Read Ȧŋlemrȧnɛ Ȧfu 1 Timɔthi 1 Bible Online

1 Timɔthi 1 - Ȧŋlemrȧnɛ Ȧfu bible

1 Timɔthi 1

¹Pɔlȧŋ ɔsom ka Yisɔs Krayst asabu ŋa aŋyamari ŋa Kuru ɔKisis kȧsu, yi ɔMarki Yisɔs Krayst, ɔwe yi ɔgbak ȧmerȧ kȧsu;

²ka Timɔthi ɔwan kȧmi gbeŋ ka kȧlanɛ. Ta aboŋa, yi ȧney, yi məthɔfəl ɛ yi ro rɔmu, kəwur ka Kuru ɔKas kȧsu yi ka Yisɔs Krayst ɔMarki kȧsu.

³Ma i yi ka ȧŋbiyas aŋe ro Masidonya-e, i poŋ pər mu kȧmȧ mə tiyȧ ro Ɛfisɔs tə kəmaŋ afəm alɔm kȧmȧ aŋ te thəksa təpa o pa təlɔm təfu.

⁴Thalɔm kȧmȧ aŋ te sua ɛləns ka ɛmump yi ɛbȧrki ɛte ba ɔthalnɛ salata tȧkomra təbana, ɛyɛ mə kȧrȧ gbo məsɔkanɛ; beta ti, ta aŋ rusəm aŋfəm ka tȧteŋ yi ka ɛpa ya kȧlanɛ. Yaŋ mə yi tə kəyɔ.

⁵kotȧy-e ɔgbanthir wa aŋgbɛthɛŋ a su ɔ yi məbɔthər kəwur rə ȧmerȧ ȧferȧ, yi rə asɔŋ agbəraŋ, yi rə kəlanɛ rə tȧteŋ.

⁶Ɔwa alɔm, maŋ pənɛ ȧte-e, aŋ po yɛthȧ ka aroŋ rə kətȧŋȧnɛ sim təfoth.

⁷Ȧtesoma-e aŋ yema səkɛ akarmɔkɔ ŋa ȧŋthɔ, hali ma pə yi-e aŋ te hɛ ȧtȧ maŋ pa, thalɔm ȧtȧ mə aŋ fɔf.

⁸Kɛrɛ sə tȧrȧ kəpa ȧŋthɔ aŋ yi afinɔ bepi wuni ɔ tȧŋ ŋi ɔlompi.

⁹Ma sə tȧrȧ kəpa ȧŋthɔ aŋ yi hɛ ta wuni lompi, kɛrɛ ta ȧtȧ ŋaŋ aŋa te sanɛ-e, ta ante lanɛ, yi ta afəm ŋa ahakɛ-e, ta aŋləsər məsəm-e, yi ta ŋaŋ aŋa mə dif akas yi akara-e, dɛ yi ta adif afəm kəsias-e,

¹⁰ta arəpi, ta ŋaŋ aŋa yɔ aŋhakɛ ŋa aŋSɔdɔm-e, ta anthila afəm-e, ta ayem dɛ ta aŋa mə sɔŋ məseri ma rəyem-e, yi ta tȧy o tȧy ȧtȧ mə pɛnsa tȧteŋ;

¹¹ȧtȧ yi mɔlɔ min yi ȧkɛra kəfinɔ ka ɔKuru ka aruba, ȧke a po maŋkər ro rɔmi.

¹²Ɔwa i mɔmɔ Yisɔs Krayst ɔMarki kȧsu ɔwe bȧksər mi, pəkasifɛ ɔ nənk mi ubɔthi lanɛ, yi ubeki, kɔ wɔŋȧ mi ka mapanth mɔŋ;

¹³minɛ ɔwe la yi wuni ŋamnɛ Kurɔŋ dɛ yi wuni thalər aŋchɔch, ka i la ləsər ɛpa yɔŋ bɛ. Kɛrɛ i po sɔthɔ ȧney pəkasifɛ i yɔ ti ka kȧte tȧrȧ yi kȧte lanɛ.

¹⁴Ɔwa ȧŋboŋa ŋa ɔMarki kȧsu aŋ yi abana athasər ta ȧtȧ mi, kaŋ sɔŋ mi kȧlanɛ yi mabɔthər ka Krayst Yisɔsȧŋ.

¹⁵Ȧŋpa aŋe aŋ yi abɔthi malanɛ bɛ, ɔbeki ta afəm bɛ tə kəlanɛ, kəpa ye Krayst Yisɔs ɔ der ka ȧdȧru tə kəkisis afəm ŋa ahakɛ; ɔwa minɛ yi ɔbȧy ka ŋaŋ.

¹⁶Kɛrɛ a nəŋka mi ȧney, minɛ ɔwe tha yi uləs bɛ, kȧmȧ Yisɔs Krayst ɔ gbəli tɔri kamuyu kɔŋ kəwoni, mɔ amɔl ta ȧtȧ ŋaŋ aŋa ba kəlanɛ kɔ kədarəŋ kati, salata aŋesəm thəbana.

¹⁷Ɔwa ka-ake, ta ɔBȧy ka thəbana, ɔwe te fi, ɔwe sə te nəŋka rəfɔr, ɔKuru utempi son, ta ɔ sɔthɔ yiki yi kəkolo thȧnkȧŋ thəbana, Amina.

¹⁸Aŋyamari aŋe i po maŋkər mu, Timɔthi ɔwan kȧmi, pə yi mɔ-e, dim din ȧtȧ Aŋnȧbi aŋ po thɔŋ tɔri mu; kȧmȧ mə gbəli tim kətim kəfinɔ salata ɛpa ɛye.

¹⁹bȧkər ka kȧlanɛ, yi asɔŋ agbəraŋ; ma alɔm aŋ gbapɛ aŋe-e, aŋ po ləsər kȧlanɛ ka ŋaŋ.

²⁰Haminiyɔsȧŋ yi Alɛksandaŋ ŋa yi awunɔŋ, aŋa i po lȧnki ka Sethani, kȧmȧ aŋ thəkəs tə kəte fɔf Kuru ɔləs.