Read Ȧŋlemrȧnɛ Ȧfu 2 Timɔthi 3 Bible Online

2 Timɔthi 3 - Ȧŋlemrȧnɛ Ȧfu bible

2 Timɔthi 3

¹Tara kɔpa tɛntɛnɛ ka marey mələpsɔ-e, məsibo mə tə der.

²kotȧy-e afəm aŋ tə yi abɔthərnɛ, aŋa ba ɛfɔr ɛmara, aŋa mə gbək ɛyoŋka, afəm akabanɛ, aŋa mə fɔf Kuru ɔləs, aŋa mə te sanɛ ka ŋaŋ aŋa kom ŋa, afisrəwali, aba hɛ məsəm,

³abȧki rəfɔr, aləsər alemranɛ, afəm Sethani, afəm arəpi, aŋ pɛnsa hɛ ɛfela yaŋ, aŋ yi afəm abaŋ, aŋa mə farki aŋlompi,

⁴aŋa ba ayaŋfa, yi kənapi, afəm abonɛ tȧy ŋaŋ, aŋa mə bɔthər mabɔnɛ ma ȧdȧru pəthasi Kuru Məsaba.

⁵Aŋ yɔr mɔ mə aŋ bɔthər Kuru-e, kɛrɛ aŋ pɛnsa aŋfɔsɔ ŋati. Mə yi tə kəbȧr aŋfəm aŋe kəmuth.

⁶kotȧy-e awunɔŋ ŋa mə wɔŋ ka ɛseth sɔy, aŋ sapəranɛ ɛmerȧ ya afəm abom ŋa məfəŋf aŋa ba akothe kəlel ka ɛhakɛ yaŋ, aŋa yi atar ŋa mȧfela məgbanthɛ tətəp.

⁷Lɔkɔ o lɔkɔ aŋ thəkəs tȧy təfu, kɛrɛ thȧnkȧŋ aŋ gbəli hɛ sɔthɔsnɛ kȧtȧrȧ ka tȧteŋ.

⁸Mɔ Yanes yi Yambres aŋ pɛnsa Mosisȧŋ, ya pə yi sɔ aŋkarmɔkɔ ayem aŋe mə aŋ pɛnsa tȧteŋ. Aŋ yi afəm aŋa ba ɛnanɛ ɛnɔkɔ; dɛ yi ɛmerȧ ɛthayoŋ kəwur ka kȧlanɛ.

⁹Kɛrɛ aŋ gbəli hɛ kɔ kədi, pəkasifɛ ȧŋpənk ŋaŋ aŋ tə tɔrinɛ ka afəm bɛ, mɔ mȧ ȧŋpənk ŋa aŋa pɛnsa Mosis aŋ tɔrinɛ.

¹⁰Kɛrɛ munɔ mə po tȧrȧ finɔ mathəksa ma mi dɛ yi mayi, yi mabotəs, yi kȧlanɛ, yi kamuyu, yi mabɔthər, yi katəma kȧmi kəŋkəŋ,

¹¹yi ɛsɔmpanɛ, yi ȧmɔnɛ mȧ mi bɛ ȧme derər mi ro Antiɔk, yi ro Ikoniɔm, yi ro Listra; munɔ mə tȧrȧ ɛsɔmpanɛ ɛyɛ i po muyu; kɛrɛ ɔMarki ɔ po wurɔ mi ri bɛ.

¹²Ya pə yi, wuni o wuni ɔwe mə tȧŋ Krayst Yisɔs ka ɔlompi, ɔ tə ba asɔmpanɛ.

¹³Kɛrɛ afəm aləs yi afəm ayaŋfa aŋ tə bȧr gbo yi aləs, aŋ tə tɔns alɔm, ɔwa aŋ tə tɔnsnɛ.

¹⁴Kɛrɛ bȧsər kɔ rodi ka ȧtȧ mə po thəkəs, yi ȧtȧ mə po lanɛ, ȧtesoma-e mə poŋ tȧrȧ ɔkarmɔkɔ ka mu,

¹⁵tə kəyi munɔ mə po tȧrȧ mȧgbal məsəm kəwur ka rafɛth ra mu, ama gbəli sɔŋ mu kətemp tə kəsɔthɔ kəkisi ta salata kȧlanɛ ȧke yi ka Krayst Yisɔs.

¹⁶Kuru ɔ tempəs ɛmerȧ yaŋ aŋa gbal mȧgbal məsəm bɛ, ama yi məbeki tə kəthəksa, yi tə kəmaŋ, yi tə kəlompəs, dɛ yi tə kərusəm salata məlompi,

¹⁷kȧmȧ ɔwuni ka Kuru ɔ gbəli yi ulompi dɛ yi ubeki ta məpanth o məpanth.