Read Ȧŋlemrȧnɛ Ȧfu AŋFilipai 4 Bible Online

AŋFilipai 4 - Ȧŋlemrȧnɛ Ȧfu bible

AŋFilipai 4

¹Tiyȧŋ, aŋwɔnt a mi abɔthər, ta aŋa i bosinɛ, naŋ mabɔnɛ dɛ yi ȧŋniyɔ a mi, təmȧ nu kəŋkəŋ ka ɔMarki, abɔthər.

²I nɛmthɛnɛ Iyodiya yi Sintiki kȧmȧ aŋ ba ȧmerȧ ŋin ka ɔMarki.

³I nɛmthɛnɛ mu sɔ, ɔmar kȧmi ubɔthi lanɛ, kȧmȧ mə mar afəm abom aŋa po mar mi ka ȧkɛra kəfinɔ ka Kuru-e, yi Klɛmɛnt sɔ, dɛ yi aŋmar a mi alɔm aŋa ba ames maŋ ka ȧkȧfȧ ka aŋesəm.

⁴Ba nu məbɔnɛ ka ɔMarki lɔkɔ o lɔkɔ; ɔwa i kȧl pa yi sɔ, ba nu məbɔnɛ.

⁵Yɔ kȧmȧ wuni o wuni ɔ tȧrȧ mathɔfəl ma kamuyu ka nu. ƆMariki ɔ yi ufati.

⁶Te nu ba asoli ta koko, kɛrɛ rə tȧy o tȧy-e, kətȧŋȧnɛ ka kəramnɛ yi kənɛmthɛnɛ dɛ yi kəmuti mɔmɔ-e, yɔ kȧmȧ Kuru Məsaba ɔ tȧrȧ mȧyif ma nu.

⁷Ɔwa kaŋka mathɔfəl ma Kuru ama mə thas kəsɔthnɛ bɛ mə kɔtɛ ɛmerȧ yi ɛnanɛ ɛ nu rokor ka Yisɔs Kraystȧŋ.

⁸Ka kaləpsɔ, awɔnt, koko ara yi təteŋ, ara yi rə alambe, ara yi rəlompi, ara yi rəgbəraŋ, ara yi rəbɔthi kəli dɛ yi ara yi rəbɔthi təl; bepi ɔfinɔ ɔ yi, ɔwa sɔ-e, kəthɔkəs tȧy kə yi, botnɛ nu mȧtȧy ame rə ȧmerȧ.

⁹Ɔwa mȧtȧy ama minɛ i poŋ thəksa nu, dɛ yi ama nə poŋ təl dɛ yi nə po nənk do rɔmi, wop ma nu ɔbaksər. Ɔwa ɔKuru ka məthɔfəl ɔ tə yi yi naŋ.

¹⁰Kɛrɛ pə bɔnɛ mi ɔthasər rokor ka ɔMarki, pəkasifɛ nə kȧl nanɛ mi; tə tɛntɛnɛ nə la nanɛ mi kɛrɛ nə sɔthɔsnɛ hɛ afɛrɛ.

¹¹I fɔf hɛ ȧte salata ramɔnɛ ra mi, kotȧy-e i po thəkəs kəpa rəka o rəka ara i ba rə beki mi gbo.

¹²I tȧrȧ tə kəyira rə mɔnɛ, ɔwa i tȧrȧ sɔ tə kəyira ka rəyola; i tȧrȧ tə kənȧmrȧ, dɛ yi i tȧrȧ dor; i tȧrȧ sɔ kəba agbȧthi yi kəpȧŋ rəka o rəka.

¹³I gbəli yɔ tȧy o tȧy bɛ asabu ŋa Krayst ɔwe mə sɔŋ mi afɔsɔ.

¹⁴Kɛrɛ nə po yɔ ɔfinɔ tə kəgbasi ȧgbȧp ŋa ɛsɔmpanɛ ɛ mi.

¹⁵Naŋ ro Filipay nə tȧrȧ sɔ kəpa kȧbi ka katəp ka kawandi ȧkɛra kəfinɔ ka Kuru ma i wur ro Masidonia-e, ȧchɔch o chɔch aŋ pantnɛ hɛ mi rə kəsɔŋ dɛ yi kəsɔthɔ, thambe naŋ gbo son.

¹⁶Hali ma i yi ro Thɛsalonika-e, nə po somra tə kəmar mi katkat.

¹⁷Pə yi hɛ kəpa i thɛns aboya, kɛrɛ i thɛns kȧmȧ nə wurɔ məkomi məgbathi.

¹⁸Kɛrɛ i ba koko bɛ thɔŋ, rəgbathi gbo, ma i po sɔthɔ ka kȧta ka Ɛpafroditɔs aboya afinɔ aŋa nə po somra mi mɔ abɔnt afɔlfɔl, sathka təbɔthi malanɛ ȧtȧ mə bɔnɛs Kuru Məsaba.

¹⁹Kɛrɛ ɔKuru kȧmi ɔ tə yer nu ara nə yema bɛ, mɔlɔ ma rayola ra aŋyiki ŋɔŋ rə yi ka Yisɔs Krayst.

²⁰Ɔwa ka-ake ta ayiki aŋ yi ka Kuru ɔKas kȧsu thȧnkȧŋ o thȧnkȧŋ. Amina.

²¹I kori aŋsəm rokor ka Krayst Yisɔs bɛ. Aŋwɔnt aŋa yi yi minɛŋ aŋ kori nu sɔ.

²²Aŋsəm bɛ aŋ kori nu, pə tha gbethi aŋfəm ro seth ka Sisar.

²³Ta ȧŋboŋa ŋa ɔMarki kȧsu Yisɔs Krayst aŋ yi do rɔnu bɛ. Amina.