Read Ȧŋlemrȧnɛ Ȧfu Kȧŋȧibinɛ 16 Bible Online

Kȧŋȧibinɛ 16 - Ȧŋlemrȧnɛ Ȧfu bible

Kȧŋȧibinɛ 16

¹Ka i təlȧ rim rəbana rə wur ka ȧŋseth ŋa Kuru rə kanɛ aŋmȧleka tȧmthədɛrəŋ, Kɔnɛ nu kus rabaŋ da Kuru ka ɛbɔl tȧmthədɛrəŋ ka ȧdȧru.

²Ka ɔtɔtɔkɔ ɔ kɔnɛ kɔ kus ȧŋbɔl ŋɔŋ ka ȧdȧru; ɔwa təsam tələs tabaŋ tə wur ka aŋfəm aŋa ba aŋlomar ŋa ɔsɛm utuy tȧy, dɛ yi ka ŋaŋ aŋa bȧtho mȧbȧlȧnɛ mɔŋ.

³Ka ɔmaleka ɔwe bekȧ ŋarəŋ ɔ kus ȧŋbɔl ŋɔŋ ka kȧbȧŋ; ka kə səkɛ mɔ mȧtir ma wuni fi, ɔwa ɛyɛt ɛkəli bɛ ro bȧŋ aŋ fi.

⁴Ka ɔmaleka ɔwe bekȧ asas ɔ kus ȧŋbɔl ŋɔŋ ka taboŋ yi ka tabath; ɔwa tə səkɛ mətir.

⁵Ka i təlȧ ɔmaleka ka ȧmȧnt ame ɔ pa, Munɔ yi ɔlompi ɔMarki ɔwe yi, dɛ yi ɔwe la yi, dɛ yi ɔwe ba tə kəyi, pəkasifɛ mə po thonkas yaŋ.

⁶Ȧtesoma-e afəm aŋ po loŋ mȧtir ma aŋfəm asəm, dɛ yi Aŋnȧbi, ɔwa munɔ po sɔŋ ŋa mətir tə kəmun; kotȧy-e aŋ yi abeki ta ti.

⁷I təlȧ sɔ ȧrim ra ȧŋbɛsɛ rə pa, Yao, ɔMarki Kuru ka afɔsɔ bɛ, mathoŋkas ma mu mə yi məlompi rɛ təteŋ.

⁸Ka ɔmaleka ɔwe bekȧ ŋanlɛ ɔ kus ȧŋbɔl ŋɔŋ ka aret; kɔ selɔ kȧmȧ rə kȧl aŋfəm.

⁹Ka a kȧl aŋfəm rə ɔfey ɔbana wati, ɔwa aŋ fɔf ɔləs kəŋamnɛ Kuru ɔwe ba afɔsɔ rokɔm ka ɛfithina ɛye, kɛrɛ aŋ thupi hɛ tə kəsɔŋ kɔ yiki.

¹⁰Ɔwa ɔmaleka ɔwe bekȧ tamath ɔ kus ȧŋbɔl ŋɔŋ ka kawaŋ ka ɔsɛm utuy tȧy; ka rȧbȧy rɔŋ rə la ȧsum. Aŋfəm aŋ ŋans tamer taŋ asabu ŋa ɔbaŋ.

¹¹kaŋ fofiya ɔKuru ka ro riyana ta ɔbaŋ, dɛ yi ta tȧsam taŋ, kɛrɛ aŋ thupi hɛ ka maləs maŋ.

¹²Ɔwa ɔmaleka ɔwe bekȧ tamthərukin ɔ kus ȧŋbɔl ŋɔŋ ka kȧbȧŋ kəbana ȧke a tela Ufretis; ka ȧmȧnt mati mə wosər gbet, kȧmȧ a bɛmpa roŋ ta aŋbȧy aŋa mə der kəwur rothɔrɔŋ.

¹³Ka i nəŋk ɛyina ɛsas ɛnɔkɔ mɔ ɛtal, ɛ wur ka kȧsəŋ ka ȧŋninkinanka, ka kȧsəŋ ka ɔsɛm utuy tȧy, dɛ yi ka kȧsəŋ ka ɔnȧbi uyem.

¹⁴Ɔwa aŋ yi ɛyina ya akərəfi aŋa yɔ ɛmisali, ka aŋ kɔ ka aŋbȧy ŋa ȧdȧru bɛ, tə kəthoŋkla ŋa rɔkin ta ȧrəfȧ ra ȧŋrey abana ŋa ɔKuru ka aŋfɔsɔ.

¹⁵(Kəla-a, minɛ mə derȧŋ mɔ ukey. Wuni ka aruba wɔŋ ɔwe mə bumər-e, dɛ yi ɔwe mə bɛnɛ ɛlopra yɔŋ ta thani ɔ kɔth kətiŋ tal, ɔwa aŋ nənk mȧlap mɔŋ).

¹⁶kaŋ thoŋkla ŋa ka ɔdɛr ma tela ka kəHibru, Amakɛdɔn.

¹⁷Ka ɔmaleka ɔwe bekȧ tȧmthədɛrəŋ ɔ kus ȧŋbɔl ŋɔŋ ka aŋfena; ɔwa rim rəbana rə wur ka kawaŋ ka rȧbȧy ka ȧŋseth ŋa Kuru, rə pa ye, Koko bɛ rə poŋ thɔŋ.

¹⁸Kədarəŋ kati a ba ri ɔnakthinɛ, yi sim, dɛ yi sɛŋ. Ka ȧŋthɔf aŋ tən sɔbɛ, pəthasi ȧtȧ afəm aŋ sa nənk ka ȧdȧru bɛ, ma katən kati kə yi kəbana haŋ-e.

¹⁹Ka kȧpet kəbana kə yeranɛ ra ɛgbap ɛsas, ɔwa tapet taŋ tǝbana tə simtha. Ka Kuru ɔ nanɛ ta kȧBabilɔn kəbana, tə kəyɔ kɔ ɔ mun ampɔthi ŋa mawayn ma rabaŋ dɔŋ rəbana, haŋ aŋ poŋ.

²⁰Ɔwa ayel o yel aŋ gbukɛ, ka tȧteŋ tə maŋknɛ sɔ.

²¹Ka kɔm kətɔs kəbana kə fumpɔ ka aŋfəm kəwur ka kȧriyana, ɔwa kɔm o kɔm kətɔs kə lela mɔ apaŋ kɛmɛ kin, haŋ aŋfəm aŋ nal Kuru ta aŋfithina ŋa atɔs, ȧtesoma-e aŋfithina ŋati a ninis.