Read Ȧŋlemrȧnɛ Ȧfu AŋHibru 9 Bible Online

AŋHibru 9 - Ȧŋlemrȧnɛ Ȧfu bible

AŋHibru 9

¹Hali aŋlemranɛ ȧtɔtɔkɔ aŋ ba ɛsiraŋ ya kabȧtho kati, dɛ yi ɔdɛr ɔsəm wa ȧdȧru are.

²kotȧy-e a po bɛmpa aseth ŋa akotha; ka ȧŋkonko ȧtɔtɔkɔ aŋa a tela ɔdɛr ɔsəm, ro a bɛnɛ kamulɛ, yi ȧŋthebul dɛ yi kabo kəsəm.

³Ɔwa rodarəŋ ka ȧŋkunkla-e ȧŋkonko alɔm aŋ yi aŋa a tela ɔdɛr ɔsəm thɔ bɛ,

⁴ro a bɛnɛ ampɔthi ŋa mȧbɔŋɔ ta aŋgboŋgbo, dɛ yi akuma kəsəm ka aŋlemranɛ ȧke a bɛmpa rə məbɔŋɔ rəmaŋ. Rokor kati a bɛnɛ ȧŋbɔl ŋa mȧbɔŋɔ ta ȧŋmana, dɛ yi kȧtək ka Erɔn ȧke poŋ pɔs, dɛ yi ɛwalka ya aŋlemranɛ.

⁵Ɔwa rokɔm kati ɛtɛrubim ɛ gbakərnɛ rokɔm ka kawaŋ ka ȧney; kɛrɛ i gbəli hɛ tɔri ta mayɛt məgbaskɛ ame ka-ake.

⁶Ma a po botəs mȧtȧy ame yaŋ-e, aŋfode aŋ wɔŋ lɔkɔ o lɔkɔ ka ȧŋkonko ȧtɔtɔkɔ tə kəyɔ mapanth məsəm ma Kuru.

⁷Kɛrɛ ka ȧŋkonko aŋa bekȧ yɛrəŋ-e, ɔfode ubana son kɔnɔ wɔŋ di win kəren o kəren, kɛrɛ ɔ wɔŋ hɛ thambe ɔ ba mətir ama mɔ sɔŋ ta aŋyɛthɛ ŋɔŋ, dɛ yi ta ɛhakɛ ya aŋfəm.

⁸Yaŋ ɔYina məsəm ɔ tɔri kəpa aroŋ da wɔŋ ka ɔdɛr ɔsəm thɔ bɛ-e rə tha tɔrinɛ hɛ ras, fanama ȧŋkonko ȧtɔtɔkɔ aŋ təmȧ.

⁹Atȧy ȧte tə yi amɔl ta ȧŋlɔkɔ aŋe. Kətaŋanɛ kati a sɔŋ ɛboya yi sathka, ɛyɛ te gbəli yɔ ɔwuni ɔwe bȧtho ɔ yi ugbenthis.

¹⁰Mayɔs mati bɛ mə təmȧ gbo ta ɛdi yi ɛmun, dɛ yi kȧfethər kəgbanthɛ gbanthɛ ama yi masəm ma rawuni kəpet, ama yi gbo haŋ ka ȧŋlɔkɔ ŋa kȧlompəs tȧy aŋ bek.

¹¹Kɛrɛ ma Krayst ɔ ŋaibinɛ mɔ ufode ubana ka mȧtȧy məfinɔ ama mə der-e, ka ȧŋlɔkɔ ŋati kətȧŋȧnɛ ka ȧŋseth ŋa akotha abana afisa, (aŋa a te bɛmpa rɛ məta mɔ rəka ra ȧdȧru are),

¹²ɔ wɔŋ win haŋ thəbana ka ɔdɛr ɔsəm thɔ bɛ, kɔ gbasi mȧtir mɔŋ gbeŋ, pə yi hɛ mȧtir ma atir dɛ yi təna təfɛth. Yaŋ ɔ sɔthɔ kakisi kəthəbana ta ȧtȧ su.

¹³Pəkasifɛ bepi mȧtir ma atir yi ɛthura, dɛ yi ȧros ra una ubɛra ara a wɔnsir aŋfəm ayifas-e ɛ gbəli səməs tə kəfethər andɛr-e,

¹⁴pə tha gbethi mȧtir ma Kraystȧŋ ɔwe sɔndnɛ ugbəraŋ ka Kuru kətȧŋȧnɛ ka ɔYina uthəbana-e, mə gbəli fethər ɛmerȧ ɛ nu kəwur ka məyɔs məfi kəkɔ ka kəbatho ɔKuru ukəli.

