Read Ȧŋlemrȧnɛ Ȧfu AŋKɔlɔsi 1 Bible Online

AŋKɔlɔsi 1 - Ȧŋlemrȧnɛ Ȧfu bible

AŋKɔlɔsi 1

¹Pɔl usom ka Yisɔs Krayst ka mȧselɔ ma Kuru, yi Timɔthi ɔwɔnt su,

²ka aŋsəm ŋa Kuru yi aŋwɔnt abɔthi lanɛ ka Krayst ro Kɔlɔsi. Ta aboŋa aŋ yi rɔnu yi məthɔfəl kəwur ka Kuru ɔKas kȧsu yi ɔMarki Yisɔs Kraystȧŋ.

³Sə mɔmɔ Kuru ɔKas ka ɔMarki kȧsu Yisɔs Krayst, ma sə ramnɛ lɔkɔ o lɔkɔ ta ȧtȧ nu,

⁴ma sə po təl ta kȧlanɛ ka nu ka Yisɔs Krayst, dɛ yi mabɔthər ama nə ba ta aŋsəm bɛ,

⁵asabu ŋa kagbak ȧmerȧ ȧke a bɛnɛ ta ȧtȧ nu ro riyana, ȧke nə po təl kətȧŋȧnɛ ka ȧrim ra tȧteŋ ta ȧkɛra kəfinɔ ka Kuru.

⁶Ȧrim rati rə bek do rɔnu mɔ mȧ rə po yɔ ka ȧdȧru rəlolok bɛ. Ɔwa rə kȧl wurɔ ŋani mɔ mə rə yɔ do rɔnu kȧbi ka ȧŋrey ma nə mɔtha təl, ɔwa nə mɔtha tȧrȧ ȧŋboŋa ŋa Kuru təteŋ;

⁷mɔ mȧ nə po thəkəs ka Ɛpafras, ȧbɔy ukos a su ubɔthər. Kɔnɔ yi uyɔ məpanth ubɔthi lanɛ ka ɔMarki ta ȧtȧ su.

⁸Ɔwa ɔ po tɔri su mabɔthər ma nu rə ɔYina məsəm.

⁹Ȧtesoma-e saŋ sɔ, kȧbi ka ȧŋrey aŋa sə po təl ti-e, sə tey hɛ bɛ tə kəramnɛ dɛ yi kənɛmthɛnɛ ta ȧtȧ nu, kaŋka nə la yi kȧtȧrȧ ka mȧselɔ mɔŋ, rə kətemp dɛ yi kətara tȧy bɛ rə ɔYina.

¹⁰Kama nə kɔth ɔbeki ka ɔMarki yi kəbɔnɛs tȧy bɛ, dɛ yi kȧmȧ nə wurɔ məkomi rə məyɔs o məyɔs məfinɔ, kȧmȧ nə bȧrnɛ sɔ-e ka kȧtȧrȧ ka Kuru.

¹¹Kaŋka a bȧksər nu rə afɔsɔ bɛ kətȧŋȧnɛ ka ɔninis wa aŋfɔsɔ ŋa aŋyiki ŋɔŋ, kəkɔ ka kȧmuyu kəlele rə məbɔnɛ.

¹²Kama nə sɔŋ mɔmɔ ka ɔKas ɔwe po yɔ su sə yi saŋ abeki tə kəkasa ka akɛŋ ka aŋsəm ka ɔwaŋ;

¹³ɔwe po wurɔ su ka aŋfɔsɔ ŋa asum, kɔ po wɔŋȧ su ka rȧbȧy ra ɔWan ka mabɔthər mɔŋ.

¹⁴Do rɔŋɔŋ sɔ sə ba kəbani salata mȧtir mɔŋ, pə yi mɔ-e, katerɔ ka ɛhakɛ ɛ su;

¹⁵ɔwe yi mȧbȧlȧnɛ ma Kuru ɔwe sə te tha nəŋka rəfɔr, ɔWan utɔtɔkɔ ka ɛyɛt ɛtəpi bɛ.

¹⁶kotȧy-e, ka aŋyɛthɛ ŋɔŋ ɔ təpi ɛyɛt bɛ, ɛyɛt ya ro riyana, yi nɔru, ɛyɛ mȧ sə nəŋka rəfɔr dɛ yi ɛyɛ mȧ sə te nənk, pə yi təbȧy-o, təthɔf-o, ɛbomp-o, thalɔm agbəka-o; a təpi ɛyɛt bɛ do rɔŋɔŋ dɛ yi kətȧŋȧnɛ kɔŋ.

