Read Ȧŋlemrȧnɛ Ȧfu Taytɔs 1 Bible Online

Taytɔs 1 - Ȧŋlemrȧnɛ Ȧfu bible

Taytɔs 1

¹Pɔl ȧbɔy ŋa Kuru, dɛ yi usom ka Yisɔs Kraystȧŋ tə kəbaksər kȧlanɛ ka anthith ŋa Kuru, dɛ yi tə kətɔri tȧteŋ ȧtȧ yi ka ranes ra Kuru.

²Ka kagbak ȧmerȧ ka aŋesəm thəbana, ȧke Kuru-e, ɔwe gbəli hɛ yema, ɔ po lahiri kȧbi ka ɔtəpɛr wa ȧdȧru;

³ɔwa-e, ka ȧŋlɔkɔ ŋɔŋ abeki ɔ tɔri ȧrim rɔŋ kətȧŋȧnɛ ka kakawandi ȧke a maŋkər mi ka aŋyamari ŋa Kuru ɔKisis kȧsu;

⁴ka Taytɔs ɔwan kȧmi utəteŋ ka kȧlanɛ kin; aboŋa-e, ȧney-e dɛ yi məthɔfəl mə yi do rɔmu kəwur ka Kuru ɔKas yi ɔMarki Yisɔs Krayst ɔKisis kȧsu.

⁵Tȧsom i poŋ tey mu ro Krit kȧmȧ mə pons mȧtȧy ama tiyȧ tə kəlompəs-e, dɛ yi kȧmȧ mə thith abȧki ka kəpet o kəpet mɔ mə i po tɔri mu.

⁶Thith ɔwuni ɔwe te ba məthɛkɛ, ɔwe ba urani ukin, ɔwe ba awuth abɔthi lanɛ aŋa a te bont tə kəyi asɔnkɔ sɔŋkɔ thalɔm ȧthȧnthonɛ.

⁷kotȧy-e ugbəka ka aŋchɔch-e, ta ɔ yi upaŋi tȧy mɔ ȧŋbɔy ŋa Kuru, ɔwa ɔ yi hɛ tə kəyi ubaki rəbomp thalɔm ulɛmp rə rəbaŋ-e, ta ɔ te bɔthər məber, thalɔm kətim thalɔm məfela məbaŋ ta akala.

⁸Kɛrɛ ta ɔ yi wuni fantha afəm, ta ɔ bɔthər təfinɔ, ta ɔ yi utempi, ubotnɛ rə ȧmerȧ, ulompi, usəm dɛ yi ubeki gbɛt.

⁹Ta ɔ wop ɔbaksər ȧsim təbɔthi lanɛ ȧtȧ a po thəksa kɔ, kama-e, kətȧŋȧnɛ ka ȧkɛra ka təteŋ-e, ɔ gbəli maŋ tə kəbaksər alɔm dɛ yi tə kəgbakia aŋfəm aŋa ba ɛpɛnsa.

¹⁰kotȧy-e afəm agbȧthi aŋ yi ri aŋa yɔ kȧrȧfu kȧrȧfu, afu fa fu rə kəfɔf ŋaŋ, ɔwa aŋ pəŋis afəm, pə tha gbethi ŋaŋ ka ȧŋbirons.

¹¹Mə yi tə kəyɔ ŋa aŋ tȧŋk, pəkasifɛ aŋ ləsər kȧlanɛ ka təkomra təlay, kaŋ thəksa ȧtȧ aŋ yi hɛ naŋ tə kəthəksa, salata akala.

¹²Ukin ka ŋaŋ, hali unabi ka ȧŋbona ŋaŋ gbeŋ, ɔ pa hɔ, AŋKrit aŋ yi ayem lɔkɔ o lɔkɔ, aŋ yi mɔ-e təsɛm təbaŋ, afəm awɔnthi ayay ŋaŋ.

¹³Maseri ame mə yi təteŋ. Tiyȧŋ ŋal ŋa finɔ kȧmȧ aŋ gbəli bȧkər ka kȧlanɛ,

¹⁴beta aŋ su ɛləns ka amump ma aŋYuda, yi ka ɛyamari ya afəm aŋa farki tȧteŋ.

¹⁵Ka anthɔth rə ȧmerȧ, koko rə yi rəthɔth; kɛrɛ ka aŋnɔkɔ dɛ yi ante lanɛ koko rə yi hɛ rəthɔth, kɛrɛ hali ɛmerȧ dɛ yi ɛnanɛ yaŋ gbeŋ ɛ yi ɛthey.

¹⁶Aŋ tə pa aŋ tȧrȧ Kuru, kɛrɛ mȧyɔs maŋ mə pɛnsa kɔ, kȧbi aŋ yi afəm agbɛŋa, ȧthȧnthonɛ, aŋ mar hɛ yɔ məpanth o məpanth məfinɔ hali.