Read Ȧŋlemrȧnɛ Ȧfu 1 AŋThɛsȧlonika 4 Bible Online

1 AŋThɛsȧlonika 4 - Ȧŋlemrȧnɛ Ȧfu bible

1 AŋThɛsȧlonika 4

¹Ka kaləpsɔ sə nɛmthɛnɛ nu awɔnt, ɔwa sə maŋ nu ka ɔMarki Yisɔs, kəpa mɔ mə sə po tɔri nu to nə yi tə kəkɔth dɛ yi tə kəbɔnɛs Kuru-e, mɔlɔ min mɔ mə nə kɔth thɔŋ ka-ake, ɔwa bȧsər nu kɔ kədi.

²kotȧy-e nə tȧrȧ ko ayamari sə sɔŋ nu kətȧŋȧnɛ ka ɔMarki Yisɔsȧŋ.

³kotȧy-e mȧselɔ ma Kuru, miyȧŋ, hali kasəməs ka nu, kȧmȧ nə te yɔ kərəp.

⁴Kama runi o runi ɔ tȧrȧ tə kəgbasi urani ɔwe yi ɔkɔŋ gbeŋ, ka rəsəm dɛ yi ayiki;

⁵pə yi hɛ ka mafela mələs ma madɛr mɔ akafri aŋa te tȧrȧ Kuru.

⁶Kama wuni o wuni ɔ te yɔ ɔwɔnt kɔŋ ɔləs rə tȧy o tȧy, pəkasifɛ ɔMarki ɔ yi ukala ka mȧtȧy ame bɛ, mɔ ma sə po maŋ nu rə kəbɔthi lanɛ.

⁷kotȧy-e Kuru ɔ tela hɛ su salata mənɔkɔ, kɛrɛ ta rəsəm.

⁸Tiyȧŋ ɔwe mə farki ȧŋmȧŋ aŋe ɔ farki hɛ wuni kəpet, thambe Kurɔŋ ɔwe po sɔŋ nu ɔYina kɔŋ uməsəm.

⁹Kɛrɛ ka ȧŋpa ŋa məbɔthər ma rəwɔnt, i ba hɛ tə kəgbalər nu, kotȧy-e Kuru kɔnɔ po thəksa nu tə kəbɔthəranɛ.

¹⁰Tə tɛntɛnɛ nə bɔthər aŋwɔnt bɛ aŋa yi ro Masidoniya; kɛrɛ sə nɛmthɛnɛ nu, awɔnt, kȧmȧ nə bȧr gbo yɔ yi.

¹¹Ta nə thɛns məthɔfəl, ɔwa wuni o wuni ɔ yi tə kəkəlianɛ aŋgbɛthɛŋ ŋɔŋ gbeŋ rə kəyɔ məpanth yi mȧta mɔŋ mɔ mə sə yamari nu,

¹²kȧmȧ nə gbəli kɔth ɔlompi kətɔŋ ka ŋaŋ aŋa te lanɛ, kȧmȧ pə re yi nə te paŋ rəka o rəka.

¹³Kɛrɛ awɔnt, i yema kȧmȧ nə tȧrȧ ta ŋaŋ aŋa po thas, kȧmȧ nə te bok mɔ mə ŋaŋ aŋa te ba kəgbak ȧmerȧ,

¹⁴kotȧy-e bepi sə lanɛ kəpa Yisɔs ɔ fi, kɔ kȧl yokanɛ ka rafi-e, ya pə yi sɔ ŋaŋ aŋa fi ka Yisɔs-e, Kuru ɔ tə kȧl kȧrȧ ŋa dɛ yi kɔn.

¹⁵Sə pa ȧte do rɔnu ka ȧrim ra ɔMarki, kəpa saŋ aŋa yi ras nɔru haŋ ɔMarki ɔ der-e, sə gbəli hɛ mɔtha ŋaŋ aŋa po thas.

¹⁶kotȧy-e ɔMarki gbeŋ ɔ tə thor kəwur ro riyana rə kəgbelegbele kəbana, dɛ yi ȧrim ra wurɔ ubana, dɛ yi kathɛma ka Kuru; ɔwa aŋfi rokor ka Krayst aŋ tə mɔtha yokanɛ.

¹⁷Rodarəŋ kati saŋ aŋa yi nɔru a tə sɛmpi su yi ŋaŋ lɛɔ ka kȧriyana tə kəbəp ɔMarki ka kafena; ɔwa tiyȧŋ sə tə yi yi ɔMarki thəbana.

¹⁸Te ba ti bɛfəthanɛ ɛmerȧ ɛ nu rə ȧsim ȧte.