¹⁷Kɔnɔ yi rodi ka koko bɛ, dɛ yi ka aŋfɔsɔ ŋɔŋ koko rə yi.

¹⁸Kɔnɔ yi rȧbomp ra ȧŋdɛr, pə yi mɔ aŋchɔch. Kɔnɔ yi ɔtəpɛr sɔ, dɛ yi ɔWan utɔtɔkɔ kəwur kətɔŋ ka aŋfi, kȧmȧ pə gbəli yi rə tȧy o tȧy ɔ ba matəma mətɔtɔkɔ.

¹⁹kotȧy-e, pə bɔnɛ ɔKas kȧmȧ ɔlasər ɔlolok wa rawuni ra Kuru ɔ gbəli yianɛ do rɔŋɔŋ.

²⁰Ɔwa sɔ-e, kətaŋ do rɔŋɔŋ-e, ɔKas ɔ botəs kȧmȧ rəka o rəka rə kȧl manɛ dɛ yi kɔn, ma ɔ po kȧrȧ məthɔfəl ka mȧtir ma akənt kəpəŋkinɛ kɔŋ; yao, kətȧŋȧnɛ do rɔŋɔŋ, pə yi ɛyɛt ya ȧdȧru-e, thalɔm ɛyɛt ya ro riyana.

²¹Ɔwa naŋ, ma nə la ba ɛmerȧ ɛbɔlanɛ dɛ yi ɛgbɛŋanɛ salata mȧyɔs ma nu mələs-e,

²²halisa ka-ake ka ȧŋdɛr ŋɔŋ ŋa rawuni kəpet, ɔ po yɔ kȧmȧ nə kȧl manɛ kətȧŋȧnɛ ka rafi rɔŋ, kȧmȧ ɔ təmər nu asəm dɛ yi agbəraŋ kəte ba məthɛkɛ rodi kɔŋ.

²³Bepi pə yi gbo-e nə bȧkər asɔbɛ ka kȧlanɛ, ɔwa nə təmȧ kəŋkəŋ abȧki gbaŋ, nə gbapɛ hɛ kagbak ȧmerȧ ka nu ka ȧkɛra kəfinɔ ȧke nə po təl, dɛ yi ȧke a po kawandi ka wuni o wuni nɔru. Ɔwa minɛŋ, Pɔl, a səki mi ukɔtha ka ȧkɛra kati.

²⁴Ka-ake i ba məbɔnɛ asabu ŋa ɛsɔmpanɛ ɛ mi ta ȧtȧ nu, ka i lasər ȧŋsɔmpanɛŋ ŋa Krayst ka ȧŋdɛr a mi salata ȧŋdɛr ŋɔŋ, pə yi mɔ-e, aŋchɔch.

²⁵Di kati a səki mi usom kətȧŋȧnɛ ka aŋgbɛthɛŋ aŋa Kuru ɔ maŋkər mi ta ȧtȧ nu, tə kətɔri ɔlasər wa ȧrim ra Kuru Məsaba;

²⁶hali aŋgbundu aŋa a la maŋk kəwur ka ɛyamana ya təkomra bɛ ȧtȧ po thas, kɛrɛ ka-ake a ŋaibi ŋi gbafəth ka afəm ŋɔŋ asəm.

²⁷Pə bɔnɛs Kuru sɔ tə kətɔri ŋa rayola ra aŋyiki ŋa aŋgbundu aŋe kətɔŋ ka tȧbona təlɔm; aŋa mə yi Krayst rokor ka nu, kagbak ȧmerȧ ka ayiki.

²⁸Ɔwa sə taməs rə kəmaŋ wuni o wuni dɛ yi kəthəksa wuni o wuni rə kətemp bɛ; kȧmȧ sə gbəli lȧnki wuni o wuni ugbenthis rokor ka Krayst Yisɔs.

²⁹Ka ɔthalnɛ wati i wopər sɔ mapanth, ka i tǝlnɛ sɔbɛ kətaŋ ka mapanth məninis ama kɔnɔ mɔ yɔ rokor kȧmi.