Read Ȧŋlemrȧnɛ Ȧfu Yeməs 4 Bible Online

Yeməs 4 - Ȧŋlemrȧnɛ Ȧfu bible

Yeməs 4

¹Reke tȧtim yi mȧputhanɛ kətɔŋ ka nu ɛ wur-e? Ɛ wur hɛ ka ɛfela ɛ nu ɛyɛ mə tim rokor ka madɛr ma nu-i?

²Nə fela ɛyɛt, ɔwa nə sɔthɔ hɛ; nə dif, nə fela ɔbaŋ, kɛrɛ nə gbəli hɛ sɔthɔ ȧtȧ nə yema; nə gbal, nə tim, kɛrɛ nə ba hɛ, pəkasifɛ nə yif hɛ.

³Nə yif, ɔwa nə sɔthɔ hɛ pəkasifɛ nə yif ɔkənȧ kȧmȧ nə ləsər ŋi salata mafela ma nu.

⁴Na afəm arəpi nə tȧrȧ hɛ kəpa mamanɛ ma ȧdȧru mə yi kəgbɛŋȧ Kuru-i? Tiyȧŋ wuni o wuni ɔwe yema yi uyathki ka ȧdȧru ɔ səkɛ utheranɛ ka Kuru.

⁵Nə nanɛ kəpa mȧgbal məsəm mə pa kətiŋ-i, ƆYina məsəm ɔwe yi su rokor ɔ kəlianɛ su dɛ yi kətut kəbaŋ-i?

⁶Kɛrɛ ɔ bȧr sɔŋ aboŋa. Tiyȧŋ ɔ pa, Kuru ɔ bȧrȧ aŋbonɛ tȧy kəmuth, kɛrɛ ɔ sɔŋ aboŋa ka anthoranɛ.

⁷Tiyȧŋ, sanɛ nu ka Kuru, pɛnsa Sethani, ɔwa ɔ tə gbapɛ nu.

⁸Fȧtər Kuru, ɔwa ɔ tə fatər nu, gbərans mȧta ma nu naŋ afəm ŋa ahakɛ; fethər ɛmerȧ ɛ nu naŋ aŋa ba ɛmerȧ ɛfəlɛ fəlɛ.

⁹Thalərnɛ nu, saŋ amɔl, ɔwa bok; ta thani mȧsel ma nu mə səkɛ ɔnɔsinɛ, dɛ yi mabɔnɛ ma nu mə səkɛ amɔnɛ.

¹⁰Thoranɛ nu rodi ka Kuru, ɔwa kɔnɔ ɔ tə ŋata nu.

¹¹Awɔnt, te nu fofiya aŋwɔnt a nu; kɔn ɔwe mə fofiya ɔwɔnt kɔŋ-e, thalɔm ɔ thonkas ɔwɔnt kɔŋ-e, ɔ fofiya ȧŋthɔ, ɔ thonkas ȧŋthɔ; ɔwa bepi mə thonkas anthɔ-e, mə yi hɛ sɔ ɔwe mə wop ŋi, mə yi uthoŋkas.

¹²Usɔŋ ȧŋthɔ dɛ yi uthoŋkas ukin ɔ yi, kɔnɔ ɔ gbəli kisis; kɔnɔ ɔ gbəli ləsər. Kɛrɛ munɔ, kanɛ mə yi-e ɔwe mə thonkas ɔkos ka mu-e?

¹³Su ɛləns ŋaŋ aŋa mə pa, Thonɔŋ, thalɔm ninaŋ si kɔ ka kəpet kəwunɔŋ, si yirȧ ri haŋ kəren kin, sə tə səkinɛ ri, ɔwa sə tə sɔthɔ məkaŋya.

¹⁴Naŋ gbeŋ, nə tɛ hɛ ȧtȧ mə re yi ka ninaŋ. Kotȧy-e ko yi aŋesəm a nu-e? Aŋ yi gbo mɔ kəfira ȧke sə nənk ta alɔkɔ agbut, kədarəŋ kati sə nənk hɛ ki sɔ.

¹⁵Tiyȧŋ nə yi naŋ tə kəpa, Bepi ɔMarki ɔ selɔ, sə tə yi, ɔwa sə tə yɔ ȧte dɛ yi ȧtȧŋ.

¹⁶Kɛrɛ ka-ake, nə ba məbɔnɛ ka kagbək ka nu ɛyoŋka; kəyasanɛ kəwunɔŋ kə yi kələs.

¹⁷Tiyȧŋ kɔn ɔwe tȧrȧ tə kəyɔ təfinɔ kɛrɛ ɔ yɔ hɛ ti, ahakɛ do rɔŋɔŋ.