Read Ȧŋlemrȧnɛ Ȧfu AŋHibru 13 Bible Online

AŋHibru 13 - Ȧŋlemrȧnɛ Ȧfu bible

AŋHibru 13

¹Bȧsər nu bɔthərȧnɛ mɔ awɔnt.

²Te nu pənɛ kəyiya atik, kotȧy-e di kati alɔm aŋ po yia amaleka kəte tȧrȧ ti.

³Kala nu ȧmerȧ ka ŋaŋ aŋa yi ka aseth ȧtərənkȧ, mɔ a tand nu dɛ yi ŋaŋ; nanɛ ŋa sɔ aŋa ba asɔmpanɛ kotȧy-e naŋ nə yi ras ka madɛr ma rawuni kəpet.

⁴Wop kȧnantȧ rə ayiki kətɔŋ ka nu bɛ, ɔwa yɔ nu kȧmȧ a te yifas kəfənt kati; kotȧy-e Kuru ɔ tə thonkas aŋrəpi bɛ.

⁵Yi nu kəyaŋkaŋ kǝwur ka mafela ma akala-e; ɔwa ta ara nə ba rə yi rəbeki nu; kotȧy-e Kuru kɔn kɔnɔnɛ ɔ po pa, I gbəli hɛ thȧnkȧŋ tey nu, thalɔm i gbapɛ nu.

⁶Tiyȧŋ sə gbəli pa rə kəpələnɛ, ƆMariki ɔ yi ɔmar kȧmi, I ba hɛ asoli ta ȧtȧ wuni kəpet mɔ gbəli yɔ mi.

⁷Nanɛ nu ŋaŋ aŋa yi aŋkərbomp a nu aŋa po tɔri nu ȧsim ta Kuru; kala ȧmerȧ ka mayi maŋ, ɔwa tansanɛ kȧlanɛ ka naŋ.

⁸Yisɔs Krayst ɔ yi mɔlɔ min dis, yi thonɔŋ haŋ thȧnkȧŋ thəbana.

⁹Te nu lafthɛ ka mȧthəksa mətel məgbanthɛ tətəp, kotȧy-e pǝ yi ɔfinɔ bepi a bȧkəs ɛmerȧ ɛ nu rɛ aboŋa-e, beta rɛ masəm ma ɛyɛt ɛdi ama te gbəli mar ŋaŋ aŋa wop ma.

¹⁰Saŋ sə ba abɛsɛ ro ŋaŋ aŋa yɔ mapanth ma ȧŋseth ŋa akotha ŋa aŋYuda aŋ te ba mamari tə kədi.

¹¹kotȧy-e ma ɔfode ubana ɔ po kȧrȧ mətir ka ɔdɛr ɔsəm thɔ bɛ-e mɔ sathka ta ahakɛ-e, a thɔy tabel ta təsɛm tati rokaŋ ka ɔgbaif wa aŋgbanɛ ŋa aŋfəm.

¹²Tiyȧŋ Yisɔs sɔ ɔ sɔmpanɛ rolɛŋkɛn ka aŋkobe kȧmȧ ɔ gbəli səməs aŋfəm dɛ yi mȧtir mɔŋ gbeŋ.

¹³Tiyȧŋ maŋ tȧŋ kɔ nu ka aŋkobe rokaŋ, kȧmȧ sə sara mȧlap mɔŋ.

¹⁴Pəkasifɛ anɔ sə ba hɛ kəpet kəthəbana, kɛrɛ sə thɛns kȧpet ȧke yi tə kəder.

¹⁵Tiyȧŋ kətȧŋȧnɛ kɔŋ maŋ thɔkəs nu Kuru rɛ sathka alɔkɔ o lɔkɔ, pə yi mɔ-e, ɛboya ya ȧsim ta su ɛyɛ seri ta ȧŋes ŋɔŋ.

¹⁶Kɛrɛ te nu pənɛ tə kəyɔ təfinɔ dɛ yi tə kəyerəs ara nə ba kotȧy-e sathka təwunɔŋ tə bɔnɛs Kuru finɔ.

¹⁷Wop nu ȧrim ra aŋkərbomp, ɔwa sanɛ ka aŋbȧki rokɔm ka nu; kotȧy-e aŋ bumər ɛŋesəm ɛ nu mɔ afəm aŋa ba kəsɔŋ akanɛ, kȧmȧ aŋ gbəli sɔŋ ŋi yi məbɔnɛ, pə yi hɛ yi ɔnɔsinɛ, kotȧy-e ȧte tə gbəli hɛ mar nu.

¹⁸Ramnɛ nu ta ȧtȧ su; kotȧy-e sə tȧrȧ kəpa sə ba ȧmerȧ ȧferȧ, ɔwa sə fela tə kəyɔ ɔlompi rə tȧy o tȧy.

¹⁹I nɛmthɛnɛ nu tə kəyɔ ȧte kȧmȧ i gbəli yeŋk kȧlanɛ do rɔnu.

²⁰Ɔwa ka-ake kaŋka ɔKuru ka mȧthɔfəl ɔwe poŋ yokas ɔMarki kȧsu Yisɔs ka rəfi-e, ɔTɔl talɔmɛ ubana; kətȧŋȧnɛ ka mȧtir ma aŋlemranɛ athəbana-e,

²¹ɔ yɔ nu nə yi agbenthis rə tȧy o tȧy təfinɔ, tə kəyɔ mȧselɔ mɔŋ, kȧmȧ ɔ yɔ mapanth rokor ka nu ama mə mar nu tə kəbɔnɛs kɔ, kətȧŋȧnɛ ka Yisɔs Krayst; ɔwe ba ayiki thȧnkȧŋ o thȧnkȧŋ. Amina.

²²I nɛmthɛnɛ nu awɔnt, muyu nu ȧŋmȧŋ aŋe, ȧtesoma-e i po gbalər nu gbo areka agbut.

²³Tara ti nu kəpa a po ter Timɔthi, ɔwɔnt su-e, ɔwa bepi ɔ yeŋk der-e, minɛ i ti nənk nu dɛ yi kɔn.

²⁴Kori ŋaŋ aŋa yi rokɔm ka nu, dɛ yi aŋsəm bɛ. Ŋaŋ ro Itali aŋ kori nu.

²⁵Ta aboŋa aŋ yi yi naŋ bɛ. Amina.