Read Ȧŋlemrȧnɛ Ȧfu AŋHibru 12 Bible Online

AŋHibru 12 - Ȧŋlemrȧnɛ Ȧfu bible

AŋHibru 12

¹Tiyȧŋ ma ayama abana ŋa məseri aŋ kampər su yaŋ-e, maŋ gbapɛ nu koko ara mə bɛnt su, dɛ yi aŋhakɛ aŋa mə thiŋkər su katkat, ɔwa maŋ gbukɛ nu rə kəmuyu kȧgbȧkȧnɛ ȧke mə a bot rodi kȧsu.

²Maŋ kəli nu Yisɔs təŋ, ɔTəpi yi ɔPons wa kȧlanɛ kȧsu; ɔwe muyu akənt kəpəŋkinɛ ta salata mabɔnɛ ama yi kɔ rodi, kɔ farki mȧlap, ɔwa ɔ poŋ yirȧ ka kȧdiyɔ ka kawaŋ ka rȧbȧy ka Kuru.

³kotȧy-e tȧmtȧmnɛ nu finɔ ta kɔn ɔwe muyu ɛpɛnsanɛ ya afəm ŋa ahakɛ kəŋamnɛ kɔ-e, kȧmȧ pə te lela nu haŋ nə thamrɔ rə ȧmerȧ.

⁴Nə tha tim hɛ ras haŋ a loŋ mətir, tə kəŋamnɛ ahakɛ.

⁵Nə po pənɛ ȧŋmȧŋ aŋa fɔfȧnɛ nu mɔ awuth-i? Kəpa hɔ, Wan kȧmi, te farki ȧŋmȧŋ ŋa ɔMarki, Ɔwa te thamrɔ ma ɔ thalər mu;

⁶Pəkasifɛ ɔwe ɔMarki ɔ bɔthər-e, kɔnɔ mɔ sirans, Ɔwa ɔ sap wan o wan ɔwe ɔ po malanɛ.

⁷Bepi nə muyu kȧmȧ a lompəs nu-e, Kuru ɔ gbasi nu mɔ awuth ŋɔŋ; kotȧy-e uwan ureke ɔ yi ɔwe ɔkas kɔŋ ɔ te sirans-e?

⁸Kɛrɛ bepi a sirans hɛ nu mɔ mə a yɔ wath o wath-e, ȧŋlɔkɔ ŋati nə yi gbo awuth ŋa apure, ɔwa nə yi hɛ awuth atəteŋ.

⁹Ma pə thas ri sɔ-e, sə po ba akas a su ka rawuni kəpet tə kəlompəs su-e, ɔwa sə poŋ sɔŋ ŋa ayiki; sə gbəli hɛ nu bȧsər sanɛ ka ɔKas ka ɔYina kȧmȧ sə kisi-i?

¹⁰kotȧy-e tɛntɛnɛ aŋ sirans su ka alɔkɔ agbut mɔ mə aŋ nənk ti ɔfinɔ; kɛrɛ Kurɔŋ ɔ yɔ ti tə kəmar su-e, kȧmȧ sə gbəli ba ȧgbȧp ka masəm mɔŋ.

¹¹Ka ɔgbut wuni mɔ sɔthɔ asiraŋ pə bɔnɛ hɛ kɔ, kɛrɛ ɔ baŋ kɔ; halisa ka ɔgbanthir ŋaŋ aŋa sɔthɔ karusəm kati-e, aŋ tə wurɔ mȧkomi məthɔfəl ma məlompi.

¹²Tiyȧŋ ŋata nu mȧta məgbɔgbəth dɛ yi tawu tərakəth.

¹³Bɛmpa nu soŋ təlompi ta ȧtȧtək ta nu, kȧmȧ aŋgbɛthkɛ aŋ te yɛthȧ; kɛrɛ kȧmȧ aŋ sɔthɔ kədamər.

¹⁴Tȧŋ nu məthɔfəl rə afəm bɛ, yi masəm ama pə yi-e, thambe wuni ɔ ba ma-e, ɔ gbəli hɛ nənk ɔMarki.

