Read Ȧŋlemrȧnɛ Ȧfu 1 Yɔn 2 Bible Online

1 Yɔn 2 - Ȧŋlemrȧnɛ Ȧfu bible

1 Yɔn 2

¹Awuth a mi alɔl, i gbalər nu mȧtȧy ame kȧmȧ nə te yɔ ahakɛ. Kɛrɛ bepi wuni o wuni ɔ yɔ ahakɛ, sə ba ukasa yi ɔKas, ɔ yi Yisɔs Krayst ɔlompi:

²ɔwa kɔnɔ yi asathka tə kəsɔŋ anɛmthɛnɛ ta ɛhakɛ ɛ su: ɔwa pə yi hɛ gbo ta ɛyɛ su, kɛrɛ ta ɛhakɛ ya ȧdȧru bɛ.

³Ka ȧte sə tȧrȧ kəpa sə tȧrȧ kɔ, bepi sə wop ɛyamari yɔŋ.

⁴Ɔwe mə pa, i tȧrȧ kɔ, kɛrɛ ɔ wop hɛ ɛyamari yɔŋ, uyem wɔŋ, ɔwa ɔ ba hɛ tȧteŋ.

⁵Kɛrɛ ɔwe mə wop ȧrim rɔŋ-e, tɛntɛnɛ mabɔthər ma Kuru mə po gbenthis ro ŋɔŋ: ka ȧte sə tȧrȧ kəpa sə yi ro ŋɔŋ.

⁶Kɔn ɔwe mə pa ɔ yi ro ŋɔŋ, ɔ yi sɔ tə kəkɔth mɔ kɔnɔ ɔ kɔth.

⁷Awɔnt a mi, i gbalər hɛ nu ayamari afu, kɛrɛ ayamari akur aŋa nə la ba kȧbi ka ɔtəpɛr. Aŋyamari akur ŋa yi ȧrim ara nə po təl kȧbi ka ɔtəpɛr.

⁸Halisa I gbalər nu sɔ ayamari afu, aŋa yi tȧteŋ ro ŋɔŋ yi ro nu; pəkasifɛ ȧŋsum aŋ thas, ɔwa ȧŋmothȧ ȧtəteŋ aŋ gbɛntha ka-ake.

⁹Kɔn ɔwe mə pa ɔ yi ka ȧŋmothȧ, kɛrɛ ɔ gbɛŋa ɔwɔnt kɔŋ, ɔ yi ras ka ȧŋsum.

¹⁰Ɔwe mə bɔthər ɔwɔnt kɔŋ ɔ tiyȧ ka ȧŋmothȧ, ɔwa ɔ ba hɛ asabu ŋa kəpənthbəla.

¹¹Kɛrɛ ɔwe mə gbɛŋa ɔwɔnt kɔŋ ɔ yi ka ȧŋsum, ɔ kɔth ka ȧŋsum, ɔwa ɔ tɛ hɛ rɔ mɔ kɔ-e, kotȧy-e ȧŋsum aŋ po fithəs kɔ.

¹²I gbalər nu, awuth a mi alɔl, pəkasifɛ a po tera nu ɛhakɛ ɛ nu salata ȧŋes ŋɔŋ.

¹³I gbalər nu, naŋ akas, pəkasifɛ nə po tȧrȧ kɔ ɔwe yi kȧbi ka ɔtəpɛr. I gbalər nu, naŋ alaŋgba, pəkasifɛ nə po tham Sethani. I po gbalər nu, awuth alɔl, pəkasifɛ nə po tȧrȧ ɔKas.

¹⁴I po gbalər nu, naŋ akas, pəkasifɛ nə po tȧrȧ kɔ ɔwe yi kȧbi ka ɔtəpɛr. I po gbalər nu, naŋ alaŋgba, pəkasifɛ nə yi abȧki mədɛr, ɔwa ȧrim ra Kuru rə tiyȧ ro nu, ɔwa nə po tham Sethani.

