Read Ȧŋlemrȧnɛ Ȧfu 1 Timɔthi 5 Bible Online

1 Timɔthi 5 - Ȧŋlemrȧnɛ Ȧfu bible

1 Timɔthi 5

¹Te ŋal ubaki, kɛrɛ nɛmthɛnɛ kɔ mɔ ukas; yi aŋlaŋgba sɔ mɔ awɔnt.

²Aŋfəm abom abȧki mɔ akara, dɛ yi abɔrkɔ mɔ awɔnt afɛth rə ȧmerȧ ȧferȧ bɛ.

³Yikis abora aŋa yi abora tə tɛntɛnɛ.

⁴Kɛrɛ bepi ubora ɔ ba awuth thalɔm arok-e, ta ŋaŋ aŋ mɔtha thəkəs aŋgbɛthɛŋ ŋa adina salata kabɔr ka ŋaŋ, kȧmȧ aŋ sɔŋ ka aŋa kom ŋa; ȧtesoma-e ȧte tə yi təfinɔ dɛ yi təmari rodi ka Kuru Məsaba.

⁵Ma pə yi-e ubora tə tɛntɛnɛ ɔwe tiyȧ fu, ɔ gbak ȧmerȧ ka Kuru, kɔ bȧsər nɛmthɛnɛ yi kəramnɛ gbɛs pali-əŋ,

⁶kɛrɛ ubora ɔwe bɔthər mabɔnɛ ma raru-e ɔ yi ufi hali ma ɔ yi ras ukəli.

⁷Tiyȧŋ maŋ ŋa ta mȧtȧy ame kȧmȧ məthɛkɛ mə te ba kəyi.

⁸Kɛrɛ bepi wuni ɔ thɛn hɛ ta aŋfəm ŋɔŋ aŋa kəlianɛ kɔ, pə tha gbethi ȧŋbɔnshɔ ŋɔŋ gbeŋ-e ɔ po pɛnsa kȧlanɛ ɔwa ɔ yi uləs pəthasi ŋaŋ aŋa te lanɛ.

⁹Te selɔ tə kəwɔŋa ubora ɔwe te ba təren təgba təsas, ɔwe la yi ɔrani ka uwos ukin,

¹⁰ɔwe ba ŋes afinɔ ta mȧyɔs mɔŋ məfinɔ, bepi ɔ po rusəm awuth-e, bepi ɔ po fantha atik-e, bepi ɔ po yak ȧtȧtək ta aŋfəm ŋa Kuru-e, bepi ɔ po mar ȧŋmɔnɛ-e, bepi ɔ po pantnɛ rȧ məpanth o məpanth ama yi məfinɔ.

¹¹Kɛrɛ pɛnsa ȧŋbora afɛth, kotȧy-e maŋ təp tə kəba ɛfela kəŋamnɛ Kraystȧŋ-e aŋ tə kȧl balȧ.

¹²kaŋ ba mətheri, pəkasifɛ aŋ po ləsər aŋsekərnɛ ŋaŋ ȧtɔtɔkɔ.

¹³Ka pə re yi aŋ thəkəs tə kəyi ayay, maŋ kɔth kɔth rə seth o seth; aŋ yi hɛ gbo ayay, kɛrɛ aŋ tə səkɛ amunafaki yi akɔtha ɛfɔf ɛyɛ aŋ te yi tə kəfɔf.

¹⁴Tiyȧŋ i yema kȧmȧ ȧŋbora afɛth aŋ balȧ, aŋ kom awuth, aŋ bɛnɛ ȧŋseth kȧmȧ aŋ te sɔŋ ɔtheranɛ məmari tə kəthɛkɛ,

¹⁵kotȧy-e alɔm aŋ thayoŋ tə kətaŋ Sethani.

¹⁶Bepi wuni o wuni ɔwe lanɛ ɔ ba abora aŋa mǝ kəlianɛ kɔ tə kəsɔthɔ kəmar-e, ɔ yi tə kəmar ŋa kȧmȧ aŋchɔch aŋ te ba aŋgbɛthɛŋ ŋati. Kama aŋchɔch aŋ gbəli mar ŋaŋ aŋa yi abora atiya fu tə tɛntɛnɛ.

¹⁷Ta aŋbȧki aŋa yɔ mapanth maŋ finɔ aŋ sɔthɔ yiki mȧrəŋ mȧrəŋ, pə tha gbethi ŋaŋ aŋa mə kawandi yi aŋa mə thəksa,

¹⁸kotȧy-e mȧgbal məsəm mə pa hɔ, Te fɔkər kȧsəŋ ka anthura ɔwe mə sap ȧpəla, dɛ yi hɔ, Ɔbulɔ ɔ mar sɔthɔ ȧŋrȧm ŋɔŋ.

¹⁹Te gbək kətək kəŋamnɛ ubaki ka ȧŋseth ŋa Kuru thambe ka kabəpər ka məseri mȧrəŋ thalɔm asas.

²⁰Ŋal ŋaŋ aŋa mə yɔ ɛhakɛ ka kȧbəprȧnɛ ka aŋfəm, kȧmȧ aŋlɔm aŋ nesa.

²¹I yamari nu rodi ka Kuru yi ɔMarki Yisɔs Krayst, yi ka aŋmȧleka athith, kȧmȧ mə yɔ ȧtȧy ȧte rə kəte wop ŋin pəthasi alɔm, yi kəte yɔ agbȧy.

²²Te yeŋk reŋ wuni məta tə kəyɔ kɔ ubaki ka aŋchɔch; ɔwa te kulunɛ ka maləs ma afəm alɔm. Bɛnɛ ȧŋmerȧ a mu ȧferȧ pər.

²³Te sɔ mun mȧnt, kɛrɛ mun məwain məthan salata kate ka mu yeŋk mədɛr.

²⁴Ɛhakɛ ya afəm alɔm ɛ wur gbafəth ka ȧdȧru are, ɛ təmȧ ŋaŋ kədi ka karɔk ɛpa; kɛrɛ ɛhakɛ ya alɔm ɛ ləpsɔ tȧŋ ŋa.

²⁵Ya pə yi sɔ-e, mȧyɔs məfinɔ ma afəm alɔm mə wur gbafəth ka-ake; ɔwa mȧtȧy məlɔm ama te ŋaibinɛ ka-ake mə gbəli hɛ tiyȧ ro maŋknɛ haŋ thȧnkȧŋ.