Read Ȧŋlemrȧnɛ Ȧfu AŋHibru 3 Bible Online

AŋHibru 3 - Ȧŋlemrȧnɛ Ȧfu bible

AŋHibru 3

¹Te ba ti, awɔnt asəm, ayeranɛ ka katela ka ro riana-e, kala ȧmerȧ ka Yisɔs Krayst, ɔwe yi mɔ ɔSom dɛ yi ɔFode ubana ka kȧlanɛ kȧsu.

²Kɔnɔ yi ubɔthi lanɛ ka kɔn ɔwe təmər kɔ, mɔ Mosis ɔ yi ubɔthi lanɛ ka ȧŋseth ŋa Kuru bɛ.

³kotȧy-e a po lɔm kəpa Yisɔs ɔ yi ubeki tə kəsɔthɔ ayiki pəthasi Mosisȧŋ, mɔlɔ min ma ɔwe bɛmpa aseth ɔ ba ayiki pəthasi ȧŋseth.

⁴kotȧy-e aseth o seth aŋ ba ɔwe bɛmpa ŋi; kɛrɛ ɔwe bɛmpa mȧtȧy bɛ kɔnɔ yi Kuru Məsaba-əŋ.

⁵Ɔwa Mosis ɔ yi ubɔthi lanɛ ka ȧŋseth ŋa Kuru, mɔ ȧbɔy, tə kəsɔŋ məseri ta mȧtȧy ama ma re fɔf kədarəŋ kati;

⁶kɛrɛ Krayst ɔ yi ubɔthi lanɛ ka ȧŋseth ŋa Kuru mɔ uwan. Ɔwa saŋ sə yi ȧŋseth ŋɔŋ, bepi sə wop kapələnɛ dɛ yi mabɔnɛ ma kagbak ȧmerȧ kȧsu ɔbaksər haŋ ka ɔləpsɔ.

⁷Tiyȧŋ ɔYina məsəm ɔ pa; Thonɔŋ bepi mə təlȧ ȧrim rɔŋ,

⁸Te gbolŋas ɛmerȧ ɛ nu mɔ pə yɔnɛ ka ȧŋlɔkɔ ŋa aŋgbɔns ka aŋwula.

⁹Ro aŋbemba a nu aŋ mɛm mi, Ɔwa aŋ nənk mȧyɔs ma mi ta təren təgba tərɔŋ.

¹⁰Tȧsom i bora kəbansəs aŋyamana ŋati, ka i pa, Lɔkɔ o lɔkɔ aŋ yɛthȧ ka ɛmerȧ yaŋ; Aŋ la hɛ tȧrȧ asoŋ ta mi.

¹¹Tiyȧŋ i gbiŋ ka rabaŋ ra mi kəpa, Aŋ ba hɛ kəwɔŋ ka ɔfothanɛ ɔ mi.

¹²Bumnɛ nu finɔ, awɔnt, ta thani ȧmerȧ aləs ŋa kəte lanɛ aŋ tə yi kətɔŋ ka nu, ɔwa aŋ tə yɔ nu nə bȧrȧ kəmuth ka ɔKuru ukəli.

¹³Kɛrɛ maŋanɛ nu alɔkɔ bɛ, ma pə yi ras thonɔŋ, kȧmȧ aŋyaŋfa ŋa ahakɛ aŋ te yɔ ɛmerȧ ɛ nu ɛ gbolŋa.

¹⁴kotȧy-e saŋ sə yi ayeranɛ ka Krayst, bepi sə wop ɔbaksər kapələnɛ kȧsu kətɔtɔkɔ haŋ ka ɔləpsɔ.

¹⁵Ma a pa, Thonɔŋ bepi nə təlȧ ȧrim rɔŋ-e, Te gbolŋas ɛmerȧ ɛ nu, mɔ mɔ aŋbemba aŋ yɔ thəpaŋ.

¹⁶Ɔwa kanɛ po bansəs Kuru kədarəŋ kaŋ po təl-e? Pə yi hɛ ŋa bɛ aŋa wur ro Iyipt ka kȧta ka Mosis-i?

¹⁷Ɔwa, kanɛ ləsər ȧŋmerȧ ŋa Kuru ta təren təgba tərəŋ-e? Pə yi hɛ ŋaŋ aŋa yɔ ahakɛ aŋa fi ro wula-i?

¹⁸Ɔwa ka kanɛ, ɔ gbiŋ kəpa aŋ ba hɛ kəwɔŋ ka ɔfothanɛ wɔŋ, thambe ka ŋaŋ gbo aŋa te lanɛ-e?

¹⁹Tiyȧŋ sə nənk kəpa aŋ gbəli hɛ naŋ wɔŋ salata kate lanɛ.