¹⁵Te nu bɔthər ȧdȧru, thalɔm ɛyɛt ɛyɛ yi ka ȧdȧru. Bepi wuni o wuni ɔ bɔthər ȧdȧru, mabɔthər ma ɔKas mə yi hɛ ro ŋɔŋ.

¹⁶kotȧy-e ɛyɛt bɛ ya ȧdȧru, mafela ma mȧdɛr-o, mafela ma ɛfɔr-o, yi kabonɛ tȧy ka aŋesəm, ɛ yi hɛ ka ɔKas, kɛrɛ ɛ yi ka ȧdȧru.

¹⁷Raru rə tə thas yi mafela mati, kɛrɛ kɔn ɔwe mə yɔ mȧselɔ ma Kuru ɔ tə yi haŋ thȧnkȧŋ thəbana.

¹⁸Awuth alɔl, marey mələpsɔ mi ame: ɔwa ma nə po təl kəpa ukraist uyem ɔ tə der, hali ka-ake akraist ayem agbȧthi aŋ yi: tesom sə tȧrȧ kəpa marey mələpsɔ mə po bek.

¹⁹Ŋaŋ aŋ po wur ro su, kɛrɛ aŋ yi hɛ ta ȧtȧ su; kotȧy-e, bepi aŋ yi naŋ ta ȧtȧ su, aŋ tə tiyȧ naŋ ro su: kɛrɛ aŋ wur ro su, kȧmȧ pə tɔrinɛ kəpa ŋa bɛ, aŋ yi hɛ ta ȧtȧ su.

²⁰Kɛrɛ naŋ nə po sɔthɔ kafethər ka ɔKin usəm, ɔwa nə tȧrȧ mȧtȧy bɛ.

²¹I gbalər hɛ nu ta ma nə te tȧrȧ tȧteŋ, kɛrɛ pəkasifɛ nə tȧrȧ ti, ɔwa nə tȧrȧ kəpa rəyem o rəyem rə wur hɛ ka tȧteŋ.

²²Kanɛ yi ɔyem pəthas kɔn ɔwe mə pɛnsa, kəpa Yisɔs kɔnɔ yi hɛ ɔKrayst-e? Ɔwe mə pɛnsa ɔKas yi ɔWan kɔnɔ yi ɔkrayst uyem.

²³Wuni o wuni ɔwe mə pɛnsa ɔWan ɔ ba hɛ ɔKas; kɛrɛ ɔwe mə gbithanɛ ɔWan ɔ ba sɔ ɔKas.

²⁴Tiyȧŋ wop ȧtȧ nə təl kȧbi ka ɔtəpɛr. Bepi ȧtȧ nə təl kȧbi ka ɔtəpɛr tə tiyȧ ro nu, nə tə tiyȧ ka ɔWan, yi ka ɔKas.

²⁵Ɔwa aŋlahiri aŋa ɔ lahiri su ŋa yi aŋesəm thəbana.

²⁶I gbalər nu mȧtȧy ame ta ŋaŋ aŋa yema yɛthas nu.

²⁷Kɛrɛ bepi kafethər ȧke nə po sɔthɔ ro ŋɔŋ kə tiyȧ ro nu, nə ba hɛ sɔ kȧmȧ wuni o wuni ɔ thəksa nu: ɔwa mɔ kafethər kɔŋ kə thəksa nu ka mȧtȧy bɛ, ɔwa kə yi tȧteŋ, rəyem thahɔ, tiyȧ nu ro ŋɔŋ mɔ mə kə po thəksa nu.

²⁸Ɔwa, awuth alɔl tiyȧ nu ro ŋɔŋ: kȧmȧ ma ɔ tɔrinɛ, sə tə ba kəmintha, kȧmȧ sə te lap tə kəbəp kɔ ma ɔ der-e.

²⁹Bepi nə tȧrȧ kəpa ɔ yi ulompi, tȧrȧ nu sɔ kəpa wuni o wuni ɔwe mə yɔ ɔlompi kɔnɔ kom kɔ.