¹⁵Te ba ti ɔ yi ukasa ka aŋlemranɛ afu, kȧbi ɔ po fi tə kəbani ɛhakɛ yaŋ aŋa la yi roratha ka aŋlemranɛ ȧtɔtɔkɔ, kȧmȧ ŋaŋ aŋa a po tela aŋ gbəli sɔthɔ aŋlahiri ŋa akɛŋ ka thəbana.

¹⁶kotȧy-e ro areka ŋa alemnɛ aŋ yi-e, rafi ra ɔwe bɛmpa ŋi rə ba kəyi sɔ.

¹⁷Pəkasifɛ areka ŋa alemnɛ aŋ ba gbo afɔsɔ rodarəŋ ka rafi; aŋ ba hɛ afɔsɔ bepi ɔwe bɛmpa ŋi ɔ yi ras ukəli.

¹⁸Tiyȧŋ a bȧksər hɛ hali aŋlemranɛ ȧtɔtɔkɔ kəte loŋ mətir.

¹⁹kotȧy-e ma Mosis ɔ po tɔri aŋfəm sɛŋk aŋyamari ŋa ȧŋthɔ bɛ-e, ɔ gbasi mȧtir ma təna tɔfɛth yi atir, yi mȧnt yi amulfu məyim, yi ɛbuma ɛronkəth ɛyɛ mə a lei ahisɔp, ɔwa ɔ wɔnsir wɔnsir ȧkȧfȧ ka ȧŋthɔ, dɛ yi sɔ aŋfəm bɛ,

²⁰kɔ pa, Ame-e, mə yi mȧtir ma aŋlemranɛ aŋa Kuru ɔ sek do rɔnu.

²¹Yaŋ ɔ kȧl sɔ wɔnsir mȧtir ka ȧŋseth ŋa akotha yi ka mayɛt bɛ ama a yɔna mapanth məsəm.

²²Ɔwa ka ȧŋthɔ pə bun yi a fethər koko bɛ rə mətir; kȧbi rə kəte loŋ mətir-e, katerɔ ka ɛhakɛ kə yi hɛ.

²³Tiyȧŋ pə yi ɔlompi kȧmȧ a gbərans mȧbȧlȧnɛ ma mȧtȧy ma ro riyana rɛ ɛyɛt ɛye; kɛrɛ mȧtȧy ro riyana gbeŋ mə yi tə kəba sathka təbaki mɔlɔ təthasi ȧte.

²⁴kotȧy-e Krayst ɔ wɔŋ hɛ rə ɔdɛr ɔsəm thɔ bɛ ɔwe wuni ɔ bɛmpa, ɔwe yi gbo mȧbȧlȧnɛ ma tȧteŋ; kɛrɛ ɔ po wɔŋ ro riyana gbeŋ tə kətɔrinɛ ka kȧbəprȧnɛ ka Kuru ta ȧtȧ su.

²⁵Ɔwa ɔ wɔŋ hɛ ri kȧmȧ ɔ sɔndnɛ katkat, mɔ mȧ ɔfode ubana mɔ wɔŋ ka ɔdɛr ɔsəm thɔ bɛ kəren o kəren yi mȧtir ama te yi amɔŋ.

²⁶kotȧy-e bepi pə yi yaŋ Krayst ɔ ba naŋ tə kəsɔndnɛ ɛlɔkɔ ɛlai kȧbi ka ɔtəpɛr wa ȧdȧru; kɛrɛ ka-ake ka ɔthalnɛ wa aŋyamana ɔ po tɔrinɛ win haŋ thəbana tə kəpons ɛhakɛ kətȧŋȧnɛ ka kasɔndnɛ kɔŋ.

²⁷Ɔwa ma pə yi ti-e, wuni o wuni ɔ ba tə kəfi win, kɛrɛ rodarəŋ ka rəfi-e, kathoŋkas kə yi.

²⁸Ya pə yi sɔ-e, Krayst ɔ po sɔndnɛ win tə kəsara ɛhakɛ ya afəm agbȧthi; ɔwa ɔ tə kȧl tɔrinɛ kȧbeka mȧrəŋ, pə yi hɛ salata ɛhakɛ, kɛrɛ tə kəkisis ŋaŋ aŋa mə kəlianɛ ta atɔŋ.