋa Yisɔs Krayst.

¹¹Kama nə la yi mȧkomi ma mȧlompi ama der kətȧŋȧnɛ ka Yisɔs Krayst kəkɔ ka aŋyiki dɛ yi kathɔkəs ka Kuru Məsaba.

¹²Kɛrɛ awɔnt, i yema kȧmȧ nə tȧrȧ kəpa mȧtȧy ama po sɔmpa mi mə po səkɛ kəmar kȧmȧ ȧkɛra kəfinɔ ka Kuru kə bȧsər kɔ rodi,

¹³haŋ aturgba ta ɔbȧy dɛ yi afəm alɔm bɛ aŋ tȧrȧ kəpa atɔrɛntha ta mi tə yi ta salata Kraystȧŋ.

¹⁴Ɔwa sɔ-e, awɔnt agbȧthi ŋa ɔMarki aŋ bȧr lanɛ salata ȧŋsɔmpanɛŋ a mi, kaŋ bȧsər fɔf mapa məfinɔ ma Kuru rə kəmintha.

¹⁵Tə tɛntɛnɛ alɔm aŋ kawandi Krayst rə kətut dɛ yi kətimnɛ; ɔwa alɔm sɔ yi məselɔ məfinɔ.

¹⁶Ukin ɔ kawandi Krayst kəwur ka məputhanɛ, pə yi hɛ ka təteŋ, kȧbi ɔ nanɛ tə kəbar ka ȧŋsɔmpanɛŋ a mi;

¹⁷kɛrɛ ulɔm ɔ yɔ yi ka məbɔthər, pəkasifɛ ɔ tȧrȧ kəpa a tand mi anɔ asabu ŋa kagbaki ka ȧkɛra kəfinɔ ka Kuru.

¹⁸To pə yi thɔŋ-a? Pə yi gbo kəpa rə roŋ o roŋ-e, pə yi rə kəyɔr, thalɔm rə təteŋ, kaŋka gbo a kawandi ȧŋes ŋa Krayst. Ɔwa i ba məbɔnɛ ta ti, yao i ti kȧl ba məbɔnɛ sɔ.

¹⁹kotȧy-e i tȧrȧ kəpa ȧtȧy ȧte tə tə yɔnɛ salata kakisi kȧmi asabu ŋa taramnɛ ta nu, dɛ yi asabu ŋa aŋfɔsɔ aŋa ɔYina məsəm ka Yisɔs Kraystȧŋ ɔ sɔŋ,

²⁰kətȧŋȧnɛ ka ȧŋmerȧ ȧpələnɛ dɛ yi kagbak ȧmerȧ kȧmi; kȧmȧ i te lap rə tȧy o tȧy, kɛrɛ rə kəmintha bɛ, Krayst ɔ tə sɔthɔ ayiki ka ȧŋdɛr a mi ka-ake, dɛ yi alɔkɔ bɛ, pə yi ka ŋesəm-o, thalɔm ka rəfi.

²¹kotȧy-e ka ȧŋgbȧp a mi, kəba ŋesəm kə yi Kraystȧŋ, ɔwa kəba rəfi kə yi kəbȧrnɛ.

²²Kɛrɛ bepi i bɔl ŋesəm nɔru-e, pə yi mɔ-e, mȧkomi ma mapanth ma mi miəŋ; ɔwa ȧtȧ i yi tə kəthith gbeŋ i tɛ hɛ,

²³kotȧy-e i yi rə akɛthanɛ, ma pə yi i ba afela abana tə kəkɔnɛ kȧmȧ i yi yi Kraystȧŋ ȧtesoma-e ŋə tə yi mi fisa finɔ.

²⁴Kɛrɛ bepi ta ȧtȧ nu-e, fisa ti kȧmȧ i tiyȧ ka madɛr.

²⁵Ɔwa, ma i ba kapələnɛ ake-e, i tȧrȧ kəpa i ti tiyȧ, yao, i ti yirȧ kətɔŋ ka nu bɛ tə kəmar nu ka kakɔ ka nu kədi rə məbɔnɛ ka kȧlanɛ,

²⁶kȧmȧ mabɔnɛ ma nu mə bȧrnɛ ka Yisɔs Krayst do rɔmi salata kȧbəprȧnɛ kȧmi kətɔŋ ka nu.

²⁷Kɛrɛ yɔ nu kȧmȧ mȧyɔs ma nu mə yi məgbɛt ta ȧkɛra kəfinɔ ka Kraystȧŋ; kȧmȧ pə yi-e, bepi i der kori nu, thalɔm i bəpər hɛ, i gbəli təl ta mȧyɔs ma nu, kəpa nə təmȧ kəŋkəŋ ka mȧyi min dɛ yi ȧmerȧ ŋin tə kətim ta kȧlanɛ ka ȧkɛra kəfinɔ ka Kuru.

²⁸Te nesa antheranɛ a nu hali; kate ka nu nesa kə y amisali ma kadinɛ ka ŋaŋ, kɛrɛ do rɔnu kə yi amisali ma kakisi ka nu ka Kuru.

²⁹A po sɔŋ nu afɔsɔ, pə yi hɛ gbo tə kəlanɛ Kraystȧŋ, kɛrɛ tə kənakasi ta sala tɔŋ.

³⁰Nə tə ba katim kin ȧke nə nəŋka mi, pə yi mɔ katim ȧke nə təl i ba haŋ ka-ake.