Read Ȧŋlemrȧnɛ Ȧfu Kȧŋȧibinɛ 11 Bible Online

Kȧŋȧibinɛ 11 - Ȧŋlemrȧnɛ Ȧfu bible

Kȧŋȧibinɛ 11

¹Ɔwa a sɔŋ mi kənt kəthuntha; ka ɔmaleka ɔ təmȧ, kɔ pa, Yokanɛ mə thunth ȧŋseth ŋa Kuru, dɛ yi ȧŋbɛsɛ, ɔwa lɔm aŋfəm aŋa ramnɛ ri.

²Kɛrɛ te thunth ȧŋkunk rokaŋ ka ȧŋseth ŋa Kuru, pəkasifɛ a po sɔŋ ŋi ka tȧbona təlɔm; ɔwa aŋ tə nas nas kȧpet kəsəm ta yof təgba tərəŋ yɛrəŋ.

³Ɔwa i ti sɔŋ afɔsɔ ka maseri ma mi ŋarəŋ, kȧmȧ aŋ nȧbi mərey awul ŋin tɛmɛ tərəŋ dɛ yi təgba təsas, dɛ yi aŋ tə lopra kotha kənɛthɛ.

⁴Maseri aŋe aŋ yi mɔ-e yint ya aŋ ɔlif yɛrəŋ, dɛ yi tamulɛ tərəŋ ɛyɛ təmȧ rodi ka ɔKuru ka ȧdȧru.

⁵Ɔwa bepi wuni o wuni ɔ yema yɔ ŋa ɔbaŋ-e, nȧnt nə tə wur ka tasəŋ taŋ tə kələsər antheranɛ ŋaŋ; tiyȧŋ bepi wuni o wuni ɔ yema yɔ ŋa ɔbaŋ-e, ya ɔ ba tə kəfi.

⁶Aŋfəm ŋarəŋ aŋe aŋ ba afɔsɔ tə kəkantha ȧkuru kȧmȧ kɔm kə te thuf ka marei ma kanabi ka ŋaŋ; ka aŋ ba afɔsɔ sɔ tə kəsəki mȧnt mətir, dɛ yi tə kəsɔmpar ȧdȧru rə ɛfithina ɛgbanthɛ gbanthɛ mɔ mə aŋ yema.

⁷Maŋ pons maseri maŋ-e, ɔsɛm ubaŋ ɔwe wur ka ȧŋbi aŋa te ba ɔthalnɛ-e, ɔ tə tim ŋa, ɔwa ɔ tə tham ŋa, kɔ tə kȧl dif ŋa.

⁸Ɔwa tabel taŋ tə tə fənthȧ ka aroŋ ka kȧpet kəbana (ȧke yi ro Yina mɔ Sɔdɔm dɛ yi Iyipt), ro a tȧŋ sɔ ɔMarki ka ŋaŋ ka akənt kəpəŋkinɛ.

⁹Ɔwa kəwur ka aŋfəm, yi ɛbɔnsɔŋ, yi tənt, dɛ yi tȧbona bɛ, aŋ tə kəli tabel taŋ ta mərey məsas ratɔŋ, ɔwa aŋ selɔ hɛ a maŋk ŋa.

¹⁰Ɔwa aŋfəm nɔru aŋ tə yasanɛ məbɔnɛ, aŋ tə kȧl sel, ɔwa aŋ tə somra ɛboya ukin ka ulɔm, pəkasifɛ Aŋnȧbi ŋarəŋ aŋe aŋ la sɔmpar ŋaŋ aŋa yi nɔru.

¹¹Kɛrɛ kədarəŋ ka mərey məsas ratɔŋ-e, ɔYina ka aŋesəm ŋa Kuru ɔ wɔŋ ŋa, kaŋ təmȧ ka tatək taŋ; ɔwa rənes rəbana rə wop ŋa aŋa nənk ŋa.

¹²kaŋ təlȧ rim rəbana rə wur ro riyana rə kanɛ ŋa, Der gbep nu nɔ-əŋ. Kaŋ ŋat rokɔm ka kuru kəfera, ka antheranɛ a ŋaŋ aŋ nənk ŋa maŋ kɔnɛ.

¹³Ka ȧŋlɔkɔ ŋati gbeŋ-e, ȧŋthɔf an tən kətən kəbana, ɔwa ȧgbȧp ŋin ka ɛgbap tɔfɔt ya kȧpet kǝ ləsȧ, ka afəm ɛwul tȧmthədɛrəŋ aŋ fi ka katən kati; ka aŋdɔnkɛ aŋa tiyȧ aŋ nesa, ɔwa aŋ sɔŋ ayiki ka Kuru ka ȧriyana.

¹⁴Anthalər aŋa bekȧ yɛrəŋ aŋ po thas. Kəla aŋa bekȧ ɛsas ŋə mə derȧŋ lɛmp.

¹⁵Ɔmaleka ɔwe bekȧ tȧmthədɛrəŋ ɔ fɛŋ, ka sim təbana tə yi ro riyana ȧtȧ pa, Tabȧy ta ȧdȧru are tə po səkɛ rȧbȧy ra ɔMarki kȧsu, dɛ yi ɔKrayst kɔŋ. Ɔwa kɔnɔ ba kəgbəka thȧnkȧŋ o thȧnkȧŋ.

¹⁶Ka aŋbȧki kəgba ŋanlɛ aŋa yirȧ ka tawaŋ taŋ rodi ka Kuru-e, aŋ fumpɔ ka aser taŋ, kaŋ thɔkəs Kuru,

¹⁷aŋ pa, Sə mɔmɔ mu, ɔMarki Kuru ka afɔsɔ bɛ, ɔwe yi, ɔwe la yi, dɛ yi ɔwe yi tə kəder; pəkasifɛ mə po gbasi aŋfɔsɔ a mu abana, ɔwa mə po gbəka.

¹⁸Ɔwa tȧbona tə bansȧ, kɛrɛ rabaŋ da mu rə der; dɛ yi ȧŋlɔkɔ tə kəthoŋkas aŋfi-e, tə kəsɔŋ ȧŋrȧm ka ɛbɔy ɛ mu Aŋnȧbi, yi ka aŋfəm ŋa Kraystȧŋ, yi ka ŋaŋ aŋa nesa ȧŋes a mu-e, aŋlɔl dɛ yi aŋbana. Ɔwa ȧŋlɔkɔ aŋ der sɔ tə kələsər ŋaŋ aŋa ləsər ȧdȧru.

¹⁹Ka a kanthi ȧŋseth ŋa Kuru ro riyana, ka a nənk ri akuma kəsəm ka aŋlemranɛ ŋɔŋ; ɔwa ɔnakthinɛ ɔ yi ri dɛ yi sim, yi sɛŋ, yi kətən, dɛ yi kɔm kətɔs kəbana.