Read Ȧŋlemrȧnɛ Ȧfu 2 Pitar 3 Bible Online

2 Pitar 3 - Ȧŋlemrȧnɛ Ȧfu bible

2 Pitar 3

¹Ȧŋreka aŋa bekȧ yɛrəŋ ŋi aŋe abɔthər, ɔwa i gbalər yɛ yɛrəŋ kȧmȧ i gbukthis nu tə kəkal tȧmtȧmnɛ.

²Dɛ yi kȧmȧ nə kala ȧmerȧ ta ȧsim ȧtȧ Aŋnȧbi asəm aŋ poŋ seri thəpaŋ, yi ta aŋyamari ŋa ɔMarki kȧsu, ɔKisis, aŋa saŋ, aŋsom, sə po tɔri nu.

³Kɛrɛ tȧrȧ nu ȧte, kəpa ye afəm asel tȧy aŋ tə der ka marey mələpsɔ aŋa mə kɔth gbo ka mafela mələs maŋ gbeŋ.

⁴Aŋ tə pa hɔ, Reke aŋlahiri ŋa kȧder kɔŋ aŋ yi-e? kotȧy-e kȧbi ma aŋbemba a su aŋ po fi-e, mȧtȧy bɛ mə yi gbo məthənanɛ mɔ ka ɔtəpɛr.

⁵Kɛrɛ a siyasnɛ kəte tȧrȧ ȧte, kəpa ye, ka ȧrim ra Kuru kȧriyana kə yi thəpaŋ, kɔ gbaski ȧdȧru kətɔŋ ka ȧmȧntȧŋ.

⁶Ka ȧdȧru ara yi thəpaŋ rə dinɛ ka mȧnt məgbonthoni.

⁷Kɛrɛ kȧriyana dɛ yi ȧdȧru ɛyɛ yi ka-ake, a bɛnɛ yi salata ȧrim rin rati tə kəthɔi yi ka ȧŋrey ŋa kathoŋkas dɛ yi kadinɛ ka ante lanɛ Kuru.

⁸Kɛrɛ abɔthər, te pənɛ ȧtȧy tin ȧte kəpa ye ȧrey ŋin dɛ yi ɔMarki aŋ yi mɔ təren awul ŋin, yi təren awul ŋin tə yi mɔ ȧrey ŋin.

⁹ƆMariki ɔ yi hɛ uyai tə kəbɛnɛ aŋlahiri ŋɔŋ mɔ afəm alɔm mə aŋ pa rəyai, kɛrɛ ɔ ba kəmuyu kəwoni ta ȧtȧ su, ma pə yi ɔ yema hɛ wuni o wuni ɔ dinɛ kɛrɛ kȧmȧ ŋa bɛ aŋ re thupi.

¹⁰Kɛrɛ ȧŋrey ŋa ɔMarki aŋ tə der mɔ ukei ka tȧtȧk. Ɔwa ka ȧŋrey ŋati tȧriyana tə tə thas yi ɛsɔnkɔ ɛbana, yi mayɛt bɛ mə tɔ thaŋkɛ yi ɔfey ɔninis, ka ȧdȧru dɛ yi mȧpanth ma afəm a kəpet bɛ mə tə fey mər.

¹¹Ma sə nənk kəpa ɛyɛt ɛye bɛ ɛ tə dinɛ-e, ko afəm ŋaŋ nə yi naŋ tə kəyi ka məyi məsəm, dɛ yi ka ranes ra Kuru-e?

¹²Ma pə yi ti-e, nə kəli, ka nə bosinɛ ta kȧder ka ȧŋrey ŋa Kuru, ma tȧriyana tə tə poŋ tɛf ka nȧnt nəmara-e, ɔwa mayɛt sɛŋk mə tə thaŋkɛ ka ɔfei ɔninis wati.

¹³Halisa saŋ, kətȧŋȧnɛ ka aŋlahiri ŋɔŋ sə kəlianɛ ta kȧriyana kəfu dɛ yi ȧdȧru rəfu ro məlompi mə yianɛ.

¹⁴Tiyȧŋ abɔthər, ma pə yi nə kəlianɛ ta mȧtȧy ame-e, bȧsər nu kȧmȧ ɔ bəp nu ka məthɔfəl kəte ba apora thalɔm məthɛkɛ.

¹⁵Ɔwa tȧrȧ nu kəpa kamuyu kəwoni ka ɔMarki kə yi kəkisi; hali mɔ mə Pɔlȧŋ, ɔwɔnt ubɔthər ɔ po gbalər nu ka kȧtemp ȧke a po sɔŋ kɔ.

¹⁶Ya ɔ pa ka mȧgbal mɔŋ bɛ, ma ɔ fɔf ta mȧtȧy ame. Di kati mȧtȧy məlɔm mə yi mətui sɔthnɛ, ama afəm aŋa te tȧrȧ, yi aŋa ba ɛmerȧ ɛsakanɛ aŋ lafthɛ lafthɛ ma mɔ mə aŋ lafthɛ mȧgbal məsəm məlɔm haŋ aŋ kȧrȧ kədinɛ ka ɛyɛthɛ yaŋ.

¹⁷Tiyȧŋ abɔthər, ma nə po tȧrȧ mȧtȧy ame, bumnɛ nu kȧmȧ nə te sapəra ka kayɛtha ka aŋfəm aləs, yi kȧmȧ nə te fumpɔ kəwur ka matəma ma nu məfinɔ.

¹⁸Kɛrɛ bȧk nu ka ȧŋboŋa yi ka kȧtȧrȧ ka ɔMarki kȧsu yi ɔKisis Yisɔs Krayst. Ta kɔnɔ yi aŋyiki kətəp ka ka-ake haŋ thȧnkȧŋ thəbana. Amina.