Read Ȧŋlemrȧnɛ Ȧfu AŋFilipai 3 Bible Online

AŋFilipai 3 - Ȧŋlemrȧnɛ Ȧfu bible

AŋFilipai 3

¹Ɔwa aŋwɔnt a mi, ba nu məbɔnɛ ka ɔMarki. Pə bȧk hɛ mi mədɛr tə kəgbalər nu mȧtȧy ame, ɔwa pə yi sɔ ɔfinɔ ta ȧtȧ nu.

²Bumnɛ nu mətən, bumnɛ nu afəm aləs, dɛ yi ȧŋbirons,

³kotȧy-e saŋ sə yi ȧŋbirons tə tɛntɛnɛ, aŋa yikis Kuru rə ȧmerȧ, ka sə sɛlinɛ ka Yisɔs Krayst, ɔwa sə pələnɛ hɛ ka madɛr hali.

⁴Minɛ i gbəli naŋ ba mamari tə kəgbək ɛyonka ka madɛr ma rawuni kəpet. Bepi wuni o wuni ulɔm ɔ nanɛ ɔ ba mamari tə kə kori korinɛ ka madɛr-e, minɛ thas.

⁵Ka ȧŋrey aŋa bekȧ tamthərɛsas a birons mi, ka ȧŋbona ŋa Isrɛl, ka ȧŋbɔnshɔ ŋa Bɛnyamin, uHibru ka aŋHibru; kətȧŋȧnɛ ka ȧŋthɔ, uFarisi;

⁶ka ȧŋgbȧp ŋa kəyi uyasyas-e, i tim tə kələsər aŋgbanɛ ŋa Yisɔs; ka mȧlompi ama yi ka anthɔ-e, a fir mi upaŋi tȧy.

⁷Kɛrɛ mȧtȧy bɛ ama la munaŋfas mi-e, mə i lɔm məyay yay salata Kraystȧŋ.

⁸Ya pə yi, i dim koko bɛ salata ɔfinɔ ɔbaki mɔlɔ wa kətara Yisɔs Krayst ɔMarki kȧmi; ɔwa ta atɔŋ i poŋ dim mȧtȧy bɛ, ka i nənk ma mɔ ɛka ya amuruŋ kȧmȧ i gbəli sɔthɔ Krayst,

⁹yi kȧmȧ i gbəli yi do rɔŋɔŋ, pə yi hɛ ka mȧlompi ama mi, ama təmȧ ka ȧŋthɔ, kɛrɛ mȧlompi ama yi ka kȧlanɛ ka Krayst, pə yi kəpa ye, mȧlompi ama wur ka Kuru kətȧŋȧnɛ ka kəlanɛ.

¹⁰Kaŋka gbo i gbəli tȧrȧ kɔ yi aŋfɔsɔ ŋa kakal yokanɛ kɔŋ ka rafi, tə kəyeranɛ ȧŋsɔmpanɛŋ ŋɔŋ, ɔwa sɔ-e, kȧmȧ i fi hali mɔ kɔnɔ ɔ fi.

¹¹Tə kəyi, bepi pə yi ɔfɔy tay-e, i gbəli sɔthɔ kəkal yokanɛ kəwur ka rafi.

¹²Pə yi hɛ kəpa i po thɔŋ berɔkɔ-e, thalɔm i po thɔŋ yi ugbenthis-e, kɛrɛ i bȧsər kɔ kədi kȧmȧ i gbəli wop mabotəs mati ta ama Yisɔs ɔ kȧl wop mi.

¹³Awɔnt, i nanɛ hɛ kəpa i po thɔŋ wop ma ɔgbenthis-e, kɛrɛ ȧtȧy tin tȧ mɛ yɔ, i pənɛ tȧy o tȧy ȧtȧ yi rodarəŋ, ka i bȧsər asɔbɛ tə kəberɔkɔ-e,

¹⁴ka i lomanɛ toloŋ ka ɔber wa ȧŋrȧm ŋa katela kəbɔli rəkɔm ȧke Kuru ɔ sɔŋ rokor ka Yisɔs Kraystȧŋ.

¹⁵Tiyȧŋ saŋ aŋa po tɛŋa rə kəlanɛ, maŋ ba nu ȧmerȧ awunɔŋ, ɔwa bepi nə ba ɛnanɛ ɛgbaskɛ ta tȧy o tay-e, Kuru ɔ tə tɔri nu ȧte sɔ.

¹⁶Kɛrɛ ta mȧtȧy ama sə po thɔŋ sɔthɔ-e, maŋ bȧsər nu kəyi abɔthi lanɛ.

¹⁷Awɔnt, yi nu ȧtȧnsȧnɛ mi, ɔwa lomar ŋaŋ aŋa kɔth kətȧŋȧnɛ ka ȧŋmɔl aŋa sə sɔŋ nu.

¹⁸kotȧy-e agbȧthi aŋ kɔth mɔ mə i la tɔri nu, ka i kȧl pa yi ka-ake rə kəbok-e, kəpa aŋ yi atheranɛ ŋa akənt kəpəŋkinɛ ka Krayst.

¹⁹Ɔthalnɛ ka ŋaŋ kɔnɔ yi kədinɛ-e, ɔkuru ka ŋaŋ kɔnɔ yi akor-e, ɔwa aŋ kori korinɛ ka mȧlap ma ŋaŋ, kotȧy-e aŋ tȧmtȧmnɛ gbo ka matanstans ma ȧdȧru are.

²⁰Kɛrɛ radure ra su rə yi ro riyana, ka sə kəli sɔ ta ɔKisis ɔwe ba tə kəwur ri, pə yi mɔ-e ɔMarki Yisɔs Krayst,

²¹ɔwe yi tə kəsiŋkar mȧdɛr ma su ma mȧlap kȧmȧ mə səkɛ mɔ ȧŋdɛr ŋa aŋyiki ŋɔŋ, kətȧŋȧnɛ ka ȧŋfɔsɔ aŋa mə yɔ mȧtȧy bɛ məyi ro ratha kɔŋ.