Read Ȧŋlemrȧnɛ Ȧfu 2 Timɔthi 2 Bible Online

2 Timɔthi 2 - Ȧŋlemrȧnɛ Ȧfu bible

2 Timɔthi 2

¹Tiyȧŋ, munɔ ɔwan kȧmi, yi ubaki mədɛr ka ȧŋboŋa aŋa yi ka Krayst Yisɔs.

²Mȧtȧy ama mə po təl kəwur ro rɔmi kətɔŋ ka məseri məlai, kȧl tɔri afəm abɔthi lanɛ kȧmȧ aŋ gbəli kȧl thəksa afəm alɔm sɔ.

³Te ba ti, muyu ɛsɔmpanɛ mɔ ukurgba ufinɔ ka Yisɔs Kraystȧŋ.

⁴Wuni o wuni ɔwe yi ukurgba ɔ kulunɛ hɛ ka mȧtȧy ma ȧdȧru are, kȧmȧ ɔ gbəli thesis ȧŋmerȧ ŋa ɔwe po thith kɔ tə kəyi ukurgba.

⁵Ɔwa bepi wuni o wuni ɔ gbakanɛ kȧsɔnka-e, ɔ sɔthɔ hɛ ȧrȧm, thambe ɔ wop ȧŋthɔ ŋa aŋgbakanɛ.

⁶Ubȧf ɔwe mə bulɔ ro kɔr-e, kɔnɔ yi tə kəmɔtha sɔthɔ ȧŋrȧm ŋati.

⁷Tȧmtȧmnɛ finɔ ta ȧtȧ i pa; ɔwa ɔMarki ɔ tə sɔŋ mu kətemp rə tȧy o tȧy.

⁸Te pənɛ kəpa Yisɔs Kraystȧŋ ka rȧkomra ra Debid, ɔ kȧl yokanɛ ka rȧfi mɔ ȧkɛra kəfinɔ ka Kuru kə pa ȧke i po tɔri mu.

⁹Salata ȧkɛra ake-e, i nakasi, ɔwa a tand mi ka tɔrɛntha mɔ ukərəŋka. Kɛrɛ a gbəli hɛ tand ȧrim ra Kuru yi tɔrɛntha.

¹⁰Tiyȧŋ i muyu tȧy o tȧy salata aŋfəm ŋa Kuru kȧmȧ ŋa sɔ aŋ gbəli sɔthɔ kakisi ȧke yi ka Krayst yi ayiki thəbana.

¹¹Aŋe, ŋȧ yi apa abɔthi lanɛ; ka pə yi bepi sə poŋ thɔŋ fi yi kɔn, sə tə kȧl kəli yi kɔn.

¹²Bepi sə sɔmpanɛ-e sə tə gbəka sɔ yi kɔn; bepi sə pɛnsa kɔ, kɔnɔ sɔ ɔ tə pɛnsa su.

¹³Bepi sə lanɛ hɛ, kɔnɔ ɔ tiyȧ gbo ubɔthi lanɛ. Ɔ gbəli hɛ pɛnsanɛ.

¹⁴Yɔ kȧmȧ aŋ kȧl nanɛ mȧtȧy ame bɛ, ɔwa maŋ ŋa rodi ka Kuru kȧmȧ aŋ te thoŋka ka sim təyay yay, ȧtȧ mə yɛthəs aŋa təl ti.

¹⁵Thəkəs tə kəthesis Kuru mɔ ȧbɔy ɔwe te ba kəlap, ɔwe mə gbay ȧsim ta təteŋ ɔlompi.

¹⁶Kɛrɛ bɔlȧnɛ kafɔf təyay yi təfəŋf; pəkasifɛ kə tə bȧr gbo yɔ afəm aŋ ŋamnɛ Kuru.

¹⁷Ɔwa ȧrim raŋ rə tə gbanthɛnɛ mɔ kəsam kəthey. Haimineyɔs yi Faylitɔs ŋa yi afəm mɔ aŋe.

¹⁸Aŋ po yɛthȧ salata tȧteŋ, kaŋ pa kakal yokanɛ ka aŋfi kə poŋ thɔŋ thas. Kaŋ ləsər kȧlanɛ ka afəm alɔm.

¹⁹Halisa ɔtəmər wa Kuru ɔ təmȧ kəŋkəŋ, ɔwa ȧŋmȧthlɛ ŋati ŋi aŋe, kəpa, ƆMariki ɔ tȧrȧ aŋfəm ŋɔŋ gbeŋ. Ɔwa sɔ-e, Ta wuni o wuni ɔwe bont ȧŋes ŋa Kraystȧŋ ɔ gbapɛ mȧkənə.

²⁰Kɛrɛ ka aseth abana pə yi hɛ gbo ɛyɛt ɛbɛmpa ya mȧbɔŋɔ yi akala ȧferȧ ɛ yi-e, kɛrɛ ya ɛbeŋ yi ɛthɔf sɔ; ɛlɔm ta məpanth məkolo, ɛlɔm ta məpanth məyay.

²¹Tiyȧŋ bepi wuni ɔ wasərnɛ məyay-e, a tə kianɛ kɔ ta məpanth məkolo, rəka rəsəm, rəbeki ka mapanth ma ɔMarki, rəbɛnɛnɛ ta tȧy o tȧy təfinɔ.

²²Gbukɛ sɔ ɛfela ɛləs ya rȧfɛth, kɛrɛ tȧŋ məlompi, yi kəlanɛ, yi məbɔthər, yi məthɔfəl rɛ ŋaŋ aŋa tela ka ɔMarki rə ɛmerȧ ɛfera.

²³Kɛrɛ bɔlȧnɛ ȧthonka ayay ŋa afəm aŋa te tȧrȧ, pəkasifɛ mə tȧrȧ kəpa ŋə mə kȧrȧ məputhanɛ.

²⁴Ɔwa ȧŋbɔy ŋa ɔMarki ɔ yi hɛ tə kətim, kɛrɛ ɔ yi tə kəyi uthɔfəl bɛm yi afəm bɛ, ukarmɔkɔ utara tȧy, umuyu;

²⁵ɔ tə fɔf ɔthɔfəl ma ɔ mɛm tə kəlompəs ŋaŋ aŋa pɛnsa kɔ, ma pə yi-e, sɔthlɔm Kuru ɔ tə sɔŋ ŋa kəthupi kȧmȧ aŋ gbithanɛ tȧteŋ;

²⁶kȧmȧ aŋ gbəli fisə kəwur ka magbət ma Sethani, rodarəŋ kaŋ la sap tə kəyɔ mȧselɔ mɔŋ.