Read Ȧŋlemrȧnɛ Ȧfu 1 Yɔn 4 Bible Online

1 Yɔn 4 - Ȧŋlemrȧnɛ Ȧfu bible

1 Yɔn 4

¹Abɔthər, te nu lanɛ ɛyina bɛ, kɛrɛ mɛm yi bepi ɛ yi ka Kuru: pəkasifɛ anȧbi ayem agbȧthi aŋ yi ka ȧdȧru.

²Ka ȧte sə tȧrȧ ɔYina ka Kuru: ayina o yina aŋa mə gbithanɛ kəpa Yisɔs Krayst ɔ po der ka madɛr aŋ yi ka Kuru:

³ɔwa ayina o yina aŋa te gbithanɛ kəpa Yisɔs Krayst ɔ po der ka madɛr aŋ yi hɛ ka Kuru: aŋe aŋ yi aŋyina ŋa ɔkrayst uyem, ta ɔwe nə la təl kəpa ɔ yi tə kəder; ɔwa hali ka-ake ɔ yi ka ȧdȧru.

⁴Naŋ nə yi ka Kuru, awuth a mi alɔl, ɔwa nə po tham ŋa: pəkasifɛ kɔn ɔwe yi ro nu ɔ yi ubana pəthasi kɔn ɔwe yi ka ȧdȧru.

⁵Ŋaŋ aŋ yi ta ȧdȧru: tiyȧŋ aŋ fɔf mafɔf ma ȧdȧru, ɔwa ȧdȧru rə təlȧ ŋa.

⁶Saŋ sə yi ta Kuru: ɔwe tȧrȧ kɔ ɔ təlȧ su; kɛrɛ kɔn ɔwe te yi ta Kuru ɔ təlȧ hɛ su. Ka ȧte sə tȧrȧ ɔgbaskɛ wa aŋyina ka təteŋ, yi aŋyina ŋa rəyem.

⁷Ambɔthər a mi, maŋ bɔthərȧnɛ nu: kotȧy-e məbɔthər mə yi ka Kuru; ɔwa wuni o wuni ɔwe mə bɔthər a po kom kɔ ka Kuru, ɔwa ɔ tȧrȧ Kuru.

⁸Kɔn ɔwe mə te bɔthər ɔ tɛ hɛ Kuru; kotȧy-e, Kuru ɔ yi məbɔthər.

⁹Ka ȧte mabɔthər ma Kuru mə tɔrinɛ ro rɔsu, ma ɔ somra ɔWan kɔŋ ɔ kom gbo son ka ȧdȧru, kȧmȧ sə ŋesəm ro ŋɔŋ.

¹⁰Mabɔthər mi ame, pə yi hɛ kəpa saŋ sə po bɔthər Kuru, kɛrɛ kɔnɔ ɔ po bɔthər su, kɔ somra ɔWan kɔŋ tə kəyi asathka ta kənɛmthɛnɛ ta ɛhakɛ ɛ su.

¹¹Abɔthər, bepi Kuru ɔ bɔthər su yaŋ, saŋ sɔ sə yi tə kəbɔthəranɛ.

¹²Wuni o wuni ɔ tha nənk hɛ Kuru hali. Bepi sə bɔthərȧnɛ, Kuru ɔ tiyȧ ro su, yi mabɔthər mɔŋ mə gbenthis ro su.

¹³Ka ȧte sə tȧrȧ sə tiyȧ ro ŋɔŋ, ɔwa kɔnɔ ro su, pəkasifɛ ɔ po sɔŋ su ani ka ɔYina kɔŋ.

¹⁴Ɔwa saŋ sə po nənk ka sə seri ti kəpa ɔKas ɔ po somra ɔWan tə kəyi ɔKisis ka ȧdȧru.

¹⁵Wuni o wuni ɔwe mə gbithanɛ kəpa Yisɔs ɔ yi ɔWan ka Kuru, Kuru ɔ tiyȧ ro ŋɔŋ, ɔwa kɔn ɔ tiyȧ ka Kuru.

¹⁶Saŋ sə po tȧrȧ, ka sə lanɛ mabɔthər ama Kuru ɔ ba ta ȧtȧ su. Kuru ɔ yi məbɔthər; kɔnɔ ɔwe mə tiyȧ ka mabɔthər ɔ tiyȧ ka Kuru, ɔwa Kuru ɔ tiyȧ ro ŋɔŋ.

¹⁷Mabɔthər ma su mə tə gbenthis ka ȧte, kȧmȧ sə ba kəmintha ka ȧŋrey ŋa kathoŋkas: pəkasifɛ mɔ kɔnɔ ɔ yi, ya saŋ sə yi sɔ ka ȧdȧru are.

¹⁸Məbɔthər mə ba hɛ rənes; kɛrɛ mabɔthər məgbenthis mə tə bȧl rənes; pəkasifɛ rənes rə ba athalər. Kɔn ɔwe ba rənes ɔ ba hɛ məbɔthər məgbenthis.

¹⁹Sə bɔthər kɔ, pəkasifɛ kɔnɔ mɔtha bɔthər su.

²⁰Bepi wuni o wuni ɔ pa ɔ bɔthər Kuru, kɛrɛ ɔ gbɛŋa ɔwɔnt kɔŋ-e, ɔ yi uyem; kotȧy-e ɔwe te bɔthər ɔwɔnt kɔŋ ɔwe ɔ po nənk, to mɔ gbəli bɔthər Kuru ɔwe ɔ te tha nəŋk-e?

²¹Ɔwa aŋyamari aŋe sə po sɔthɔ ro ŋɔŋ, kəpa ɔwe mə bɔthər Kuru ta ɔ bɔthər sɔ ɔwɔnt kɔŋ.