Read Ȧŋlemrȧnɛ Ȧfu Kȧŋȧibinɛ 14 Bible Online

Kȧŋȧibinɛ 14 - Ȧŋlemrȧnɛ Ȧfu bible

Kȧŋȧibinɛ 14

¹Ka i kəli, ɔwa kəlo, kəLɔmɛ kəfɛth ɔ təmȧ ka kateŋ ka Sayɔŋ, dɛ yi afəm ɛwul kɛmɛ kin təgba tərəŋ yanlɛ aŋ təmȧ yi kɔn, afəm ŋaŋ aŋa ba ȧŋes ŋɔŋ yi ȧŋes ŋa ɔKas kɔŋ ka mabuŋ maŋ.

²Ka i təlȧ rim kəwur ka kȧriyana, mɔ kətɔŋa ka kəthəntha, yi mɔ kagbɛŋ ka rɛŋ; ɔwa ȧrim ara i təlȧ rə yi mɔ afəm aŋ fer ɛgbulu yaŋ.

³Ɔwa aŋ leŋ aleŋ afu rodi ka kawaŋ ka rȧbȧy, yi rodi ka ɛwuka akəli ŋanlɛ, dɛ yi aŋbȧki; ɔwa wuni o wuni ɔ gbəli hɛ thəkəs aŋleŋ ŋati thambe aŋfəm ɛwul kɛmɛ kin təgba tərəŋ yanlɛ aŋa a po bani ka ȧdȧru.

⁴Aŋe, ŋa yi aŋfəm aŋa te pulkinɛ rə afəm abom; ȧtesoma-e aŋ yi agbəraŋ mɔ afanɛ. Aŋe-e, ŋa tȧŋ kaLɔmɛ kəfɛth dɛr o dɛr rə ɔ kɔnɛ. Aŋe-e aŋ yi abani kətɔŋ ka afəm a kəpet mɔ mȧkomi mətɔtɔkɔ ta Kuru dɛ yi ta kaLɔmɛ kəfɛth.

⁵Ɔwa a fir hɛ rəyem o rəyem ka tasəŋ taŋ hali rodi ka kawaŋ ka rȧbȧy ra Kuru, ȧtesoma-e aŋ yi agbenthis.

⁶Ka i nənk umȧleka ulɔm ɔ fal ka kȧriyana, kɔ ba ȧkɛra kəfinɔ ka Kuru kəthəbana tə kətaməs ka ŋaŋ aŋa yi ka ȧdȧru, dɛ yi ka tȧbona təlɔm bɛ-e, ka ɛbɔnsɔŋ bɛ, ka tənt bɛ, dɛ yi ka afəm bɛ;

⁷kɔ kȧl pa rə rim rəbana, Nesa nu Kuru-e, ɔwa sɔŋ kɔ nu yiki, pəkasifɛ ȧŋlɔkɔ ŋa karɔk ɛpa yɔŋ aŋ po bek. Ɔwa bȧtho kɔ nu ɔwe po bɛmpa ȧkȧriyana yi ȧdȧru, dɛ yi kȧbȧŋ kəbana, dɛ yi tabath.

⁸Ka umȧleka ulɔm ɔwe bekȧ ŋarəŋ ɔ pa, Babilɔn, kȧpet kəbana kati kə po simtha, kə po simtha, ȧke po yɔ kȧmȧ təbona bɛ tə mun maber ma rabaŋ da karəp kɔŋ.

⁹Ɔwa ɔmaleka ɔwe bekȧ asas-e, ɔ tȧŋ, kɔ pa rə rim rəbana, Bepi wuni o wuni ɔ bȧtho ɔsɛm dɛ yi mȧbȧlȧnɛ mɔŋ-e, thalɔm ɔ malanɛ aŋlomar ŋɔŋ ka ȧŋbuŋ ŋɔŋ-e, ama ka kȧta kɔŋ-e,

¹⁰ɔkati a tə kȧl ba kəmun mawayn ma rabaŋ da Kuru-e, ara a po kus ka ampɔthi ŋa rabaŋ dɔŋ kəte kuluŋ; ɔwa a tə sɔmpar kɔ rə nȧnt dɛ yi sɔlfɔ rodi ka aŋmȧleka asəm, dɛ yi ka kȧbəprȧnɛ ka kaLɔmɛ kəfɛth.

