Read Ȧŋlemrȧnɛ Ȧfu 1 Pitar 4 Bible Online

1 Pitar 4 - Ȧŋlemrȧnɛ Ȧfu bible

1 Pitar 4

¹Mɔ mə Krayst ɔ po nakasi ta ȧtȧ su ka madɛr-e, gbasi nu ȧŋmerȧ ŋin ŋati; kotȧy-e ɔwe po nakasi ka madɛr, ɔ ternɛ kəyɔ ahakɛ,

²kȧmȧ ɔ te sɔ yirȧ ka marey ma aŋesəm ŋɔŋ bɛ tə kəthənsər mafela ma madɛr, kɛrɛ tə kəyɔ mȧselɔ ma Kuru.

³Pəkasifɛ sə poŋ thɔŋ ləsər alɔkɔ abeki ka kəyɔ ȧtȧ tȧbona təlɔm aŋ bɔthər, ma sə la kɔth ka kərəp, məfela mələs, kəmun, ɛmet ɛgbaskɛ gbaskɛ, dɛ yi kəbatho ɛyɛt ɛbumərnɛ.

⁴Ka pə sɔkanɛ ŋa ma nə te sɔ yɔ mȧyɔs ama ŋaŋ aŋ yɔ, ɔwa aŋ kȧl fɔf nu ɔləs.

⁵Kɛrɛ aŋ ba tə kəgbaki ka kɔn ɔwe təmȧ tə kəthoŋkas ɛpa ya aŋkəli yi aŋfi.

⁶Ȧtesoma-e a tam ȧkɛra kəfinɔ ka Kuru ka ŋaŋ aŋa po fi, tə kəyi a gbəli thonkas ŋa mɔ mə a yi tə kəthoŋkas afəm bɛ ka madɛr, kȧmȧ aŋ gbəli ba aŋesəm ka aŋyina mɔ mə Kuru ɔ yema.

⁷Kɛrɛ ɔthalnɛ wa mȧtȧy bɛ ɔ po fat; tiyȧŋ yi nu atempi, ɔwa bumnɛ nu rə kəramnɛ.

⁸Ɔwa pəthas koko bɛ bɔthərȧnɛ nu kiriŋkiriŋ, kotȧy-e məbɔthər mə tə gbəpsər ɛhakɛ ɛlai.

⁹Fantha nu aŋkos a nu, kəte ba ȧmerȧ aləs;

¹⁰mɔ mə wuni o wuni ɔ po sɔthɔ ȧŋboya, ya nə yi tə kəkiyanɛ ŋi rə kəmar ukin dɛ yi ulɔm mɔ ȧbɔy ufinɔ ŋa ȧŋboŋa ŋa Kuru.

¹¹Bepi wuni o wuni ɔ kawandi-e, ta pə yi mɔ ɔ fɔf tȧteŋ ta Kuru; bepi wuni o wuni ɔ yɔna ulɔm-e, ta ɔ yɔ ti ka kagbəli ka Kuru, kȧmȧ Kuru ɔ sɔthɔ ayiki salata tȧy o tȧy kətaŋ ka Yisɔs Krayst ɔwe ba kəthɔkəs yi afɔsɔ haŋ thȧnkȧŋ thəbana, Amina.

¹²Ambɔthər a mi, ta pə te kɛtha nu ta amɛm abaŋ aŋa ba tə kəderər nu, mɔ ȧtȧy ȧtȧ nə te nanɛ tə gbəli bəp nu.

¹³Kɛrɛ ba ti məbɔnɛ ma nə ba ȧgbȧp ka ȧŋnȧkȧsi ŋa Krayst, kȧmȧ ma aŋyiki ŋɔŋ aŋ ŋaibinɛ-e, nə tə yasanɛ yi məbɔnɛ məbana.

¹⁴Bepi nə sɔthɔ məsambo salata ȧŋes ŋa Kraist-e, ta pə bɔnɛ nu; kotȧy-e ɔ Yina ka ayiki, pə yi mɔ-e, ɔ Yina ka Kuru, ɔ rensa nu; ka ȧŋgbȧp ŋaŋ a fɔf kɔ ɔləs, kɛrɛ ka ȧŋgbȧp a nu ɔ sɔthɔ ayiki.

¹⁵Kɛrɛ te selɔ wuni o wuni kətɔŋ ka nu ɔ sɔmpanɛ mɔ udif, thalɔm ukei, thalɔm mɔ wuni ɔwe yɔ ɔləs-e, thalɔm mɔ wuni Sethani.

¹⁶Kɛrɛ bepi wuni o wuni ɔ sɔmpanɛ pəkasifɛ ɔ yi wuni ka Kraist-e, ta ɔ te ti lap; kɛrɛ ta ɔ yikis Kuru salata ȧŋes ŋati.

¹⁷kotȧy-e ȧŋlɔkɔ aŋ bek kȧmȧ kəgbək ɛpa kə tə təp ka ȧŋseth ŋa Kuru. Ɔwa bepi kə təp ro rɔsu-e, to mələpsɔ mati mə yi ta ȧtȧ ŋaŋ aŋa pɛnsa ȧkɛra kəfinɔ ka Kuru-e?

¹⁸Bepi pə yi ɔbaki ta ȧtȧ ŋaŋ aŋa tȧŋ məlompi tə kəkisi-e, reke ɔte lanɛ yi ɔyɔ ahakɛ aŋ gbəli təma-e?

¹⁹Tiyȧŋ ŋaŋ aŋa sɔmpanɛ kətȧŋȧnɛ ka mȧselɔ ma Kuru-e, ta aŋ lȧnki ɛŋesəm yaŋ ka ɔBɛmpa ubɔthi lanɛ, rə kəyɔ təfinɔ.