Read Ȧŋlemrȧnɛ Ȧfu 2 AŋThɛsȧlonika 3 Bible Online

2 AŋThɛsȧlonika 3 - Ȧŋlemrȧnɛ Ȧfu bible

2 AŋThɛsȧlonika 3

¹Ka kaləpsɔ awɔnt, ramnɛ nu ta ȧtȧ su kȧmȧ ȧrim ra ɔMarki rə gbəli gbukɛ rodi, rə kəsɔthɔ yiki mɔ mə rə poŋ thɔŋ sɔthɔ do rɔnu,

²dɛ yi kȧmȧ sə fisȧ kəwur ka afəm abȧki rəfɔr dɛ yi afəm aləs; kotȧy-e pə yi hɛ afəm bɛ aŋa ba kəlanɛ.

³Kɛrɛ ɔMarki ɔ yi ubɔthi lanɛ, ɔ tə yɔ nu nə təmȧ kəŋkəŋ, ɔwa ɔ tə kȧl bumər nu sɔ ka mȧtȧy mələs.

⁴Sə ba kəpələnɛ ka ɔMarki ta ȧtȧ nu, kəpa ya nə po yɔ, ɔwa ya mə nə kɔ kəyɔ sɔ.

⁵Kaŋka ɔMarki ɔ kɔtha ɛmerȧ ɛ nu ka mabɔthər ma Kuru, dɛ yi rə kəmuyu haŋ kȧder ka Krayst.

⁶Sə yamari nu, awɔnt, ka ȧŋes ŋa ɔMarki kȧsu Yisɔs Krayst, kȧmȧ nə gbaskinɛ kəwur ka uwɔnt o wɔnt ɔwe mə kɔth rə kəthanthonɛ, thalɔm ɔ wop hɛ mathəksa ama sə po sɔŋ.

⁷kotȧy-e naŋ nə tȧrȧ kəpa nə yi tə kətansanɛ su; pəkasifɛ sə kɔth hɛ ɔləs kətɔŋ ka nu.

⁸Sə səkɛ hɛ kothe ta wuni o wuni; kɛrɛ sə bȧsər kəyɔ məpanth gbɛs pali-əŋ, kȧmȧ sə te kɛthas wuni o wuni kətɔŋ ka nu.

⁹Pə yi hɛ kəpa sə ba hɛ mamari mati, kɛrɛ sə fela tə kəsɔŋ nu amɔl kȧmȧ nə tansanɛ su.

¹⁰Hali ka ȧŋlɔkɔ sə yi dɛ yi naŋ-e, sə yamari nu kəpa bepi wuni o wuni ɔ teselɔ yɔ məpanth-e, ta ɔ te di.

¹¹kotȧy-e sə təl kəpa alɔm aŋ yi kətɔŋ ka nu aŋa te kɔth ɔfinɔ, maŋ yi ayay, ɔwa aŋ kɔtha gbo ɛfɔf.

¹²Sə yamari dɛ yi sə maŋ afəm awunɔŋ ka ɔMarki kȧsu Yisɔs Kraystȧŋ, kȧmȧ aŋ yɔ mapanth maŋ ka məthɔfəl, ɔwa ta aŋ kȧl bulɔ tə kəsɔthɔ ara mə aŋ gbəli di.

¹³Kɛrɛ naŋ, awɔnt, ta pə te lela nu tə kəyɔ təfinɔ.

¹⁴Ɔwa bepi wuni o wuni ɔ bɛnɛ hɛ ȧtȧ sə po pa ka ȧŋreka aŋe-e, lomar nu ɔwuni kati, ɔwa gbaskinɛ nu kəwur do rɔŋɔŋ, kȧmȧ ɔ lap.

¹⁵Ɔwa te nu nənk kɔ mɔ utheranɛ, kɛrɛ maŋ kɔ mɔ uwɔnt.

¹⁶Kaŋka ɔMarki gbeŋ ka məthɔfəl ɔ sɔŋ nu məthɔfəl lɔkɔ o lɔkɔ rə tȧy o tȧy. Ta ɔMarki ɔ yi dɛ yi naŋ bɛ.

¹⁷Aŋkori ŋa kȧta kȧmi Pɔl, aŋa yi aŋlomar a mi rə areka o areka ŋi aŋe.

¹⁸ȧŋboŋa ŋa ɔMarki kȧsu Yisɔs Krayst aŋ yi dɛ yi naŋ bɛ. Amina.