¹¹Ka akimɔ ka ansɔmpanɛ ŋaŋ kə tə ŋat rokɔm thȧnkȧŋ thəbana. Ɔwa ŋaŋ aŋa bȧtho ɔsɛm utuy tȧy yi mȧbȧlȧnɛ mɔŋ, thalɔm wuni o wuni ɔwe ba aŋlomar ŋa ȧŋes ŋɔŋ-e, ɔ ba hɛ kəfothanɛ pali gbɛs-əŋ.

¹²Ȧŋlɔkɔ ŋi aŋe ta aŋfəm ŋa Yisɔs tə kətɔri kamuyu ka ŋaŋ, pə yi mɔ-e, ŋaŋ aŋa wop ɛyamari ya Kuru yi kȧlanɛ ka Yisɔs.

¹³Ka i təlȧ rim kəwur ro riyana rə pa, Gbal ȧte, Aruba ŋaŋ aŋa fi ka ɔMarki kətəp ka-ake. Ya pə yi ɔYina ɔ pa, kȧmȧ aŋ fothanɛ ka mapanth maŋ; ȧtesoma-e mȧyɔs maŋ mə tȧŋ ŋa nɛp nɛp.

¹⁴Ɔwa i kəli, ka i nənk abunth ȧferȧ, ɔwa wuni ɔ yirȧ ka ȧŋbunth ŋati ɔwe bȧlȧnɛ ɔWan ka wuni, kɔ ba ȧniyɔ ŋa məbɔŋɔ ka rȧbomp rɔŋ, dɛ yi awɔrthɔ awɔŋi ka kȧta kɔŋ.

¹⁵Ka umȧleka ulɔm ɔ wur ka ȧŋseth ŋa Kuru kətela rə rim rəbana ka ɔwe yirȧ ka ȧŋbunth ȧferȧ, kɔ pa, Wurɔ aŋwɔrthɔ a mu, ɔwa rɔk thɔŋ; kotȧy-e ȧŋlɔkɔ aŋ bek tə kərɔk, pəkasifɛ karɔk ka ȧdȧru kə po yakanɛ.

¹⁶Ɔwa kɔn ɔwe yirȧ ka ȧŋbunth ȧferȧ ɔ wɔŋȧ aŋwɔrthɔ ŋɔŋ ka ȧdȧru; ka a rɔk ȧdȧru.

¹⁷Ka umȧleka ulɔm ɔ wur ka ȧŋseth ŋa Kuru ro riyana, ɔwa kɔnɔ sɔ ɔ ba awɔrthɔ awɔŋi,

¹⁸ka umȧleka ulɔm ɔ wur ka ȧŋbɛsɛ ɔwe ba afɔsɔ rokɔm ka nȧnt; kɔ pa rə rim rəbana ka ɔwe ba aŋwɔrthɔ awɔŋi-e, Wɔŋȧ aŋwɔrthɔ a mu awɔŋi, ɔwa thoŋkla mȧkomi ma nalek na ȧdȧru, kotȧy-e mȧkomi mati mə po lɔl tɛrɛŋ.

¹⁹Ɔwa ɔmaleka ɔ wɔŋȧ aŋwɔrthɔ ŋɔŋ ka ȧdȧru, kɔ rɔk mȧkomi ma nalek na ȧdȧru, kɔ fitha ma ka ɔdɛr ro mə a wɛkəs mawayn ma rabaŋ da Kuru,

²⁰ka a nas nas mȧkomi ka ɔdɛr ɔwɛkəs ro pet lɛŋkɛn, ɔwa mətir mə wur ri, mə kȧl ŋat haŋ mə bek ka ȧtarafilo ta tasoy, mə gboŋgbəli ɛmail tɛmɛ tərəŋ.