Read Ȧŋlemrȧnɛ Ȧfu 1 Pitar 5 Bible Online

1 Pitar 5 - Ȧŋlemrȧnɛ Ȧfu bible

1 Pitar 5

¹I maŋ aŋbȧki aŋa yi kətɔŋ ka nu, minɛŋ min yi sɔ ubaki dɛ yi useri ka ȧŋnȧkȧsi ŋa Kraystȧŋ, minɛ ba sɔ ani ka aŋyiki aŋa mə a re ŋaibi.

²Wɔnthər nu akuthi ka Kuru ȧke a po laŋklia nu, pə yi hɛ rə kəte ba məyɔ, kɛrɛ ka mȧselɔ ma nu gbeŋ; pə yi hɛ sɔ ta məkaŋya mənɔkɔ, kɛrɛ rə ȧmerȧ ŋa məbɔnɛ.

³Te nu gbasi afɔsɔ rokɔm ka aŋa a kɔtɛ ro rɔnu, kɛrɛ yi nu ɛmɔl ta akuthi.

⁴Ɔwa ma ɔTɔl ubana mɔ tɔrinɛ-e, nə tə sɔthɔ ȧniyɔ ŋa ayiki aŋa te ba kəferər.

⁵Yaŋ sɔ na afɛth, sanɛ ka aŋbȧki. Yao, na bɛ nə yi tə kəsanɛ ukin ka ulɔm, ɔwa ba nu sɔ ȧmerȧ athoranɛ; kotȧy-e Kuru ɔ tə pɛnsa aŋbonɛ tȧy, kɛrɛ ɔ sɔŋ aboŋa ka anthoranɛ.

⁶Tiyȧŋ thoranɛ nu ka kȧta kəninis ka Kuru, kȧmȧ ɔ ŋata nu ma ȧŋlɔkɔ aŋ bek.

⁷Lȧnkli ɛsoli ɛ nu bɛ ro rɔŋɔŋ, pəkasifɛ kɔn kɔnɔnɛ ɔ kəlianɛ nu.

⁸Yi nu na agbɛt, na abumnɛ; kotȧy-e ɔtheranɛ ka nu, Sethani, ɔ yanthənɛ mɔ ȧsoyla ubaŋ, kȧmȧ ɔ thɛns ɔwe mɔ gbȧri gbȧri.

⁹Kasi kɔ nu ka aŋlanɛ; ɔwa tȧrȧ kəpa aŋwɔnt a nu alɔm ka ȧdȧru bɛ ŋa yi sɔ ka ȧŋpam ŋin ŋati.

¹⁰Kɛrɛ ɔKuru ka aboŋa bɛ, ɔwe po tela su tə kəwɔŋ ka aŋyiki ŋɔŋ athəbana-e, kətaŋ ka Krayst Yisɔsȧŋ, ma nə po nakasi ɔthan-e, kɔn kɔnɔnɛ ɔ tə gbenthis nu, ɔ tə bȧksər nu, ɔ tə lompəs nu.

¹¹Ta kɔnɔ ba ayiki, dɛ yi afɔsɔ ŋa rȧbȧy thȧnkȧŋ thəbana. Amina.

¹²I somra ȧŋreka agbut aŋe ka kȧta ka Silfenɔs, ɔwɔnt su ubɔthi lanɛ, tə kəbaksər tabuth ta nu, yi tə kəseri kəpa ȧtȧ i po tɔri nu tə yi ȧŋboŋa atəteŋ ŋa Kuru. Təmȧ ri ɔbaksər.

¹³Aŋchɔch ŋa kȧpet ȧke bȧlȧnɛ mɔ Babilɔn, aŋa a po thith yi naŋ, aŋ kori nu; Markɔs, ɔwan kȧmi, ɔ kori nu sɔ.

¹⁴Korianɛ nu yi kəmuməl ka mȧbɔthər. Ta məthɔfəl mə yi nu bɛ aŋa yi ka Yisɔs Krayst. Amina.