¹⁵Kəli nu finɔ kȧmȧ wuni o wuni ɔ te bun ȧŋboŋa ŋa Kuru; ta thani rəka rəroŋkəth rə te lɔkɔ kətɔŋ ka nu-e, tə kəkɛthas nu, haŋ agbȧthi aŋ nɔkɔsnɛ.

¹⁶Kəli nu finɔ kȧmȧ wuni rəpi thalɔm wuni ləs mɔ Isɔŋ, ɔwe thila rabȧki rɔŋ ta da rədi ɔ te yi kətɔŋ ka nu.

¹⁷kotȧy-e nə tȧrȧ kəpa rodarəŋ kati-e, ma ɔ yema naŋ sɔthɔ aruba-e, a pɛnsa kɔ pəkasifɛ ɔ gbəli hɛ fir aŋfɛrɛ tə kəthupi hali ma ɔ thɛns ŋi asɔbɛ rə mantər.

¹⁸kotȧy-e naŋ nə der hɛ ka kateŋ ȧke nə gbəli gboŋ rɛ məta-e, ȧke mara dɛ yi nȧnt, thalɔm ka kȧbi, yi asum, yi kəŋkəl kəbana,

¹⁹dɛ yi kətɔŋa ka kathɛma, dɛ yi sim ta təfɔf-e, sim tȧŋ ȧtȧ yɔ ŋaŋ aŋa təl ti-e aŋ nɛmthɛnɛ kȧmȧ a te sɔ sɔŋ ŋa kɛra kəwunɔŋ.

²⁰kotȧy-e aŋ gbəli hɛ muyu ȧtȧ a yamari, kəpa hali bepi usɛm ɔ gboŋ kateŋ-e, a yi tə kələməs kɔ yi məsar haŋ ɔ fi;

²¹ɔwa kakəli kati kə yi kəninis haŋ Mosis ɔ pa, Minɛ i yɛr yɛr yi rənes.

²²Kɛrɛ naŋ nə po der ka kateŋ ka Sayɔn-e, kȧpet ka ɔKuru ukəli, yi ka Yerusalɛm ȧke yi rokɔm, dɛ yi ka akobali kəbana ka amaleka agbȧthi,

²³dɛ yi ka aŋgbanɛ ŋa aŋchɔch, pə yi mɔ aŋwuth ȧtɔtɔkɔ ŋa Krayst aŋa ba mes məgbal ro riyana, dɛ yi ka Kuru ɔthoŋkas kȧsu bɛ, dɛ yi sɔ aŋyina ŋa aŋlompi aŋa poŋ yi agbenthis;

²⁴dɛ yi ka Yisɔsȧŋ, ɔKasa ka aŋlemranɛ afu, dɛ yi ka mȧtir ma kəwɔnsir ama tɔri kɛra kəfisa pəthas mȧtir ma Ebɛl.

²⁵Bumnɛ nu kȧmȧ nə te pɛnsa ɔwe mə fɔf. Kotȧy-e bepi aŋbȧki a su aŋ pamp hɛ kəwur ka anthalər maŋ pɛnsa kɔn ɔwe fɔf nɔru-e, to saŋ mə sə gbəli kisi bepi sə su hɛ kɔ ɛləns ɔwe fɔf kəwur ro riyana-e?

²⁶Ȧŋlɔkɔ ŋati ȧrim rɔŋ rə yiŋktha ȧdȧru; kɛrɛ ka-ake ɔ po lahiri kəpa, Win gbo ras ti kȧl yiŋktha, pə yi hɛ ȧdȧru gbo son-e, kɛrɛ ȧriyana sɔ.

²⁷Ɔwa ȧrim are kəpa, Win gbo ras, rə tɔri kəpa a tə tɔŋa ɛyɛt ɛyɛ a gbəli yiŋktha, mɔ ɛyɛt ɛbɛmpa, kȧmȧ ɛyɛt ɛyɛ a te gbəli yiŋktha ɛ tə tiyȧ.

²⁸Tiyȧŋ ma sə sɔthɔ rȧbȧy ara mə a te gbəli yinktha-e, maŋ sɔŋ nu mɔmɔ kȧmȧ sə yɔna Kuru məpanth məbeki rə kəbȧtho dɛ yi rənes.

²⁹kotȧy-e ɔKuru kȧsu ɔ yi mɔ nȧnt nəthɔy.