Read Ȧŋlemrȧnɛ Ȧfu 1 Yɔn 1 Bible Online

1 Yɔn 1 - Ȧŋlemrȧnɛ Ȧfu bible

1 Yɔn 1

¹Ara yi kȧbi ka ɔtəpɛr, ara sə po təl, ara sə po nəŋka rəfɔr, ara sə po gbɛnthas ɔwa mȧta ma su mə po wop, ta ȧrim ra aŋesəm;

²a tɔri aŋesəm, ɔwa saŋ sə po nəŋka ŋi rəfɔr, ɔwa sə seri ta ŋi, ka sə tɔri nu aŋesəm thəbana aŋa yi ka ɔKas, yi aŋa a po tɔri su;

³ɔwa saŋ sə tɔri nu ara sə po nənk, yi ara sə po təl, kȧmȧ naŋ nə gbəli ba məmanɛ yi saŋ; ɔwa tɛntɛnɛ mamanɛ ma su mə yi yi ɔKas, dɛ yi ɔWan kɔŋ Yisɔs Kraystȧŋ.

⁴Sə gbal mȧtȧy ame ro rɔnu kȧmȧ mabɔnɛ ma su mə gbenthis.

⁵Ɔwa ȧkɛra ȧke sə po təl ro ŋɔŋ sə tɔri nu kəpa Kuru ɔ yi amotha, ɔwa hali asum aŋ yi hɛ ro ŋɔŋ.

⁶Bepi sə pa sə ba məmanɛ yi kɔnɔ, kɛrɛ sə kɔth ka asum, sə yema, ɔwa sə yɔ hɛ tȧteŋ;

⁷kɛrɛ bepi sə kɔth ka ȧŋmothȧ mɔ kɔnɔ ɔ yi ka ȧŋmothȧ sə ba məmanɛ ukin yi ulɔm, ɔwa mȧtir ma Yisɔs ɔWan kɔŋ mə gbərans su kəwur ka ɛhakɛ bɛ.

⁸Bepi sə pa sə ba hɛ ahakɛ, sə pəŋəsnɛ, ɔwa tȧteŋ tə yi hɛ ro su.

⁹Bepi sə gbithanɛ ɛhakɛ ɛ su, ɔ yi ubɔthi lanɛ dɛ ɔ yi ulompi tə kətera ɛhakɛ ɛ su, yi tə kəfethər su kəwur ka məkənə bɛ.

¹⁰Bepi sə pa sə tha yɔ hɛ ahakɛ sə səki kɔ uyem, ɔwa ȧrim rɔŋ rə yi hɛ ka ɛmerȧ ɛ su.