Read Ȧŋlemrȧnɛ Ȧfu 1 AŋThɛsȧlonika 5 Bible Online

1 AŋThɛsȧlonika 5 - Ȧŋlemrȧnɛ Ȧfu bible

1 AŋThɛsȧlonika 5

¹Kɛrɛ sə ba hɛ tə kəgbalər nu awɔnt, ta marey yi ɛlɔkɔ ya karen.

²Pəkasifɛ naŋ nə tȧrȧ finɔ kəpa ȧŋrey ŋa ɔMarki aŋ tə der mɔ ukei tȧtȧk.

³kotȧy-e maŋ pa, Məthɔfəl dɛ yi kəpantay; ka ɔlɛmp wati kədinɛ kəsembu kə tə bəp ŋa, mɔ ɔbaŋ wa kəkom, kaŋ ba hɛ roŋ o roŋ tə kəkisi kəwur ka masibo mati.

⁴Kɛrɛ awɔnt, nə yi hɛ ka asum, kȧmȧ ȧŋrey ŋati aŋ bəp nu naŋ mɔ ukei.

⁵Naŋ bɛ nə yi aŋwuth ŋa ȧŋmothȧ dɛ yi aŋwuth ŋa rəyaŋ; sə yi hɛ ka rȧtȧtȧk, thalɔm ka ȧŋsum.

⁶Tiyȧŋ maŋ te nu dirȧ, mɔ aŋfəm alɔm nɔru, kɛrɛ maŋ bum nu; maŋ yi nu atempi.

⁷kotȧy-e ŋaŋ aŋa dirȧ aŋ dirȧ tȧtȧk, ɔwa ŋaŋ aŋa tis aŋ tis tȧtȧk.

⁸Kɛrɛ saŋ, ma sə yi ka rəyaŋ, ta sə yi saŋ agbɛt, maŋ wɔŋ nu ɛfȧt ya aŋkəpəth ya kəlanɛ dɛ yi məbɔthər; ɔwa ta ɛsənder ɛ su-e, kəgbak ȧmerȧ ka kȧkisi.

⁹kotȧy-e Kuru ɔ thith hɛ su ta rəbaŋ, kɛrɛ tə kəsɔthɔ kəkisi kətȧŋȧnɛ ka ɔMarki kȧsu Yisɔs Kraystȧŋ;

¹⁰ɔwe po fi ta ȧtȧ su, kȧmȧ bepi pə yi sə thəmɛ kəyi akəli-e, thalɔm sə dirȧ rə kəfi-e, sə tə ba aŋesəm dɛ yi kɔn.

¹¹Tiyȧŋ maŋanɛ nu, ɔwa bȧkəsȧnɛ nu mɔ mə nə tɛntɛ kəyɔ.

¹²Sə nɛmthɛnɛ nu awɔnt, kȧmȧ nə yikis ŋa aŋa yɔ məpanth kətɔŋ ka nu, pə yi mɔ ŋaŋ aŋa yi rokɔm ka nu ka ɔMarki, aŋa mə maŋ nu.

¹³Ɔwa nə yi tə kəlambe ŋa finɔ ka məbɔthər salata mapanth maŋ. Kal ba nu məthɔfəl kətɔŋ ka nu.

¹⁴Sə nɛmthɛnɛ nu awɔnt, maŋ ŋaŋ aŋa yi ȧthȧnthonɛ, ɔwa thɔnthɔ nu aŋyay rə amera-e, mar ŋa nu aŋa te ba afɔsɔ-e, muyu nu afəm bɛ.

¹⁵Kəli ti nu kȧmȧ wuni o wuni ɔ te kala tələs ta tələs; kɛrɛ tȧŋ nu mȧtȧy məfinɔ lɔkɔ o lɔkɔ ukin ka ulɔm, dɛ yi ka afəm bɛ.

¹⁶Ba nu məbɔnɛ lɔkɔ o lɔkɔ.

¹⁷Te nu tey kəramnɛ.

¹⁸Sɔŋ mɔmɔ rə tȧy o tȧy, kotȧy-e mȧselɔ ma Kuru kətȧŋȧnɛ ka Krayst Yisɔs ta ȧtȧ nu miəŋ.

¹⁹Te nu dimsi ɔ Yina məsəm.

²⁰Te nu farki ȧsim ta Aŋnȧbi.

²¹Mɛm nu tȧy o tȧy; gbȧpsȧ nu tȧfinɔ fȧp.

²²Gbapɛ nu tələs yi məbalanɛ o məbalanɛ mati.

²³Kaŋka ɔKuru ka məthɔfəl gbeŋ ɔ səməs nu ɔlolok; aŋko, ɔ bɛnɛ ɛyina, yi ɛŋesəm, dɛ yi madɛr ma nu ɛgbenthis, kəte ba məthɛkɛ haŋ kȧder ka ɔMarki kȧsu Yisɔs Krayst.

²⁴Kɔn ɔwe tela nu ɔ yi ubɔthi lanɛ, ɔwa ɔ tə yɔ ti.

²⁵Awɔnt, ramnɛ nu ta ȧtȧ su.

²⁶Kori nu aŋwɔnt bɛ rə kəmuməl kəsəm.

²⁷I yamari nu ka ȧŋes ŋa ɔMarki kȧmȧ a karaŋ ȧŋreka aŋe ka aŋwɔnt bɛ.

²⁸Ta ȧŋboŋa ŋa ɔMarki kȧsu Yisɔs Krayst yi dɛ yi nu bɛ. Amina.