Read Ȧŋlemrȧnɛ Ȧfu 1 Timɔthi 6 Bible Online

1 Timɔthi 6 - Ȧŋlemrȧnɛ Ȧfu bible

1 Timɔthi 6

¹Ta ŋa bɛ aŋa yi ka rȧtar aŋ yikis aŋmarki ka ŋaŋ kȧmȧ aŋ te fɔf ȧŋes ŋa Kuru yi ɛpa yɔŋ ɔləs.

²Ŋaŋ aŋa ba amarki apoŋ lanɛ, ŋa yi hɛ tə kəfəŋfsir ŋa, kotȧy-e ŋa yi rəwɔnt; kɛrɛ ta aŋ bȧr gbo yɔna ŋa rə ȧmerȧ ȧferȧ, ȧtesoma-e aŋa mə sɔthɔ kayɔna kati ŋa yi alanɛ yi ayathki. Ɔwa maŋ dɛ yi thəksa mȧtȧy ame.

³Bepi wuni o wuni ɔ thəksa tȧy təlɔm, ɔwa ɔ pɛnsa sim təlompi, hali ȧsim ta ɔMarki kȧsu Yisɔs Kraystȧŋ, yi mathəksa ma təteŋ salata ranes ra Kuru.

⁴Ɔkati ɔ yi ubonɛ tȧy, ɔ tɛ hɛ koko, ɔ nanɛ gbo tə kəthoŋka thoŋka ȧke kȧrȧ məputhanɛ, yi kəgbal, kətut, kənal dɛ yi ananɛ aləs, dɛ yi

⁵kapɛnsanɛ ka afəm aŋa ba ɛnanɛ ɛləs, aŋa te tȧrȧ tȧteŋ, ɔwa aŋ nanɛ kəpa kəfatər Kuru kə yi aroŋ da kəsɔthɔ.

⁶Kɛrɛ kȧfatər Kuru yi kəwasa, kəsɔthɔ kəbana kaŋ.

⁷kotȧy-e sə kȧrȧ hɛ rəka o rəka ka ȧdȧru are, ɔwa tə tɛntɛnɛ sə gbəli hɛ kera rəka o rəka kəwur ri.

⁸Ɔwa, bepi sə ba da rədi yi ɛlopra, ta pə bek su.

⁹Kɛrɛ afəm aŋa fela rəyola aŋ tə fumpɔ ka agbɔns yi məgbət, yi ka ɛfela ɛləs ɛgbathi ɛyɛ mə kera afəm ka kadinɛ.

¹⁰kotȧy-e mabɔthər ma akala mȧ yi anthəŋk ŋa mȧləs tətəp tətəp bɛ; ta salata mafela ame-e, alɔm aŋ po bɔlȧnɛ kȧlanɛ, kaŋ po sɔthɔnɛ ɛpa ɛbaŋ dəbuth ɛgbathi.

¹¹Kɛrɛ munɔ, mun wuni ka Kuru-e, gbukɛ mȧtȧy ame; tȧŋ məlompi dɛ yi məsəm ama yi təteŋ rodi ka Kurɔŋ, yi kəlanɛ, yi məbɔthər, yi kəmuyu, yi kəthoranɛ.

¹²Tim katim kəfinɔ ka kalanɛ, wopnɛ aŋesəm thəbana ta ȧtȧ a po tela mu, yi ta ȧtȧ mə po sɔŋ məseri məfinɔ rodi ka məseri məgbathi.

¹³I maŋ mu ka kȧbəprȧnɛ ka Kuru, ɔwe mə sɔŋ ŋesəm ka koko bɛ ara ɔ bɛmpa, dɛ yi rodi ka Yisɔs Kraystȧŋ, ɔwe po sɔŋ məseri məfinɔ rodi ka Pɔntiɔs Pailat-e.

¹⁴Ɔwa bɛnɛ aŋyamari aŋe finɔ, kəte ba apora thalɔm məthɛkɛ, haŋ ɔMarki kȧsu Yisɔs Krayst ɔ kȧl der.

¹⁵Ɔwa a ba kətɔri ti ka ȧŋlɔkɔ ŋati kətȧŋȧnɛ ka ɔwe yi ɔGbəka uruba son, ɔBȧy ka abȧy yi ɔMarki ka amarki;

¹⁶ɔwe pə yi kɔn son ɔ ba aŋesəm thəbana ka aŋyɛthɛ ŋɔŋ, rə kəyira ka ȧŋmothȧ aŋa wuni o wuni ɔ gbəli hɛ fatər; ɔwe wuni o wuni ɔ te tha nənk, ta a pa ras ɔ gbəli hɛ nənk; ɔwe ba yiki yi afɔsɔ thȧnkȧŋ thəbana, Amina.

¹⁷Maŋ ŋaŋ aŋa ba rəyola ka ȧdȧru are kȧmȧ aŋ te ba kəbonɛ tȧy, ɔwa kȧmȧ aŋ te gbak ȧmerȧ ka rayola ara ba kəpoŋ, kɛrɛ ka ɔKuru ukəli, ɔwe po sɔŋ su tȧy o tȧy təfinɔ ta mabɔnɛ ma su.

¹⁸Maŋ ŋa kȧmȧ aŋ yɔ təfinɔ, dɛ yi kȧmȧ aŋ yi ayola ka mȧyɔs məfinɔ dɛ yi tɛmp tɛmp tə kəsɔŋ ɛboya.

¹⁹Kama aŋ bɛnɛnɛ ɔtəmər ɔfinɔ ta ȧŋlɔkɔ aŋa mə derȧŋ, kȧmȧ aŋ wopnɛ aŋesəm thəbana.

²⁰Timɔthi, bumər tȧteŋ ȧtȧ a po maŋkər mu, gbukɛ tȧfɔf tələs yi təyay yi ɛpɛnsanɛ ya kȧte tȧrȧ tȧteŋ.

²¹Ta ȧte-e, alɔm aŋ po kolonɛ, ɔwa aŋ po yɛthȧ ta salata kȧwur ka kȧlanɛ. Ta aboŋa aŋ yi romu. Amina.