Read Ȧŋlemrȧnɛ Ȧfu 2 Pitar 1 Bible Online

2 Pitar 1 - Ȧŋlemrȧnɛ Ȧfu bible

2 Pitar 1

¹Saymɔn Pita, ȧbɔy usom ka Yisɔs Kraystȧŋ, ka ŋaŋ aŋa po sɔthɔ kəlanɛ kəkɛŋ kin dɛ yi saŋ kətȧŋȧnɛ ka mȧlompi ma Kuru yi ɔKisis kȧsu Yisɔs Kraystȧŋ.

²Ta pə yi aboŋa yi məthɔfəl ɛ bȧrȧnɛ nu kətȧŋ ka kȧtȧrȧ ka Kuru, yi ka Yisɔs ɔMarki kȧsu.

³Mɔlɔ ma aŋfɔsɔ ŋɔŋ asəm aŋ po sɔŋ su tȧy o tȧy ȧtȧ sə yema ta aŋesəm yi ta kakɔth ka aroŋ da Kuru, kətȧŋȧnɛ ka kȧtȧrȧ ka ɔwe po tela su ta aŋyiki dɛ yi mafinɔ mɔŋ məthɔth.

⁴Ta ȧte ɔ po sɔŋ su ɛlahiri yɔŋ ɛbana ɛkɛŋ, kȧmȧ pə yi di kati nə gbəli ba ani ka mayi ma Kuru, ma nə po fisɔsnɛ kəwur ka mȧnɔkɔ ma ȧdȧru salata ɛmilɛ ɛləs.

⁵Ɔwa ma pə thas ȧte bɛ-e, bȧsər nu kȧmȧ nə bȧr ka kȧlanɛ ka nu, kəthɔth; dɛ yi ka kəthɔth-e, kətara tȧy;

⁶yi ka kətara tai-e, kəyi gbɛt; dɛ yi ka kəyi gbɛt-e, kəmuyu; dɛ yi ka kəmuyu-e, kənesa Kuru;

⁷dɛ yi ka kənesa Kuru-e, məbɔthər ma rəwɔnt; yi ka məbɔthər ma rəwɔnt-e, məbɔthəranɛ.

⁸kotȧy-e bepi mȧtȧy ame mə yi nu, ɔwa mə bȧrnɛ sɔ-e, mə tə yɔ nu nə tȧrȧ ɔMarki kȧsu Yisɔs Kraystȧŋ kəte yi na ayay thalɔm na akoŋfereŋ ka kȧtȧrȧ kati.

⁹kotȧy-e ɔwe mə paŋ mȧtȧy ame ɔ yi ufith, ɔ gbəli hɛ nənk ɔbɔli, ɔ pənɛ kəpa a po nasi kɔ kəwur ka ɛhakɛ yɔŋ ɛkur.

¹⁰Tiyȧŋ, awɔnt, bȧsər nu tə kəyɔ kȧmȧ katela yi kathith ka nu kə yi tə tɛntɛnɛ. Kotȧy-e bepi nə yɔ mȧtȧy ame nə ba hɛ kəfumpɔ thȧnkȧŋ.

¹¹Ɔwa nə tə sɔthɔ kədare kəgbenthis ka rȧbȧy rəthəbana ra ɔMarki ɔKisis kȧsu Yisɔs Kraystȧŋ.

¹²Tiyȧŋ i ba hɛ kəthamrɔ tə kəgbɛlɛŋ ɛmerȧ ɛ nu ta mȧtȧy ame lɔkɔ o lɔkɔ, hali ma nə tȧrȧ thɔŋ, ɔwa nə poŋ thɔŋ bȧksər ka tȧteŋ ȧtȧ nə ba ka-ake.

¹³Yao i nanɛ ti ɔlompi fani mɔ Kuru ɔ yep mi ras aŋesəm-e, tə kəgbukthis nu ta ȧte, kȧmȧ nə kȧl tȧmtȧmnɛ ti.

¹⁴Pəkasifɛ i tȧrȧ kəpa ȧŋlɔkɔ ŋa kabus ȧŋdɛr a mi aŋe aŋ yema bek, mɔ mə ɔMarki kȧsu Yisɔs Krayst ɔ po tɔri mi.

¹⁵Ɔwa i ti mɛm kȧmȧ pə yi ma i po thas-e, nə gbəli botərnɛ mȧtȧy ame rə ȧmerȧ.

¹⁶kotȧy-e saŋ sə taŋanɛ hɛ mump mətempi ma sə po tɔri nu ka anfɔsɔ dɛ yi ka kȧder ka ɔMarki kȧsu Yisɔs Krayst, kɛrɛ saŋ sə seri ta aŋyiki ŋɔŋ ŋa rȧbȧy yi ɛfɔr ɛ su gbeŋ.

¹⁷kotȧy-e ɔ sɔthɔ afɔsɔ yi ayiki ka Kuru ɔKas, ma ȧrim rə derər kɔ kəwur ka aŋyiki ŋa ȧriyana, rə pa hɔ, Munɔ mə yi ɔWan kȧmi ubɔthər, ɔwe mə thesis ȧŋmerȧ a mi.

¹⁸Ɔwa sə po təlȧ ȧrim are ara wur ka ȧkȧriyana, ma sə yi dɛ yi kɔn ka kateŋ kəsəm.

¹⁹Sə ba sɔ ȧrim ra təteŋ gbeŋ ara a tɔri su ka mȧgbal məsəm; ɔwa nə tə yɔ finɔ bepi nə malanɛ ri rə ȧmerȧ, mɔ ȧŋmothȧ aŋa mə gbɛntha ka ȧŋsum haŋ pə re sɔk, ɔwa akɔs ka rabəth kə put ka tabuth ta nu.

²⁰Kɛrɛ tȧrȧ nu ras ȧte-e, rim o rim ara a gbal ka mȧgbal məsəm rə wur hɛ ka ɛnanɛ ya Aŋnȧbi;

²¹kotȧy-e mȧgbal mə der hɛ thəpaŋ ka mȧselɔ ma wuni kəpet, kɛrɛ afəm aruni asəm ŋa Kuru aŋ gbal ȧtȧ ɔYina məsəm ɔ tɔri ŋa.